Miyambo 3 - Mawu a Mulluku

Malangizo wa anamwani

¹ Mwanaka, ohinatiwalla malangizwaaka, osungeke malamulwaaka m'murimani mwawo.

² Vawi eneerowoonjerera mallapo manchichi nave oneerokhalla ni miyakha ddinchichi ni murendelle.

³ Ohihiye echifundo ni ororomelleya nave oware munikohini mwawo ni oddilemba m'murimani mwawo.

⁴ Sika oneerekokondiwa ni Mulluku ni athu.

⁵ Aroromelle Apwiya ni murimaawo muttheene. Ohinaroromellaka nnddo onaganizeewe wi onnadduwella.

⁶ Owaakhullelleke Apwiya mu erive ello nave eneerewookolla ettilla ddawo.

⁷ Ohinaddoonaka wonanko muthu eezeru koma owooveke Apwiya nave ohiye ddoonanara.

⁸ Nndda ddineerovaha mwiillaawo okumi waphaama, ddineerollipiha makhuvaawo.

⁹ Waatitimiheke Apwiya ni eyuumaawo ettheene ni ddoohata ddawo ddawaamba.

¹⁰ Vano ekhokwe ddawo ddineeroddalla ni ddeko ddinchichi, mino ddawo ddineerosefukella ni vinyo.

¹¹ Mwanaka ohinavevullaka ollaka wa Apwiya naari otopa ni ohumullulla wiwa.

¹² Apwiya ennamullaka oyo enamukondiiwa monga attiitthi eneerelliiwa ni mwaniwa oyo enamukondiiwa.

¹³ Oodala tti muthu oyo aphwanyille ezeru, oyo aakhenlle wiiwesesa ddeko.

¹⁴ Ezeru tti ddoopinduliha omukhwaranya siliva nave tti dda mphuro omukhwaranyattho golide.

¹⁵ Mutengo wa ezeru tti wookhwaranya malluku oowallamella mutengo. Kheyiivo eyo onaayipaalleewe enaphwanaphwaniiwana.

¹⁶ Okumi woorekama ori o nnattanatta waye, eyuuma ni oriiheya wuunyotthoni waye.

¹⁷ Ezeru eneeroweeriha okumaawo ohakallalla nave eneerekoweetiha mwamurendelle.

¹⁸ Tti muteekho wa okumi wa ayo enayikhupaarella nave tti yoohakallalliha wa ayo enayipharesesa.

¹⁹ Ni ezeru Apwiya yaaphatusa ellapo yavatthi nave ni wiiwesesa yaakeraatthiha oddullu.

²⁰ Ezerwiiwa enneetiha mihinje nave enneeriha mirapo omurupiha murimu.

²¹ Mwanaka, oyisunge ezeru m'murimani mwawo nave oganizeke phaama, ehuuthawe vamiitthoni vawo.

²² Eneerewuuvaha okumi nave eneerokhalla wonanko ogufu munikohini mwawo.

²³ Vano oneerekeweeta mu ettilla ddawo moohoova nave nnyallo nawo khanikwakwatuwaka.

²⁴ Waakeraatthiki khawoovaka, waakonaka oneerekokhalla ni ekhove ddaphaama.

²⁵ Ohinoovaka ddawoopiha nnddo ddinawa moorurumusa apaalle otulli wowaamorella athu oonanara.

²⁶ Apwiya sika enaakhalle eroromellwaawo, eneerosunga nnyallo nawo wi nihaange.

²⁷ Ohinahiya oweerella ddaphaama athu oophwanella orina masiva aweerella.

²⁸ Ohinamulleella mukhwaawo wi, “Rowa, ohokollowe osiisello nave kineerewuuvaha,” koma orina ello.

²⁹ Ohinamweerella echiwembu mukhwaawo awaatamanana enyumba oyo anuuroromella.

³⁰ Ohinakanganaka ni muthu vihiri ekaamba, ahuulakwenlle.

³¹ Ohinamukhallellaka ehache muthu eekuku apaalle omuttakiha meetellwaaye.

³² Apwiya ennananariwa ni muthu oonanara koma ennaattana ni oolungama.

³³ Apwiya ennatembelela enyumba ya muthu oonanara koma ennadalisa mookhalla oolungama.

³⁴ Alliwa ennaavevulla athu oovevulla koma annaweerella echifundo athu awiiyeviha.

³⁵ Athu eezeru eneerovahiwa olemu koma ookarangeya eneerowullihiwa muru.