Miyambo 26 - Mawu a Mulluku

¹ Ovelleella olemu wa muthu ookarangeya tti wonanko nakhuttu mu ellimwe apaalle orupa wa murimu mu enthawi yoohata.

² Wonanko emphera yaawaapheellaka apaalle neenkhaare aavavaka emoddamoddave yeeyo tembelelo khaninammorella muthu oohiphwanellella.

³ Ekopo tti yoomuwashullella kavalo nave mukoko tti wa muwano mwa bulu emoddamoddave yeeyo muwashullo vamutthanani va muthu ookarangeya.

⁴ Ohinamwaakhullaka muthu ookarangeya moollikana okarangeya waye vawi khavikhalla ohiyana.

⁵ Omwaakhulleke muthu ookarangeya moollikana ni okarangeya waye wi ahiddeese eezeru.

⁶ Muthu oyo anarumiha othenga oweella mwa muthu ookarangeya anaphadda nnyallo naye nave aniivaritthella mankhalla.

⁷ Wonanko meto dda muthu ooheeta ddihinakhallelliiwa ni mutteko emoddamoddave yeeyo mwambi muwano mwa ookarangeya.

⁸ Ovelleella olemu wa muthu ookarangeya tti wonanko omaka nlluku mulegenini.

⁹ Wonanko mwiiwa onahomelliiwa nnatta na muthu oolezela emoddamoddave yeeyo mwambi muwano mwa ookarangeya.

¹⁰ Oyo anamulemba mutteko muthu ookarangeya aweeteeta apaalle oolezela tti wonanko muthu oyo anavokha mpaamba anamuhoma arive muthu.

¹¹ Ookarangeya oyo anaakullella ddookarangeya tti wonanko mwanapwa oyo anahokollweella acha nnddo arapheyilleeye.

¹² Ethiyo woomoona muthu oyo anaddeesa eezeru? Muthu ookarangeya ookhalla etiyerello omukhwaranya yooyo.

¹³ Muthu oolesi anallota wi, “Vookhalla mukango vaatte, oneeta m'musewuni!”

¹⁴ Mmo nchiwi ninakakhelliwiiwa nngu ni nngu tti mwemmo aneerella muthu oolesi vabedini vaye.

¹⁵ Muthu oolesi ahiya nnatta naye m'mbaleni annatopa wi aniphiyihe owanoni.

¹⁶ Muthu oolesi annaddeesa eezeru okhwaranya athu atthanu ni eelli ayo enawora waakhulla moodduwella.

¹⁷ Muthu oyo anavollweella ekhoto yaaneena tti wonanko oyo anamuphara naaru mwanapwa aweeteeta.

¹⁸ Wonanko aneerella mullupa anepa ovokha mitthiko, mipaamba ni okhwa,

¹⁹ tti mmo aneerella muthu oyo anamulleka mukhwaaye annallota wi, “Kinimasellulla.”

²⁰ Vaahikhalla ekhuni munllo onnathiima nave vaahikhalla anamullota okangana khonavirellella.

²¹ Wonanko eneerella mankhalla vamunlloni ni ekhuni viikho tti muthu anamullota annaambiha okangana.

²² Mawu a nawunawu tti wonanko ddoocha ddooddiva, ddookitthella m'mirimani.

²³ Eyano yawoollowa ni murima woonanara tti wonanko embale yathaya yoomariwa otooto wa siliva.

²⁴ Muthu oomwiita mukhwaaye eyanwaaye ennoollowa koma m'murimani mwaye annuukella ddoolleka.

²⁵ Aaddivihaka mawaaye ohimuroromelle vawi m'murimani mwaye mooddalla ddoonanara khumi ni piilli.

²⁶ Naari iipitthihaka olleka waye moochenjera onanara murima waye oneerodduwanyeya vaweella.

²⁷ Oyo anakata nlliti anaamorellemo yeekha nave oyo anaphikirisa nlluku ninamphitte yeekha.

²⁸ Muthu awoollowa nllumi annamwiita oyo anamuhooseeye nave muwano mwawoollowa munnoononga.