Miyambo 31 - Mawu a Mulluku

Malangizo wa mwene

¹ Mawu a Lemuwele mwene a o Masa, ayo amennya yamuhuddihalliiwa tti awi,

² “Tti tini mwanaka? Tti tini mwaana a m'mirimani mwaka? Tti tini mwaana a ollupella waka?

³ Ohimallelle masivaawo va atthiyana naari weeta mu ettilla yoowoononga mamwene.

⁴ We Lemuwele, mamwene ehimuwiryeke vinyo apaalle enduna opaalla yoowirya yoowalli,

⁵ wi ehitiwalle malamulo ni oweeruza athu oohoosiwa mookhoromaniha.

⁶ Omuvaheke yoowirya yoowalli muthu oyo ari vakhuviru okhwa nave vinyo wa oyo ari mu ddookatamiha ddawoopiha.

⁷ Ahiye ewirye, etiwalle ohoowa wiwa, ehuupuwellettho yookatamihiiwa.”

⁸ “Hulla vayanoni vawo omullotelle oohillota ni ddittheddene ddawaaphwanella oohiyiwa.

⁹ Hulla vayanoni vawo weeruze moolungama, waallotelle oohoowa ni oopaneya.”

Mutthiyana aphaama

¹⁰ Ethiyo ttaani anamphwanye mutthiyana aphaama? Tti ookhwaranya malluku oowallamella mutengo?

¹¹ Mamune annamuroromella nave khanarama mphuro.

¹² Mutthiyanooyo annamweerella ddaphaama, woohikhalla ddoonanara mallapo mattheene a okumaaye.

¹³ Annaashaasha obweya ni nthoche, annaphara mutteko ni mattaaye mwamurendelle.

¹⁴ Tti wonanko esitima dda athu amalonda, anakusa ddoocha ddaye wuuteete.

¹⁵ Annavenya waayaaka ni osa, anakhozella nibanja naye yoocha, anaakawella yaweera allupa muttekwaaye aatthiyana.

¹⁶ Annaganizera dda emata, annayikulla nave annaalla emata yampesa ni makobiri a m'mattani mwaye.

¹⁷ Annallipihella nave khanna olesi voopharani mutteko.

¹⁸ Annadduwella wi ddookulliha ddaye tti ddoopinduliha sika enyalaaye khenathiima mahiiyu.

¹⁹ Annalluwa nthoche ni opanga yeekha ekuwo.

²⁰ Annaattaphurusella matta athu oohoowa nave annaakavihera athu oopaneya.

²¹ Khanoova wi a munibanjani mwaye eneerokhwa ni nakhuttu vawi annadduwella wi attheenaayo ennawara ddooviha.

²² Anniipangella yeekha ddawiikhuneella nave annawara ddoowara ddabafuta ni ddooreera ddoofiira.

²³ Mamune annadduwanyeya va nthato akhalla variyari va attekweene a ellapo.

²⁴ Annasowa ddoowara ddabafuta anaddikulliha, annakullihattho mikhwamba wa athu malonda.

²⁵ Masiva ni olemu tti wonanko ddoowara ddaye. Annattheya moohoova ddamuhoollo.

²⁶ Annahulla vayanoni vaye ni ezeru nave olangiza weechifundo ori vanllumini vaye.

²⁷ Annawehera meetello a nibanja naye nave khanacha ddoocha dda olesi.

²⁸ Anaaye ennavenya enamuromolla olliye oodala nave mamunettho annamutthamalla voollotani wi,

²⁹ “Atthiyana anchichi aheera ddaphaama koma mohaakhwaranya attheenaayo.”

³⁰ Ekhove yookusa murima tti yoolleka, oreera wiwa khonallekella koma mutthiyana oowoova Apwiya sika anariihiwa.

³¹ Mumuriihe ekaamba ya ezipaso dda mattaaye nave mitteko ddaye ddimuvahe olemu onthatoni.