Miyambo 30 - Mawu a Mulluku

Mawu a Aguri

¹ Alla tti mawu a Aguri, mwaana a Yake a o Masa. Kohiitopiha, Mulluku, kohiitopiha, miyaano koomalla.

² Kookarangeya omukhwaranya muthu, nginna wiiwesesa wa muthu.

³ Nginahuddere ezeru, nginamudduwelle Aweelloolle.

⁴ Ttaani awenlle oddullu akitthawo? Ttaani akhunalleke ephevo? Ttaani amakilleke maaddi vakuwoni? Ttaani akeraatthihalle makomihello a ellapo yavatthi? Nnddina naye ttaani? Munnadduwella, mwanaye nnddina naye ttaani?

⁵ Mawu mattheene a Mulluku tti awoona. Olliye tti yootetezella ya ayo enathawella wa olliye.

⁶ Ohoonjerere ello va mawaaye, ttuuwuuhumullulla ni owooniha wi ori awoottha.

Miyambo ddimodda

⁷ Kinuuvekani ddeko piilli, muhikiimane ddennddo kihinakhwe.

⁸ Mukivenyihellevo ddawoottha ni ddoolleka. Muhikivahe ohoowa apaalle eyuuma koma mukivahe yoocha yookwakhwanella.

⁹ Kinoova wi kavona Kineerewuukhootani voollotani wi, “Apwiya ttaani?” Apaalle kahoowa kineerewiiya ni oripiha nnddina na Mullukwaaka.

¹⁰ Ohimootthera kaporo wa apwinnya wi ahuutembelele ni ophwanyeya oolakwa.

¹¹ Vookhalla amodda oowaatembelela attiitthiiwa, woohaadalisa ameewa.

¹² Vookhalla amodda enaddeesa aweella koma khenavenyihe ddoonanara ddiwa.

¹³ Vookhalla amodda awiitukhulla, ooddeesa aphaama wunchichi.

¹⁴ Vookhalla amodda miinwiiwa tti wonanko nsupada apaalle mpeni wi yaattakhune oohoowa waavenyiha va ellapo yavatthi, oopaneya variyari va akhwiiwa.

¹⁵ Muttunddu wookhalla ni anamwani aatthiyana eelli enallota wi, “Nivaheni, nivaheni.” Vookhalla ddiraru ddihinavona, ddisese nnddo ddihinakwakhwanihiwa monga

¹⁶ mahame, mutthiyana oohiyara, ethaya yoohirupelliwa murimu, munllo woohithiimiheya.

¹⁷ Niittho nowaattheya attiitthinnya ni ovevulla owiiwellella amennya, anakhuku a mutapo eneeronitthorokolla nave miphangwi ddineeronicha.

¹⁸ Vookhalla ddiraru nnddo ddikimallihalle ezeru naari ddisese kihinaddiiweseseemi monga

¹⁹ ettilla ya mpungu muddullu, ya enowa vanllukuni, ya ekallawa va enyanja, ya mullopwana ni namwalli.

²⁰ Mmu sika mutthiyana ooraruwa aneerelleeye, acha annavutta owanoni allota wi, “Kheyiivo yoonanara keerilleemi.”

²¹ Vookhalla ddiraru nnddo ddinatthukumelliha ellapo, ddeko ddisese nnddo ellapo ehinaworaniiwa ovillella monga

²² kaporo akhalla mwene, muthu ookarangeya avona yoocha.

²³ Mutthiyana awiitiwa atthelliwa, mullupa mutteko aamutthiyana avollowa munipuroni mwa pwinnya aamutthiyana.

²⁴ Vookhalla ddisese dding'onong'ono nnddo ddiri ddoochenjera wunchichi monga

²⁵ enenelli, tti mutundu woohillipa koma ddinnatotella yoochiiwa mwiillimweni,

²⁶ epilla, tti mutundu woohikhalla ni masiva koma ddinnamaka mookhalla mwiwa m'mallukuni,

²⁷ nazombe, khanna mwene koma aneeta m'millokoni,

²⁸ neekwangwa, ttuumuphareella m'mattani koma anakhalla mu enyumba dda mamwene.

²⁹ Vookhalla ddiraru apaalle ddisese ddineeta mookotella monga

³⁰ mukango, oyo ori wamasiva okhwaranya enama ddittheddene khonarapella erive ello,

³¹ mutthupi aweeta mwawiinyarulla, nankhoro apuri, mwene ookhalla ni akhotwaaye.

³² Wakarangeya vawiitukhullani apaalle vooganizellani ddoonanara, ophare vayanoni.

³³ Vookhuruwellani mukaka makhura enneekeya nave wayiphwinya ephuna minokella ddinnakhuma nave wallipihella okangana ekhoto ennaambeya.