Miyambo 25 - Mawu a Mulluku

Miyambo ddimodda dda Solomoni

¹ Nnddattho tti miyambo ddimodda dda Solomoni nnddo ddalembiwe ni athu a Hezekiya mwene a o Yuda.

² Ntitimiho na Mulluku tti ovittha ddeko koma oriiheya wa mwene waashaasha ddeko.

³ Moollikana ni mmo murekamellelle muddullu nave viwallamellelle vatthi emoddamoddave yeeyo murima wa mwene khonaashaasheya.

⁴ Muvenyihe ddooripiha dda siliva nave eeruso ttuuhana ello yooreera.

⁵ Mumvenyihe muthu oonanara vamiitthoni va mwene nave mpandwaaye oneerokeraattheya va echilungamo.

⁶ Ohinaddoonaka oopaalleya vamiitthoni va mwene apaalle okeraatthi va nipuro na athu oopaalleya.

⁷ Tti waphaama olleelliwa wi okeraatthi voowella okhwaranya okitthihiwa vamiitthoni va enduna. Nnddo woonilleewe,

⁸ ohinathamakellaka osuma o nthato namillatu vawi onaaweere tini muhoollo mukhwaawo uuwulliha muru va wuuvaanyiha?

⁹ Mwakambirana ni mukhwaawo mullatwaanyu ohinawululaka ddoovittheya dda muthu mmodda

¹⁰ wi awiiwa aneerewuuwulliha muru nave epillaawo yoonanara khewa emalla.

¹¹ Mawu oollotiwa phaama tti wonanko yooreera ya golide mu echipangizo ya siliva.

¹² Wa muthu awaapella maaru, ohumullulla weezeru tti wonanko endolo ya golide apaalle erive ello yawiireerihella ya golide.

¹³ Wonanko nakhuttu mu ellimwe, amithenga oororomelleya wa oyo amurumalle, annariiryiha murima wa apwinnya.

¹⁴ Athu ayo enalonjeza koma ehinakwakhwaniha tti wonanko mirapo ni ephevo nnddo ddihinamurupiha murimu.

¹⁵ Ovillella sika onamugonjiha oolamulella nave woollowa muwano onnakhurumusa ddookatamiha.

¹⁶ Wayiphwanya enwi oyicheke yookwakhwanella wi ehuuhapalle nave ehuurapheyihe.

¹⁷ Ohinaphiyaka wa mukhwaawo wiilliwiilli wi ohimuhapalle ni owiita.

¹⁸ Muthu oyo anavelleella omboni wawoottha wa mukhwaaye tti wonanko ekoonda, nsupada apaalle mpaamba wootthokowa.

¹⁹ Omuroromella muthu oohiroromelleya mu enthawi ya ddookatamiha tti wonanko niino noovoreya apaalle nnyallo nookurukunyuwa.

²⁰ Omwiipella nchipo muthu oyo anamoriwa ethakaraka tti wonanko omurulla ddoowara mu enthawi yooriirya apaalle omuhella mwiinyu vanikhwatani.

²¹ Adanaawo yavolliwa ettalla, waavahe yoocha, yavolliwa nthona waavahe yoowirya

²² vawi vaweerani yeeyo oneerowuukella mankhalla amunllo vamuru viwa. Nave Apwiya eneerewuuthuva.

²³ Wonanko ephevo yoompoto enawiihelliiwa murimu awoononga emoddamoddave nllumi namiseche ninashihelliiwa murima.

²⁴ Tti waphaama okhalla vaatte vaddullu va enyumba okhwaranya okhalla mpa ni mutthiyana ootokollolla.

²⁵ Othenga waphaama woovenyera wuuteete tti wonanko maaddi ooriirya wa muthu oovolliwa nthona.

²⁶ Muthu oolungama amugonjella muthu oonanara tti wonanko neetuutu unttuwanyeriwe apaalle ehime ehelliwe nttipwi.

²⁷ Khe waphaama ocha enwi yinchichi sika muchenjere ni otetheelliwa.

²⁸ Muthu oohiihiiha tti wonanko muzinda wookumulliwa, woohikhalla ni mpanda.