Miyambo 2 - Mawu a Mulluku

Oreera wa ezeru

¹ Mwanaka, huddera nnddo kinuuhuddiheemi nave osunge nnddo kinuulleelleemi.

² Apella maaru o ezeru, hiya murimaawo va odduwella.

³ Veka odduwella nave ithana wiiwesesa.

⁴ Ashaasha ezeru wonanko siliva apaalle eyuuma yoovittheya.

⁵ Sika vano oneerewiiwesesa owoova Apwiya nave oneeromudduwella Mulluku.

⁶ Apwiya ennavaha ezeru, mwa alliwa munnavenyera odduwella ni wiiwesesa.

⁷ Apwiya ennavelleella ezeru yaphaama wa athu oolungama nave ennaateteza ayo eri oororomelleya.

⁸ Apwiya ennateteza ettilla dda oolungama nave ennaawehera oororomelleya.

⁹ Sika vano oneerodduwella eyo eri echilungamo ni echiweruzo yaphaama, ddaphaama ni ettilla ddooreera.

¹⁰ Ezeru eneerovollowa m'murimani mwawo nave odduwella oneerewuuhakallalliha

¹¹ Oganiza phaama oneerewuuvittha nave wiiwesesa oneerewuuteteza.

¹² Ezeru eneerewuuvullusa o meetello oonanara, eneerewuuteteza wa oollota ddoonanara

¹³ ayo enahiya ettilla ddoolungama eneeta ettilla dda mwiipiphini.

¹⁴ Ennahakallalla yaaweeraka ddoonanara nave ennathapella ni mitteko ddoohilungama.

¹⁵ Athu yaalla ettilla ddiwa tti ddookhoromana, makhallellwiiwa tti oolleka.

¹⁶ Oneerovulluwa wa mutthiyana ooraruwa, wa mutthiyana aweella m'mwiitthoni, awoollowa nllumi,

¹⁷ oyo anamuhiya mamune awaamba, ootiwalla echipangano ni Mullukwaaye.

¹⁸ Enyumbaaye ennasusella wuukhwaani nave ettilla ddaye ddinnamuphiyiha o ellapo ya ookhwa.

¹⁹ Khaavo naari mmodda oyo anahokollowawo aya wa olliye. Khanahokollweella o ettilla ya okumi.

²⁰ Sika othwareke ettilla dda athu aphaama, weeteke mu musewu wa oolungama.

²¹ Athu oolungama sika enaakhalle mwiillaponi nave oororomelleya sika enaakeraattheye mwemmo.

²² Koma athu oonanara eneerovenyihiwa va ellapo yavatthi. Oochimwa aneerewaakhumihamo mwiillaponimmo.