Miyambo 29 - Mawu a Mulluku

¹ Awummiha nikohi ahumullulliwe aneerewoonongeya moorurumusa kheyiivo enaamuchirihe.

² Athu oolungama yakhalla vampandoni athu ennahakallalla koma oonanara aalamulellaka athu enniipullella.

³ Ookonda ezeru annaahakallalliha attiitthinnya koma anathaanana ni atthiyana ooraruwa annoononga eyuuma.

⁴ Mwene aweeruza moolungama annallipiha ellapwaaye koma ootthukumaniha emphaso annayoononga.

⁵ Muthu anamulleka mukhwaaye mwawoollowa anamureya nikwekwe.

⁶ Muthu oochimwa annakoliwa ni machimwaaye koma oolungama anniipa ni ohakallalla.

⁷ Muthu oolungama annadduwella ddoophwanella oohoowa koma oonanara khanna ezeru ddennddo.

⁸ Athu oovevulla ttuuhella munllo muzinda koma athu eezeru ennakhurumusa owalli.

⁹ Muthu eezeru aavaanyihanaka ni muthu ookarangeya, ookarangeyooyo annatokollolla, attheyaka nave khavinakhalla murendelle.

¹⁰ Muthu awiipha anniitana ni muthu oohilakwa koma ooreera murima annapwatha okumaaye.

¹¹ Muthu ookarangeya annooniha osha murima waye otthewene koma eezeru annawuphara murima.

¹² Oolamulella aawiiwellellaka ddawoottha enduna ddaye ddittheddene ddinnakhalla ddoonanara.

¹³ Oohoowa ni oomunyingallella ennaphwanaphwana vawi Apwiya sika yaavahille miittho eelliinaayo.

¹⁴ Mwene aaweeruzaka phaama athu oohoowa, omwenaaye onnakeraattheya wa enthawi yoorekama.

¹⁵ Muwashullo ni ohumullulla onnavaha ezeru koma mwaana ookotihiwa annaawulliha muru amennya.

¹⁶ Yaata oonanara ddoolakwa ddinnanjerereya koma oolungama eneerewoona omora wiwa.

¹⁷ Omullakeke mwanawo nave aneerowiithuuwiha ni ohakallalliha okumaawo.

¹⁸ Nko ohiri ollotella athu khenookollelleya koma oodaliseya tti oyo anasunga malamulo.

¹⁹ Mawuve khenakwakhwanella omullakella mullupa mutteko vawi naari aadduwellaka khaakhullella.

²⁰ Ethiyo onnamoona muthu awaakuva ollota? Muthu ookarangeya ttuukhalla ni etiyerello omukhwaranya olliye.

²¹ Waaddollweelliha waavaha erive ello allupa muttekwaawo ovenyera enamwaniiwa, mamallihellwiiwa eneeroddeesa mwanawo oomuyara.

²² Muthu oosha murima mwawaakuva annaambiha okangana nave oowalli annaanjera ddoolakwa.

²³ Wiitukhulla onnamuyeviha muthu koma a murima wawiiyeviha annariihiwa.

²⁴ Muthu awaattana ni mullupaawiiya aniita okumaaye, annallupella koma khanawulula.

²⁵ Omoova muthu tti wonanko wiireya musampha koma oyo anaaroromella Apwiya aneerovulluwa.

²⁶ Athu anchichi ennaashaasha waattana ni oolamulella koma echilungamo ya muthu enavenyera wa Apwiya.

²⁷ Muthu oonanara annaananara oolungama nave awookolla ettillaaye annaananara oochimwa.