Miyambo 21 - Mawu a Mulluku

¹ Murima wa mwene tti wonanko muhinje wa maaddi m'mattani mwa Apwiya, ennawutthoonyihella nko enapaalliiwa.

² Erive ettilla wa muthu tti yaphaama vamiitthoni vaye koma Apwiya enneesa murima.

³ Echilungamo ni echiweruzo ddinnaahakallalliha Apwiya okhwaranya ovelleella mukutho.

⁴ Wiitukhulla ni wiinyarulla tti enyali ya oonanara, tti nichimo.

⁵ Ddoolinga dda antthitti ddinnampindulella koma a mphuma annahoowa.

⁶ Eyuuma yoophwanya mu ettilla yoolleka khenallekella omalla wonanko muuthuuchi nave ennamorihella m'musamphani wa okhwa.

⁷ Echiwawa ya muthu oonanara ennamoononga vawi annakhoota weera ddoolungama.

⁸ Ettilla ya muthu oonanara tti yookhoromana koma meetello a aphaama tti yawookowa.

⁹ Tti waphaama okhalla vaatte vaddullu va enyumba okhwaranya okhalla mpa ni mutthiyana ootokollolla.

¹⁰ Murima wa muthu oonanara onnapaalla ddoonanara, khanaakhallella echifundo akhwaaye oohoowa.

¹¹ Muthu oovevulla allakiwa, eenamwani ennachenjera, muthu awiiwesesa alangiziwa annadduwella.

¹² Muthu oolungama annawehesesa enyumba ya oonanara, ennakuhiwa nave ennoonongeya.

¹³ Oyo ahinawaapella maaru oohoowa yaawinllaka khanaapelliwa maaru aawinllaka.

¹⁴ Emphaso yoovelleella mwawiipittheya ennakhurumusa osha murima nave yamukaphwani, owalli woollipa.

¹⁵ Echilungamo yeereya athu oolungama ennahakallalla koma athu oonanara ennoopopiheya.

¹⁶ Muthu oyo anahiya ettilla ya ezeru aneeromallella m'mutthukumano wa ookhwa.

¹⁷ Oyo anakonda ddoottheyiha aneerohoowa nave oyo anamukonda vinyo ni makhura khawa atukhuwa.

¹⁸ Athu oonanara eneerokhalla yoowoopollella oolungama nave oohiroromella eneerokhalla yoowoopollella oororomelleya.

¹⁹ Tti waphaama okhalla ochipululuni okhwaranya okhalla ni mutthiyana ootokollolla ni oosha murima mwawaakuva.

²⁰ Muthu eezeru annasunga makhura oowallamella mutengo koma ookarangeya annaamirya.

²¹ Muthu oothwara echilungamo ni echifundo eneerophwanya okumi, echilungamo ni olemu.

²² Muthu eezeru annagonjiha muzinda wa amasiva nave annakumulla mpanda oyo athwaayo enaroromelliiwa.

²³ Oyo anamaka nllumi ni ophara eyanwaaye khanaphwanya ddookatamiha.

²⁴ Muthu ookota ni awiitukhulla anneeriwa “Oovevulla,” kaambiiwa anneera ddeko mwawiitthamalla.

²⁵ Ddookhumba dda muthu oolesi ddinnamwiipha vawi mattaaye ennakhoota ophara mutteko.

²⁶ Muthu oonanara annakuseya murima nllapo nittheene koma oolungama annavaha nave khanuumellella.

²⁷ Mukutho wa athu oonanara onnaananara Apwiya, ottepesesa avelleella ni yoolinga yoonanara.

²⁸ Mboni awoottha aneerewoonongeya koma awiiwesesa aneerollota moohikayikella.

²⁹ Muthu oonanara anneesa wooneya wonanko oollipa murima koma ooreera murima annapotokosa meetellwaaye.

³⁰ Khaviri ezeru wiiwesesa apaalle malangizo owaapambana Apwiya.

³¹ Kavalo annakhozekelliwa nllapo noowana ekhoto koma Apwiya sika enamupambaniha.