Miyambo 19 - Mawu a Mulluku

¹ Muthu oohoowa oororomelleya annamukhwaranya awoottha ookarangeya.

² Khe waphaama opaalla ello ohidduwellaka nave othamaka khe ophiya.

³ Athu ookarangeya ennaddoononga ni ddaweera ddiwa nave m'murimani mwiwa ennaahumullulla Apwiya.

⁴ Muthu eeyuuma annakhalla ni akhwaaye anchichi koma oohoowa annathawiwa ni mukhwaaye.

⁵ Mboni awoottha khalephela ollakiwa nave a nllumi nawiisha khavulluwa.

⁶ Anchichi ennaallapa athu oovuwa nave arive muthu tti mukhwaaye a muthu oovaha.

⁷ Muthu oohoowa anniitiwa ni abalaaye. Ethiyo akhwaaye attheene khenarekamellana? Naari eeseeseve ollota mawu, khenakhalla ni mutteko.

⁸ Oyo anakonda ezeru annakonda okumaaye nave awiiwesesa annacha phaama.

⁹ Mboni awoottha khalephela ollakiwa nave a nllumi nawiisha khavulluwa.

¹⁰ Khe waphaama muthu ookarangeya okhalla ni eyuuma. Ethiyo kaporo ttuulamulella enduna?

¹¹ Ezeru ennamuvaha muthu ohinanariwa mwawaakuva, oriiheya wiwa okonne voohipwathani ddeepewe.

¹² Osha murima wa mwene tti wonanko othuruma wa mukango koma oreera murima waye tti wonanko nikame vamanasini.

¹³ Mwaana ookarangeya tti otulli wa attiitthinnya nave mutthiyana ootokollolla tti ondonyandonya wa murimu.

¹⁴ Muthu annahallana enyumba ni eyuuma ovenyera wa makhollwaaye koma mutthiyana eezeru tti emphaso ya Apwiya.

¹⁵ Waapaalla, khalla oolesi, konaka koma oneerovolliwa ettalla.

¹⁶ Muthu oosunga malamulo annasunga okumaaye koma oohipwatha meetellwaaye aneerokhwa.

¹⁷ Wamuvaha muthu oohoowa waakongolihalle Apwiya nave eneerewuuhokollosella ddaweera ddawo.

¹⁸ Omullakeke mwaana ari mung'onong'ono, etiyerello erivo, voohipaallani omoononga.

¹⁹ Muthu oowalli allive yeekha vawi wamoopolla aneerewaakullella.

²⁰ Waawiiwellellaka malangizo nave onakhozekella ohuddera, nllapo nimodda oneerokhalla eezeru.

²¹ M'murimani mwa muthu ttuukhalla ddooganiza ddinchichi koma yoolinga ya Apwiya sika onaakwakhwanihiwe.

²² Yoopaalleya wunchichi wa muthu tti ororomelleya nave muthu oohoowa tti aphaama okhwaranya awoottha.

²³ Owoova Apwiya onnavaha okumi, ookhallana aneerovona, kheyiivo yoonanara enammorelle.

²⁴ Muthu oolesi ahiya nnatta naye mumbaleni annatopa wi aniphiyihe owanoni.

²⁵ Wamuukutha muthu oovevulla, athu eenamwani eneerochenjera. Wamuhumullulla muthu awiiwesesa annadduwella.

²⁶ Oyo anaahoosa attiitthinnya ni owiikariha amennya tti mwaana oowulliha muru nave oomoriha ekhove.

²⁷ Mwanaka, wahiya ohuddera oneerovirikana ni odduwella.

²⁸ Mboni awoottha annavevulla weeruza nave vayanoni va muthu oonanara vinnamirya ddoonanara.

²⁹ Tti ddookhozekella khalle wi mullatu waamorelle athu oovevulla nave muwashullo omuwashulla ookarangeya.