Miyambo 5 - Mawu a Mulluku

Ochenjeza dda mutthiyana ooraruwa

¹ Mwanaka, iwesesa ezerwaaka, apella maaru o wiiwesesa waka.

² Vano oneerodduwella makhallello aphaama nave mawaawo eneerewooniha wi onnadduwella.

³ Eyano ya mutthiyana ooraruwa ennandonya enwi nave mawaaye enakhalla aphaama okhwaranya makhura.

⁴ Koma mamallihellwiiwa enakhalla oowaawa wonanko tthuukwi nave oovoreya wonanko nsupada nawiisha nngu ni nngu.

⁵ Manyallwaaye ennasusella wuukhwaani nave ettilla ddaye ddinnamuphiyiha o ellapo ya ookhwa.

⁶ Khanayipwatha ettilla yookumi naari vang'ono, misewu ddaye tti ddookhoromana koma khanadduwella.

⁷ Anaaka, kiiwellelleni nave muhitiwalle mawu a muwano mwaka.

⁸ Muhiyanihe ettilla ddanyu ni yaaye, muhaatamelle o mullako wa enyumbaaye

⁹ wi muhaakhihe olemwaanyu wa athu amodda ni miyakha ddanyu wa athu eekuku

¹⁰ apaalle muhaakhihe masivaanyu wa alleto wi muhiphare mutteko mpa mwa mulleto.

¹¹ Sika wi muhinlle omamallihello wa okumaawo, muhehe ni mwiillaanyu ddimanlle.

¹² Vawi oneerollota wi, “Kaambiiwa tini kiitanilleemi ni ollaka? Kaambiiwa tini murimaaka wavevullalliiwa ohumullulliwa?

¹³ Ngaawiiwellelle ahuddihaaka apaalle owaapella maaru alangizaaka.

¹⁴ Kahanlle vang'ono woonongeya vamiitthoni va mutthukumano.”

¹⁵ Owiryeke maaddi a mwiihimeni mwawo ni a mu neetuutwaawo.

¹⁶ Ethiyo neetuutwaawo amwareyelle virive veko ni mitthipidda dda maaddi m'misewuni?

¹⁷ Akhalle a weekha oohikhalla a alleto ookhalla ni weyaano.

¹⁸ Adaliseye neetuutwaawo ni mwaariyo eesombwaawo.

¹⁹ Wonanko epaalla yookonda ni naahe eechisomo, mapellaaye yuukwakhwanelleke enthawi ddittheddene nave okoliwe ni echikondaaye moohihiyerera.

²⁰ Mwanaka, kaambiiwa tini okuseyeewe murima ni mutthiyana ooraruwa? Onakhupaarella mwawiidde ethirima ya mutthiyana oohikhalla aawo?

²¹ Vawi ettilla dda muthu ddiri vamiitthoni va Apwiya. Ennoonesesa misewu ddaye.

²² Ddoonanara dda muthu ddineeromuphara yeekha nave aneeromakiwa ni mikwe dda ochimwa waye.

²³ Aneerokhwa ekaamba yoorama mwambo nave aneerohollowa ekaamba ya okarangeya waye wunchichi.