Miyambo 18 - Mawu a Mulluku

¹ Muthu awiiddivella annaashaasha ddoopaalla dda yeekhaaye, okangana ni ezeru yaphaama.

² Muthu ookarangeya khanapwatha wiiwesesa, nnddo anapaalleeye tti wooniha dda m'murimani mwaye.

³ Onanara ni owulliwa muru oneetella nimodda, makhallello oonanara ennawiiha ovevulliwa.

⁴ Mawu a muwano mwa muthu tti maaddi oowallamella, neetuutu eezeru tti muhinje wooddalla.

⁵ Khe waphaama omuyaara muthu oonanara apaalle omuwatteella echilungamo muthu oolungama.

⁶ Eyano ya muthu ookarangeya ennaambiha okangana nave muwano mwaye munnattatthamulla owashulliwa.

⁷ Muwano mwa muthu ookarangeya munnamoononga, eyanwaaye ennakhalla musampha wa okumaaye.

⁸ Mawu a nawunawu tti wonanko ddoocha ddooddiva, ddookitthella m'mirimani.

⁹ Muthu oophara mutteko moolesi tti mwanamunne a awoononga.

¹⁰ Nnddina na Apwiya niri wonanko nttattha noollipa, oolungama annathamakella athawellamo.

¹¹ Eyuuma ya muthu ootukhuwa tti muzindaaye woollipa nave anaganiza wi tti esiri yoorekama.

¹² Okota onnahoollella woonongeya koma wiiyeviha onnakhwaranya olemu.

¹³ Waakhulla ohinaapelle maaru tti okarangeya ni owulliha muru.

¹⁴ Murima wa muthu onnamullipiha aavoriiwaka koma ttaani anaawuvillelle waavoreyaka?

¹⁵ Murima wa muthu oodduwella onnahuddera, naaru na eezeru ninnaashaasha odduwella.

¹⁶ Emphaso ennamweeriha muthu wi akhalle ni mpata woophiya vamiitthoni va muthu muullupalli.

¹⁷ Muthu awaamba osuma annooniha echilungamo ophiyera mukhwaaye aphiyalle ni omuvaanyiha.

¹⁸ Woombesa sika onamalliha okangana, owaakanulla athu amasiva.

¹⁹ Omukhurumusa murima mbalaawo wamulakwella tti wookatamiha okhwaranya waakha muzinda wookhalla ni mpanda woollipa. Okangana onakhalla wonanko mikoko ddoollipa ddoowallella machiwi.

²⁰ Muthu annavona ezipaso dda muwano mwaye ni ddoopinduliha dda eyanwaaye.

²¹ Nllumi nookhalla ni masiva a okhwa ni okumi, oonikonda annacha ezipaso ddiwa.

²² Oyo amuphwanyille mutthiyana oophwanya ello yaphaama nave Apwiya aamweerella echifundo.

²³ Muthu oohoowa annaveka moolemu koma muthu eeyuuma annamwaakhulla moowalli.

²⁴ Awaattana ni anchichi annaddoononga koma vookhalla waattana waamodda nko onakhwaranya wa muthu ni mwanamunne.