Miyambo 23 - Mawu a Mulluku

¹ Wakeraatthi onacha ni oolamulella, ohitiwalleke wi orivo ni aani.

² Nave wakhalla oottutthuwa ocheke mookhurumuwa.

³ Ohikhumbeke yoochaaye yaphaama vawi tti yoolleka.

⁴ Ohiitopihe ni waashaasha eyuuma, khalla eezeru wi wiihiihe.

⁵ Onawehella tini eyo ehiiwo? Vawi eyuuma ennamella muuphello wonanko mpungu onavava muddullu.

⁶ Ohiche yoocha ya muthu ooweha ni eserekulle naari osilila yoochaaye yaphaama.

⁷ Vawi anakhalla wonanko muthu anawiithanella yoochaaye wi, “Waawo oche ni owirya,” koma eeraka ni murima mmodda.

⁸ Oneerorapheya ethoko eyo onaacheewe ni omalla ddamuwano nivuddo.

⁹ Ohilloteke ddeezeru wa muthu ookarangeya vawi aneerovevulla mawaawo eezeru.

¹⁰ Ohisuse malire akhalle apaalle ovollowa muwari mwa emata ya akhwaadduni

¹¹ vawi oowoopolliiwa oollipa aneerowiimellella vamiitthoni vawo.

¹² Hiya murimaawo va malangizo nave apellaka maaru mawu eezeru.

¹³ Ohilepheleke omullaka mwaana vawi wamuwashulla ni ekopo khakhwa.

¹⁴ Wamuwashulla ni ekopo oneeromuvullusa wuukhwaani.

¹⁵ Mwanaka, wakhalla ni ezeru miyaano kineerohakallalla.

¹⁶ Murimaaka oneerohakallalla eyanwaawo yaallotaka ddaphaama.

¹⁷ Murimaawo ohaakhallelleke ehache athu oochimwa koma owooveke Apwiya nirive nllapo.

¹⁸ Vawi oneerothuviwa nave yootiyeraawo khelepheleya.

¹⁹ Mwanaka apella maaru nave khalla eezeru ni ohoollella murimaawo ettilla.

²⁰ Ohineetaka ni athu oolezela apaalle ni athu eekhwillu oottutthuwa.

²¹ Vawi athu oolezela apaalle eekhwillu aneerohoowa nave okwindima onnaawariha matapwata.

²² Owaapelleke maaru attiittho awuuyara, ohaavevulle amaayo yuulluvalla.

²³ Kulla yawoona, ezeru, malangizo ni wiiwesesa, ohiddikullihe.

²⁴ Attiitthinnya a muthu oolungama eneerothapella, oomuyara mwaana eezeru aneerohakallalla.

²⁵ Ahiye attiittho ni amaayo yuukotelle, amaayo awuuyara ethapelle.

²⁶ Mwanaka kaapelle maaru ni murimaawo muttheene nave miitthwaawo eweheseseke ettilla ddaka.

²⁷ Vawi mutthiyana ooraruwa tti nlliti noowallamella nave mutthiyana aweeteeta tti ehime yoophuraana.

²⁸ Annawiipitthella wonanko allupaawiiya nave annawoonjerera allopwana oohiroromelleya.

²⁹ Ttaani ari ni otulli? Ttaani anamoriwa ethakaraka? Ttaani anakhupanya? Ttaani anahomelliwa nivuddo? Ttaani anafiira m'mwiitthoni?

³⁰ Tti oyo anaselliwa mvo viri vinyo, oyo anamwaashaasha vinyo oottakanyihera.

³¹ Ohiweheke ofiira wa vinyo, aasaphullellaka mukapuni anawiryeya mwawoollowa.

³² Mamallihellwiiwa analluma wonanko enowa, anakovolla wonanko evilli.

³³ Miitthwaawo eneerekewoona ddeko ddeelleto nave oneerekollota ddookhoromana.

³⁴ Onaakhalle wonanko muthu oyo akonaatthille variyari va enyanja apaalle otthoka wa mulongoti wa ekallawa.

³⁵ Oneerollota wi, “Yaakuukutha koma ngaaphoreyille, yaakivadda koma ngaawoonille ovoreya. Kinaavenye enthawi tini? Kineerewaashaashattho yoowirya emodda.”