Miyambo 17 - Mawu a Mulluku

¹ Tti waphaama ocha mvitthe viri murendelle okhwaranya machellello mpa muri okangana.

² Kaporo aweera ddeko mweezeru aneeromulamulella mwaana oowulliha muru nave aneerokawanana yoohallana ya abalaaye.

³ Siliva aneekiwa mwiipalleni nave golide ni munllo koma murima wa muthu oneesiwa ni Apwiya.

⁴ Athu oonanara ennaapella maaru eyano yoonanara nave awoottha enniiwellella nllumi nawiisha.

⁵ Oyo anamweerella epewe oohoowa anamuvevulla oyo amuphatusalle nave anahakallalla ni otulli aneerollakiwa.

⁶ Edduullu sika oriiheya wa athu awuulluvalla nave olemu wa anamwani tti makhollwiiwa.

⁷ Ollota waphaama khonamuphwanella muthu ookarangeya. Emoddamoddave yeeyo woottha khonamuphwanella mwene.

⁸ Ddamukaphwani ddiri wonanko murete wa ekari wa muthu oyo anaddeera vawi aweerooyo erive ello ennamweetella phaama.

⁹ Oovuhellella ddoolakwa anaashaasha echikondi koma oomakellella mwaha aniipha waattana.

¹⁰ Omuhumullulla omodda muthu eezeru onnakhwaranya omuwashulla wunchichi ookarangeya.

¹¹ Muthu oonanara yoopaallaaye tti owukila vano aneerorumihelliwa muthu eekuku.

¹² Tti waphaama okumana ni echimbalangondo yaakhiwe musaaniiwa okhwaranya ni muthu ookarangeya aneera ddoolloddowa.

¹³ Muthu aahokollosaka yoonanara eerelliwe yaphaama otulli khomallaka vaatte vaye.

¹⁴ Waamba wa okangana tti wonanko ondonya wa maaddi, vano ovenyekevo ekhoto ehinaambeye.

¹⁵ Ookamulla mullatu wa muthu oonanara wi khalakwille annaananara Apwiya emoddamoddave yeeyo anamweera muthu oolungama wi oolakwa.

¹⁶ M'mattani mwa muthu ookarangeya munakhallella tini makobiri ookullella ezeru murwaaye oheetaka phaama?

¹⁷ Mukhwaawo annuukonda enthawi ddittheddene nave mwanamunno ayariwe wi uukavihereke mu ddookatamiha.

¹⁸ Muthu oohikhalla ni ezeru annapangana omullivellella mmodda ni ovelleella echikole munipuroni mwa mukhwaaye.

¹⁹ Muthu ookonda ochimwa annakonda waambiha ddookatamiha nave oyo anallota mwawiitukhulla annaashaasha ddoohoosa.

²⁰ Ookhoromana murima khaddinamweetella phaama nave awoollowa nllumi aneerokhalla mu ddoohoosa.

²¹ Mwaana ookarangeya annaamoriha ethakaraka makhollwaaye nave khenahakallallana.

²² Murima woohakallalla onnattaphulla mwiilli koma woovoreya onnapwesa makhuva.

²³ Muthu oonanara annaakhella ddamukaphwani wi akhoromanihe echilungamo.

²⁴ Muthu awiiwesesa annahiya murima va ezeru koma ookarangeya annaweha nngu ni nngu va ellapo yavatthi.

²⁵ Mwaana ookarangeya annaamoriha ethakaraka attiitthinnya nave annaavoriiha murima amennya oomuyara.

²⁶ Khe waphaama omulliviha muthu oolungama naari omuwashulla muthu aphaama.

²⁷ Muthu oomaka nllumi annadduwella ddeko nave muthu awiithaalla anniiwesesa.

²⁸ Muthu ookarangeya amaalleya annakhalla wonanko eezeru nave amaka nllumi annakhalla wonanko awiiwesesa.