Miyambo 20 - Mawu a Mulluku

¹ Vinyo annavevulla nave yoowirya yoowalli ennanyakulla, oohollowana khanna ezeru.

² Onanariwa wa mwene tti wonanko othuruma wa mukango, anallika analakwella okumaaye.

³ Orapa okangana onnamuriiha muthu koma ookarangeya ennatokollolla.

⁴ Muthu oolesi khanallima mu eyitta, annaashaasha mu ellimwe koma khanaphwanya ello.

⁵ Yoolinga ya murima wa muthu tti maaddi oowallamella koma muthu oodduwella annaarikavo.

⁶ Athu anchichi ennallalleya dda oreera murima wiwa koma ttaani anaamuphwanye oororomelleya?

⁷ Muthu oolungama ni oororomelleya, anaaye ennadala vatulli viwa.

⁸ Mwene akhalla va mpandwaaye waweeruzella annadduwella ddoonanara ni miitthwaaye.

⁹ Ttaani anaallote wi, “Kooweelliha murimaaka nave nginna nichimo?”

¹⁰ Esikelo ni ddoolingella ddoolleka ddinnaananara Apwiya.

¹¹ Naari mwaana anniidduwanyeyiha ni ddaweera ddaye ddaarimi ddiri ddaweella ni ddoolungama.

¹² Naaru nawiiwella, niittho nawoonella, piillinndda yaddiphatusalle tti Apwiya.

¹³ Ohikondeke okona woova wi onaakhalle oohoowa, khunuulla miittho wi ovone yoocha.

¹⁴ Muthu aakullaka malonda annallotellella wi, “Khe yaphaama, khe yaphaama.” Koma avenyavo anniitukhulla.

¹⁵ Wookhalla golide ni malluku oowallamella mutengo koma eyano yoodduwella ennakhwaranya yooreerihella yoowallamella mutengo.

¹⁶ Muthu amuvelleellella echikole mulleto omwaakheke mukanjwaaye. Omuphare oomuvelleellella echikole mutthiyana eelleto.

¹⁷ Yoocha yoophwanyeya moolleka ennamuddivella muthu koma mamallihellwiiwa muwano mwaye munnaddalla mihava.

¹⁸ Yoolinga ennasimikizella ddooganizella nave ohinaambe ekhoto waambeke okoha malangizo.

¹⁹ Nawunawu aweeteeta annawulula ddoovittheya sika ohaattane ni muthu oollota mookarangeya.

²⁰ Muthu aatembelela attiitthinnya apaalle amennya enyalaaye eneerothiima mwiipiphini.

²¹ Yoohallana yoophwanyeya mwawaakuva, mamallihellwiiwa khenadaliseya.

²² Ohilloteke wi, “Kineerohokollosella ddoonanara.” Atiyere Apwiya vawi eneerewuuvullusa.

²³ Ddoolingella ddoolleka ddinnaananara Apwiya nave esikelo ddawoottha khe ddaphaama.

²⁴ Apwiya sika enalamulella meetello a muthu. Vano muthu anaadduwelle mwawiidde ettillaaye?

²⁵ Opatulella ddeko wa Apwiya moohiganiza phaama tti musampha wa muthu vawi ttuusintha maganizo allupenlle khalle.

²⁶ Mwene eezeru annamudduwella oyo alakwihalle nave annamullaka moohiweha ekhove.

²⁷ Munepa wa muthu tti enyali ya Apwiya onnamolleella dda muwari mwa murima wa muthu.

²⁸ Echifundo ni ororomelleya ddinnamuteteza mwene nave omwenaaye onnallipa ekaamba ya echilungamo.

²⁹ Oriiheya wa esombwe okonne va masiviiwa nave oreera wa wuulluvalla okonne va embwi.

³⁰ Wuukuthiwa ni makhwata tti murete waweellihella ddoonanara nave miwashullo ddinnahuwa murima.