Miyambo 7 - Mawu a Mulluku

¹ Mwanaka, sunga mawaaka nave vittha malamulwaaka.

² Sunga malamulwaaka wi okhalle ni okumi, pwatha malangizwaaka wonanko niittho nawo.

³ Omakellelle o eyaalla ddawo nave waalembe m'murimani mwawo.

⁴ Ollote wa ezeru wi, “We tti murokoraka.” Nave wiiwesesa okhalle mukhwaawo a vamurimani.

⁵ Ddineerewuuteteza wa mutthiyana ooraruwa, mutthiyana m'mwiitthoni, awoollowa nllumi.

Mutthiyana ooraruwa

⁶ Kiwehaka vaatte oweella vaniwindoni, kitthurumellaka oweella vanyerengoni,

⁷ kaamoona mmodda mwa athu eenamwani, musombwe oohikhalla ni ezeru.

⁸ Eeta mu ettilla yawaatamana ni makhullukano a enyumba ya mutthiyana, m'musewuni wooya onyumbani waye.

⁹ Waari misikuwa, nndduwa nivollowaaka, mahiiyu ori epiphi.

¹⁰ Vano mutthiyana aakumana ni olliye, awanre wonanko hule ari ni yoolinga.

¹¹ Aari ootokollolla, ooheeruzeya nave oohikeraatthi vaatte.

¹² Annaphwanyeya m'misewuni, m'misika nave anniipittha m'makhullukanoni.

¹³ Vano aamuphara nave aamupsopsona allotana moohiwulliwa muru wi,

¹⁴ “Koovelleella mukutho wa eyaattano nave ollello kookwakhwaniha nnddo kallupenlleemi.

¹⁵ Sika kookhuma wi kikumane ni weyaano, koowaasha nave kohuuphwanya.

¹⁶ Vabedini vaka kohaanddallellavo ddookonella ddaphaama, vookhalla ekuwo ddamankhaanga ddabafuta dda o Iguputo.

¹⁷ Koomiddavo makhura awunkhella phaama a mure,* aloe* ni sinamoni.

¹⁸ Vano hanko wakone ni miyaano ophiyera ohinase, nahakallallihane ni echikondi.

¹⁹ Mamunaka khaawo, ari wuulendoni woorekamella.

²⁰ Aakusa nthumba na makobiri nave anaahokollowe variyari va mweeri.”

²¹ Aamunyengelela wunchichi nave aamuwatihera ni mawaaye ookopa.

²² Vano musombooyo aamuthwara mutthiyanooyo wonanko mmo eng'ombe enayeelliiwa wawiiphiwa apaalle wonanko mmo muthu ookarangeya anamakelliweeye ni onyolo

²³ ophiyera nivaka nimuhomille ohapaaye. Annakhalla wonanko epallame enathamakella munikwekweni oohidduwella wi eneerokhwellamo.

²⁴ Vano anaaka, mukiiwellelle nave mwaapelle maaru mawu a muwano mwaka.

²⁵ Muhikuseye murima ni ettilla dda mutthiyana yooyo, muhihollowe moollikana ni meetellwaaye.

²⁶ Vallethi olliye annaakuha allopwana anchichi, athu awiiphihalleeye tti ooheerengeya.

²⁷ Enyumbaaye tti ettilla ya o ellapo ya ookhwa, yookitthella o ezipinda dda okhwa.