Miyambo 8 - Mawu a Mulluku

Opambana wa ezeru

¹ Ethiyo ezeru kheniithana? Ethiyo wiiwesesa khonakhuwa?

² Ezeru eniimella vamutundani mukhwipi mwa musewu, eniimella m'makhullukanoni.

³ Ennakhuwa vakhwipi ni millako dda muzinda, ni moovollowella athu wi,

⁴ “Nyu athu attheene, kinnawiithanani, mawaaka enaya wa arive muthu.

⁵ Nyu athu eenamwani, chenjerani. Nyu ookarangeya, iwesesani.

⁶ Apellani maaru mawaaka aphaama wunchichi, ddittheddene kinalloteemi tti ddawoona.

⁷ Muwano mwaka munallota ddawoonave, eyanwaaka enniitana ni ddoonanara.

⁸ Mawu mattheene a muwano mwaka tti oolungama, kheyiivo ello eri yookhoromana apaalle yoohollosa.

⁹ Mattheene tti aphaama wa ayo eniiwesesa, oolungama wa ayo enaphwanya ezeru.

¹⁰ Akhellani malangizwaaka okhwaranya siliva, odduwella okhwaranya golide aphaama wunchichi.

¹¹ Vawi ezeru tti yaphaama okhwaranya malluku oowallamella mutengo, kheyiivo eyo ninaayipaalleehu enaaphwanaphwaniiwana.

¹² Miyaano ezeru, kinnakeraattheya mu wiiwesesa, kinnaphwanya odduwella nave oganiza waphaama.

¹³ Owoova Apwiya tti wiitana ni ddoonanara. Kinniitana ni okota wiitukhulla, weera ddoonanara ni muwano mookhoromana.

¹⁴ Kookhalla ni malangizo ni odduwella, wiiwesesa ni masiva.

¹⁵ Kinneeriha mamwene olamulella phaama, enduna weeruza moolungama.

¹⁶ Kinnakavihera enduna voolamulani phaama, attekweene vaweeruzani moolungama.

¹⁷ Kinnaakonda ayo enakikonda, ookaashaasha ennakiphwanya.

¹⁸ Kookhalla ni ddeko ddinchichi owaaka olemu, eyuuma yoohimalla ni echilungamo.

¹⁹ Ezipaso ddaka tti ddaphaama omukhwaranya golide naari golide oosalala wunchichi, mphurwaaka tti waphaama omukhwaranya siliva aphaama wunchichi.

²⁰ Kinneeta mu ettilla yoolungama, mu misewu ddeechiweruzo.

²¹ Kinnaavaha eyuuma ookikonda wi ekhalle yoohallaniiwa, kinnaddalliha enyumba ddiwa ddoovitthellamo eyuuma.”

²² Apwiya yaakiphatusa miyaano vawaamba va mitteko ddiwa, ehinaphatuse erive ello.

²³ Yaakipanga khalle vawaambawaamba, ellapo yavatthi ehinaphatusiwe.

²⁴ Kaayariwa enyanja yoowallamella ddihinaphaatusiwe, aneetuutu ehinakhallewo.

²⁵ Kaayariwa miyaango ddihinakeraatthihiwe asimiyaango ehinakhallewo,

²⁶ ehinaphatusiwe ellapo yavatthi ni mahakiiwa, naari nthupi nawaamba na ellapo yavatthi.

²⁷ Kaari kiriwo yakeraatthihiiwa eddullu, yalembiiwa malire a enyanja yoowallamella,

²⁸ yakeraatthihiiwa mirapo, yaahulliiwa aneetuutu oowallamella,

²⁹ Yaphaddiiwa malire a enyanja wi maaddi ehilluphe, yakeraatthihiiwa matthipello a ellapo yavatthi.

³⁰ Kaari muthu eeruso vakhuviru ni alliwa, kinaahakallalliha nllapo ni nllapo, kaanathapella enthawi ettheene vamiitthoni viwa.

³¹ Kaanahakallalla mu ellapwiiwa yookhallamo athu, kaanathapella ni anamwani a athu.

³² “Vano anaaka, apellani maaru, oodalisiwa tti ayo enasunga ettilla ddaka.

³³ Iwellellani malangizwaaka wi mukhalleke eezeru, Muhinayinyemullaka.

³⁴ Oodalisiwa tti oyo anakaapella maaru, anawehera va millako ddaka nllapo ni nllapo, anatiyerella voovollowella vaka.

³⁵ Vawi oyo akiphwanyille oophwanya okumi, Apwiya eneeromweerella echifundo.

³⁶ Koma oohikiphwanya aniivoreya yeekha, attheene ookiita ennakonda okhwa.”