Miyambo 22 - Mawu a Mulluku

¹ Epilli yaphaama tti yoopaalleya okhwaranya eyuuma yinchichi, oweerella ddaphaama akhwaawo tti wookhwaranya Siliva ni golide.

² Eeyuuma ni oohoowa ennaphwanaphwana vawi attheene yaaphatusalle tti Apwiya.

³ Muthu oochenjera oona ello yawoopiha anniipittha koma eenamwani annayithwara ophiyera annallivihiwa.

⁴ Yoothuviwa ya wiiyeviha ni owoova Apwiya tti eyuuma, olemu ni okumi.

⁵ Miiwa ni misampha ddiri mu ettilla dda athu ookhoromana, waapaallaka okhalla ni okumi orekamellaneke ni yaayo.

⁶ Mwaana mumuhuddiheke ettilla yawi eetekemo sika naari uulluvanlle khawa ayihiya.

⁷ Athu eeyuuma ennaalamulella oohoowa nave oopolleya tti kaporo a oopolleyiha.

⁸ Oyo anaalla ohilungama anahata ddookatamiha, ekopo ya owallaaye eneerewunttakeya.

⁹ Oyo ari ni niittho neechifundo aneerodalisiwa vawi annaakawella yoochaaye oohoowa.

¹⁰ M'mwiikarihe muthu oovevulla nave okangana, ekhoto ni ovevullana oneeromalla.

¹¹ Oyo anakonda okhalla ni murima waweella ni ollota ddaphaama aneerokhalla mukhwaaye a mwene.

¹² Apwiya ennaapwatha oodduwella koma ennaalepheliha mawu a muthu oohiroromelleya.

¹³ Muthu oolesi annallota wi, “Vookhalla mukango vaatte kiniiphelliwe m'misewuni.”

¹⁴ Vayanoni va mutthiyana ooraruwa vookhalla nlliti noowallamella. Ayo Apwiya yaashenlliiwa murima eneeromorellamo.

¹⁵ Okarangeya onnakona m'murimani mwa mwaana koma ekopo yoomullakella eneerovenyihamo.

¹⁶ Waavelleellaka emphaso wa athu eeyuuma apaalle waanyingallella oohoowa wi okhalle ni eyuuma, oneerohoowa.

Malangizo 30 a eezeru

¹⁷ Apella maaru wi wiiwe malangizo a eezeru. Phariha mutteko nnddo kinahuddiheemi

¹⁸ vawi tti oohakallalliha waasunga mwa m'murimani mwawo yakeraattheya va eyanwaawo.

¹⁹ Kinnuudduwelliha ddenndda weyaano ollello wi ororomelleya wawo okhalle mwa Apwiya.

²⁰ Ethiyo nguulembelle dda malangizo 30 eezeru ni odduwella?

²¹ Malangizo awuudduwelliha ddoolungama ni ddawoona wi wawaakhulle ddawoona ayo yuurumalle.

²² Muhiwaakhe oohoowa ekaamba yawi tti oohoowa apaalle waanyingallella oopaneya vanthatoni.

²³ Vawi Apwiya eneerewaateteza va mullatwiiwa nave eneerowaakha okumi ayo enawaakha.

²⁴ Ohaattane ni muthu oohillekella osha murima naari weeta ni muthu oowalli

²⁵ vawi ttuuhuddera meetellwaaye ni okusella okumaawo musampha.

²⁶ Ohikhalle mmodda anapangana omullivellella mmodda ni ovelleella echikole munipuroni mwa mukhwaaye.

²⁷ Onaamwaakhihelle tini bedaawo waahiwora ovelleella?

²⁸ Muhisuse malire akhalle ayo makhollwaaye yaakeraatthihalliiwa.

²⁹ Ethiyo woomoona muthu eeruso ni muttekwaaye? Olliye aneerewiimella vamiitthoni va mamwene oohikhalla va athu shisha.