Miyambo 24 - Mawu a Mulluku

¹ Ohaakhallelle ehache athu oonanara naari opaalla okhalla ni alliwa

² vawi mirima ddiwa ddinnaganizera ddoowukila nave eyano ddiwa ddinnallota ddeekuku.

³ Ezeru ennamakiha enyumba, wiiwesesa onnakeraatthiha.

⁴ Odduwella annaddalliha ezipinda ddaye ni eyuuma yoowallamella mutengo.

⁵ Muthu eezeru annakhalla ni masiva okhwaranya amasiva nave oodduwella annamukhwaranya muthu amasiva.

⁶ Voohoollelliwani ni Ezeru muthu annapambana ekhoto, oolangiza yaata annagonjiha.

⁷ Ezeru ennamurekamella ookarangeya nave khanakhalla ni yoollota vanthatoni.

⁸ Muthu oyo anaganizella weera yoonanara aneereweeriwa oowoopaniha miru athu.

⁹ Maganizo ookarangeya tti nichimo nave muthu oovevulla annaananara athu.

¹⁰ Wafooka nllapo na otulli masivaawo ennayeva.

¹¹ Ohinaselliwa waavullusa ayo eri vakhuviru wiiphiwa. Waakihere ayo enakwakwatuwella wawiiphiwa.

¹² Ohillote wi, “Ngoonani, khenaayidduwella.” Ethiyo aweesa mirima khanaddidduwella ddenndda? Ethiyo oosunga okumaawo khanaddidduwella? Ethiyo khanamuhokollosella muthu moollikana ni meerellwaaye?

¹³ Mwanaka, ocheke enwi vawi tti yaphaama nave maaddi oondonya vamakallaphani tti oonang'aneya waallawiha.

¹⁴ Odduwellettho wi ezeru tti yawi ddiiddo va okumaawo. Wayiphwanya, oneerokhalla ni muhoollo mwaphaama nave etiyerellwaawo khelepheleya.

¹⁵ We muthu oonanara, ohiipitthelle nipuro na oolungama, ohitthanyulle vawiithuuwella vaye.

¹⁶ Vawi muthu oolungama anniikuha otthanu ni opiilli anavenya koma muthu oonanara anakhumuwa otulli wammorella.

¹⁷ Ohihakallalleke mudanaawo iikuha nave murimaawo ohithapelleke akwakwatuwa.

¹⁸ Apwiya ttuuwoona ni ohihakallallana sika ttuuhiya omunanariwella.

¹⁹ Ddihuuvoreye ekaamba ya athu oochimwa apaalle waakhallella ehache athu oonanara.

²⁰ Vallethi muthu oonanara khaddinamweetella phaama muhoollo, okumi wa athu oonanara oneerothiima wonanko enyali.

²¹ Mwanaka, owooveke Apwiya ni mwene nave owiiwellelleke attheenaayo.

²² Yaalla ttuuwooniha otulli moorurumusa. Ttaani anadduwella woonongeya nko onaavenyere wa eellaalla?

²³ Alla tti malangizo mamodda a athu eezeru. Okondella vookamullani muthu khe ello yaphaama.

²⁴ Muthu oyo anallota wa oolakwa wi, “We kholakwille,” aneerotembeleliwa ni athu nave mitundu dda athu ddineeromwiita.

²⁵ Koma ayo enaahumullulla athu oonanara eneerotukhuwa ni odaliseya.

²⁶ Oyo anaakhulla phaama annooniha okondana.

²⁷ Okhoze mitteko ddawo ddittheddene dda omata vatulli viwa omakeke enyumbaawo.

²⁸ Ohinakhalla mboni oomuvaanyiha mukhwaawo vihiri ekaamba. Vayanoni vawo vihilloteko ddoolleka.

²⁹ Ohinallotaka wi, “Kineeromweerella moollikana ni mmo akeerelleeye, kineeromuhokollosella nnddo eerilleeye.”

³⁰ Kaheeta m'matani mwa muthu oolesi, emata yampesa ya muthu ookarangeya.

³¹ Ngoonani, virive veko vaamella miiwa, mutthemwene mwaamella manasi nave mpandiiwa wa malluku waakumuwa.

³² Koonilleemi ni oganizera, kaaweha ni waakhellavo malangizo.

³³ Wallota wi kikone vang'ono, kikwindime, killuwe miwono vang'ono,

³⁴ vano ohoowa oneerewuuphwanya wonanko mullupaawiiya nave opaneya oneerewuuphara wonanko mullupaawiiya eezida ddakhoto.