Miyambo 27 - Mawu a Mulluku

¹ Ohikotelleke ddoosiisello vawi khonadduwella nllapo nimoddanno ninaaphatuse tini?

² Muhiye muthu mmodda uutthamalle ohiri eyanwaawo. Muhiye mulleto uuriihe ohiri weekhaawo.

³ Nlluku tti noollemella, mihava tti ddoollemellettho koma ottatthamulla wa muthu ookarangeya tti woollemella okhwaranya ddittheddenndda.

⁴ Osha murima onnawiiha ekuku nave onanariwa onnasefukella koma ehache ennattepa onanara okhwaranya ddittheddenenndda.

⁵ Ohumullulla vaweella onnakhwaranya echikondi yawiipittheya.

⁶ Mukhwaawo naari uuvoreye tti oororomelleya koma mudanaawo naari uukhupaarelle animuulleka.

⁷ Wavona onnakhoota enwi koma wavolliwa naari yoocha yoowaawa ennanang'aneya.

⁸ Muthu oyo ahollowelle wuuteete tti wonanko epallame eyo ehollowille orekamellana ni emphurwiiwa.

⁹ Makhura ni ddawunkhella ddinnahakallalliha murima koma ophaama wa mukhwaawo okonne va malangizwaaye.

¹⁰ Ohimuhiye mukhwaawo nave mukhwiiwa a attiittho. Ohiyeeke wa mbalaawo wakhalla mu ddookatamiha. Mukhwaawo oyo oriiwena vakhuviru annamukhwaranya mbalaawo oyo ari woorekama.

¹¹ Mwanaka, khalla ni ezeru ni ohakallalliha murimaaka wi kimwaakhulle mmodda aakivevullaka.

¹² Muthu oochenjera oona ello yawoopiha anniipittha koma eenamwani annayithwara ophiyera annallivihiwa.

¹³ Muthu amuvelleellella echikole mulleto omwaakheke mukanjwaaye. Omuphare oomuvelleellella echikole mutthiyana eelleto.

¹⁴ Oomuvaha mukhwaaye mooni mookhuwa ohinase aneereweesiwa ootembelela.

¹⁵ Mutthiyana ootokollolla tti wonanko ondonyandonya wa murimu.

¹⁶ Omuhiiha mutthiyana awi ddiiddo tti wonanko weesa ohiiha ephevo apaalle okhuna makhura ni nnattanatta.

¹⁷ Mmo mukoko onaanduselliiwa mukoko mukhwiiwa emoddamoddave yeeyo muthu anahuddera ovenyera wa mukhwaaye.

¹⁸ Oyo anawehera muteekho wanamukuyu aneerocha ezipaso ddiwa. Oyo anaapwatha apwinnya aneerovahiwa olemu.

¹⁹ Wonanko ekhove enooneyelliiwa m'maaddini, tti mmo munadduwanyeyella murima wa muthu.

²⁰ O ellapo ya ookhwa ni woonongeya khonavona nave miittho a muthu khenavona.

²¹ Siliva aneekiwa mwiipallini nave golide ni mu munllo wawoopiha emoddamoddave yeeyo muthu aneesiwa ni epillaaye.

²² Naari mumutthitte ni mwitthi mwiirawini muthu ookarangeya vamodda ni eddoro, okarangeya waye khotthitteya.

²³ Odduwelle owehera phaama enkhosa ddawo nave oddichiheke phaama eziweto ddawo.

²⁴ Eyuuma khenallekella omalla nave mibado kheddinallekellattho omalla.

²⁵ Manasi yamalla nave munyepu wamella, makukhu a omwaangoni yaatthukumanihiwa,

²⁶ enkhosa ddawo ddineerewuuvaha ddoowara nave anankhoro a epuri eneerewuukullella emata.

²⁷ Mukaka wa epuri oneerewuukwakhwanella ocha ni nibanja nawo owaaka allupa muttekwaawo aatthiyana.