Miyambo 6 - Mawu a Mulluku

Ovelleella echikole

¹ Mwanaka, wamuvelleellella echikole mukhwaawo, wapangana omullivellella mulleto,

² wakoliwa ni mawu a muwano mwawo, waphariwa ni malonjezwaawo,

³ vano mwanaka wiivulluse vawi ori m'mattani mwa mukhwaawo, khawe wiiyevihe ni omukhupanyella.

⁴ Ohinakona apaalle okwindima.

⁵ Wiivulluse wonanko mphoyo apaalle epallame m'mattani mwa muthu oosaya.

⁶ We muthu oolesi, khawe woone enenelli nave wawehesese mmo eneerelliiwa wi okhalle ni ezeru.

⁷ Khenna mwene, oohoollella apaalle oolamulella.

⁸ Ennakhozekella yoochiiwa mwiillimweni ni ototella ddeko ddiwa enthawi yoohata.

⁹ We muthu oolesi, onaakonaatthi ddiiddo ophiyera niini? Onaarurumuwe niini?

¹⁰ Wallota wi kikone vang'ono, kikwindime, killuwe miwono vang'ono,

¹¹ vano ohoowa oneerewuuphwanya wonanko mullupaawiiya nave opaneya oneerewuuphara wonanko mullupaawiiya eezida ddakhoto.

¹² Muthu oohikhalla ni mutteko, oonanara, waaye tti woottha,

¹³ ollota ni miittho, ovarittha ni manyallo apaalle otthoonya ni eyaalla.

¹⁴ Erive enthawi anaganiza dda ekuku ni ddoonanara nave annavirellella waambiha ddoohoosa.

¹⁵ Sika vano moorurumusa millilli ddineerommorella nave aneerophoreya moohichiriheya.

¹⁶ Ddeko dditthanu ni emodda apaalle dditthanu ni piilli nnddo Apwiya eniitananiiwa nave ehiniiwananiiwana tti

¹⁷ miittho awiitukhulla, nllumi nawiisha, matta oowiipha athu oohilakwa,

¹⁸ murima wooganiza ddoonanara, manyallo othamakella weera ddoonanara,

¹⁹ mboni awoottha ni owoopaniha athu miru.

Ochenjeza dda oraruwa

²⁰ Mwanaka, sunga malangizo a attiittho, ohikhoote ddoohuddiha dda amaayo.

²¹ Ovitthe m'murimani mwawo nave oddiware munikohini mwawo.

²² Waaweetaka eneerekewuuhoollella, waakonaka eneerekewuuwehera nave waavenyaka eneerekewuullotiha.

²³ Vawi malamulo tti enyali, malangizo tti owala nave ohumullulla tti ettilla yookumi.

²⁴ Ddineerewuuteteza wa mutthiyana oonanara, awoollowa nllumi ni ooraruwa.

²⁵ Ohikuseyeke murima ni oreera waye, ohikopeyeke ni miitthwaaye.

²⁶ Hule anallivelliwa mwitthi mmodda wa buledi, mutthiyana ooraruwa annamoonongella mullopwana okumaaye.

²⁷ Ethiyo mullopwana ttuuvallella munllo vathirimani koma yoowaraaye ohisha?

²⁸ Apaalle ttuuweeta vamankhallani amunllo koma manyallo ohisha?

²⁹ Sika tti emoddamoddave yeeyo wa mullopwana oyo anakona ni mwaara a mukhwaaye. Khaavo muthu ahinaallakiwe amuttannyille mwaara a mukhwaaye.

³⁰ Mullupaawiiya khanavevulliwa iiya ekaamba yoopaalla ovona avolliwa ettalla.

³¹ Koma aphariwa aneerolliva otthanu ni opiilli iiyalleeyennddo naari ophiyera akullihalle ddittheddene ariiyena mpa mwaye.

³² Koma muthu ooraruwa khanna ezeru vawi aweera ddennddo anaddoononga yeekha.

³³ Aneerokhalla ni makhwata nave owulliwa muru waye oneerovirellella.

³⁴ Vawi ehache ennamushiha murima mamune nave khanakhalla ni ethakaraka voohokollosellani ddoonanara.

³⁵ Khaakhullella wi alliviwe nave khapepeseya naari waanjerere olliva.