Miyambo 4 - Mawu a Mulluku

Mphuro wa ezeru

¹ Nyu anamwani, mwiiwellelleke malangizo a attiitthaanyu, mwaapelleke maaru wi muphwanye wiiwesesa.

² Kinnuuhuddihani phaama nave muhihiye malangizwaaka.

³ Kaariimi mwaana mpa mwa attiitthaaka, kaariimi mwaana mmoddave a vamurimani va amoowaaka,

⁴ attiitthaakaayo yaakihuddiha mawu awi, “Osunge m'murimani mwawo malangizwaaka nave ovitthe malamulwaaka wi okhalle ni okumi.

⁵ Phwanya ezeru ni wiiwesesa. Ohitiwalle nave ohihiye mawu avayanoni vaka.

⁶ Ohinahiya ezeru vawi eneerewuusunga, oyikondeke nave eneerewuuteteza.

⁷ Ezeru tti yoopambana sika phwanya ezeru nave erive ello onapaalleewe ophwanya, phwanya wiiwesesa

⁸ Oyiriihe nave eneerewuuwelliha. Oyikhupaarelle nave eneerewuuvaha eyuuma.

⁹ Eneerewuuwariha enduwira ya echisomo ni korona* ooreera.”

¹⁰ Mwanaka, apella maaru nave akhella mawaaka sika miyakha dda okumaawo ddineerewaata.

¹¹ Kohuuhuddiha ettilla ya ezeru, kohuuhoollella mu meetello oolungama.

¹² Waaweetaka manyallwaawo kheyoopanaka nave waathamakaka khokwakwatuwaka.

¹³ Sunga nave avitthe malangizwaaka, ohinaahiya vawi tti okumaawo.

¹⁴ Ohivollowe mu ettilla dda athu oochimwa nave oheeteke mu musewu wa oonanara.

¹⁵ Oyirapelle, ohiviremo, oyilambalale nave oyikhwaranye.

¹⁶ Vawi khenakona ophiyera yeerille ello yoonanara. Ekhove kheddinawa ophiyera emukwakwatuwihalle mmodda.

¹⁷ Weera ddoonanara sika ocha wiwa, echiwawa sika owirya wiwa.

¹⁸ Koma ettilla ya athu oolungama tti wonanko owala wa ohinase nko onaanjerereya vang'ono vang'ono ophiyera otthaana.

¹⁹ Ettilla ya athu oonanara tti wonanko epiphi yawoopiha. Khenadduwella yaakwakwatullalle.

²⁰ Mwanaka, iwellella mawaaka, apella maaru ddoollota ddaka.

²¹ Ddihivenyemo m'mwiitthoni mwawo, oddisungeke phaama m'murimani mwawo.

²² Tti okumi wa oyo addiphwanyille nave ddinnachiriha mwiillaaye muttheene.

²³ Wehera murimaawo okhwaranya ddittheddene oriiwena vawi okumaawo okonne mwemmo.

²⁴ Ohiniishaka vayanoni nave ohilloteke ddoohollosa.

²⁵ Miitthwaawo eweheke muhoollo, ehiweheke mukhwipi.

²⁶ Opwatheke meetello a manyallwaawo wi ettilla ddawo ddittheddene ddikhalle ddoohikayikiha.

²⁷ Ohihapuwelle o nnattanatta apaalle wuunyotthoni, susa nnyallo nawo ohiya ddoonanara.