Miyambo 28 - Mawu a Mulluku

¹ Muthu oonanara annathawa ahiivo anawiikariha koma oolungama annallipa murima wonanko mukango.

² Ellapo yachimwa oolamulella ennaata koma athu yakhalla awiiwesesa ni oodduwella ennakhalla wa enthawi yoorekama.

³ Muthu oohoowa aawaanyingallellaka oohoowa akhwaaye tti wonanko murimu awoononga oyo anakwekweresa ddoohata.

⁴ Oyo ahiniiwellella malamulo annaatthamalla athu oonanara koma oosunga malamulo annakanganana.

⁵ Athu oonanara kheniiwesesa echiweruzo koma ayo enawaashaasha Apwiya enniiwesesa wunchichi.

⁶ Oohoowa oororomelleya annamukhwaranya eeyuuma ookhoromaniha ettilla ddaye.

⁷ Oosunga malamulo tti mwaana eezeru koma mukhwiiwa a oottutthuwa annaawulliha muru attiitthinnya.

⁸ Oyo anaanjerera eyuumaaye voowoonjererani makobiri vaddullu va ekongoli, anamuukellella muthu anaweerella echifundo oohoowa.

⁹ Oyo anakhoota wiiwellella malamulo mavekellwaaye ennamunanara Mulluku.

¹⁰ Oyo anaahollosa athu oolungama wi ethwareke ettilla yoonanara aneeromorella mu nlliti naye koma athu oohilakwa eneerohallana yaphaama.

¹¹ Muthu eeyuuma annaddeesa eezeru koma oohoowa oyo ari awiiwesesa aneeromudduwella phaama wi khanna ezeru.

¹² Athu oolungama yapambana vinnakhalla ntitimiho nuullupalli koma oonanara yavenya athu enniipittha.

¹³ Muthu oovittha machimwaaye khakhalla ni ekari koma oowaakhullella ni waahiya aneereweerelliwa echifundo.

¹⁴ Oodalisiwa tti oyo anavirellella owoova Apwiya koma awummiha murimaaye aneeromorella mu ddookatamiha.

¹⁵ Wonanko mukango woothuruma ni echimbalangondo enapaalla ophara enama emoddamoddave yeeyo mwene oonanara annaalamulella oohoowa.

¹⁶ Oolamulella oohiiwesesa annanyingallella mweekuku koma awiitana ni opindula woonanara annarekamiha mallapwaaye.

¹⁷ Muthu oyo ari ni mullatu woomwiipha mukhwaaye akhalle oothawathawa ophiyera okhwa waye nave vihikhalle oomukavihera.

¹⁸ Oyo aneeta moororomelleya eneerovulluwa koma oyo anakhoromaniha meetellwaaye aneerewiikuha.

¹⁹ Ddoocha ddinnamukwakhwanella oollima emata ddaye koma awaathwara athu oohikhalla ni mutteko aneerohoowesesa.

²⁰ Muthu oororomelleya aneerokhalla ni madaliso manchichi koma oothamakella eyuuma aneerollakiwa.

²¹ Ntthoollo khe naphaama koma enthawi emodda muthu annooniha okondella ekaamba ya mwanabuledi.

²² Muthu anrima annapaalla okhalla ni eyuuma mwawaakuva oohidduwella wi ohoowa oneeromumorella.

²³ Oyo anamuhumullulla muthu mmodda omamallihellwiiwa aneeromukonda wunchichi okhwaranya oyo ari ni nllumi nawoollowa.

²⁴ Oyo anawiiyera attiitthinnya apaalle amennya anallota wi wenko khe olakwa anaphwanaphwana ni muthu awoononga.

²⁵ Muthu anrima annaambiha okangana koma owaaroromella Apwiya aneerokhalla ni eyuuma.

²⁶ Muthu anaroromella maganizwaayeve tti ookarangeya koma aweeta mweezeru aneerovulluwa.

²⁷ Owaavaha oohoowa khawa arama ello koma oyo ookhuneella miitthwaaye aneerotembeleliwa wunchichi.

²⁸ Athu oonanara yavenya athu enniipittha koma yoonongeya oolungama ennaata.