Miyambo 16 - Mawu a Mulluku

¹ Ddoolinga dda vatthi va murima tti dda muthu koma waakhulla wa nllumi onavenyera wa Apwiya.

² Erive ettilla wa muthu tti ddaphaama vamiitthoni vaye koma Apwiya enneesa ddoolinga ddaye.

³ Velleella mitteko ddawo wa Apwiya nave ddoolinga ddawo ddineerokeraattheya.

⁴ Apwiya yaaphatusa erive ello wi ekhalle ni yoolingiiwa naari athu oonanara wi yoone nllapo na ddookatamiha.

⁵ Arive muthu awiitukhulla annaananara Apwiya. Ddawoona, khalephela ollakiwa.

⁶ Ekaamba ya wiivelleella ni ororomelleya muthu aneerokhululukelliwa machimwaaye. Ekaamba ya owoova Apwiya annarapa ddoonanara.

⁷ Apwiya yaaddivelliwaka ni meetello a muthu ennamwaattaniha naari ni adanaaye.

⁸ Tti waphaama okhalla ni ddeko ddooyeva ori ni echilungamo okhwaranya okhalla ni ddawaata ohinna echilungamo.

⁹ Muthu annaganizera ettillaaye koma Apwiya ennookollella manyallwaaye.

¹⁰ Muwano mwa mwene munnallohella nave khamunalakwiha vookamullani mullatu.

¹¹ Apwiya ennapaalla wi ddoolingella ni esikelo ddikhalle dda echilungamo. Ddoolingella ddittheddene dda mathumba yaapangille tti alliwa.

¹² Weera ddoonanara onnaananara mamwene vawi echilungamo sika vikeraattheye omweniiwa.

¹³ Eyano yoolungama ennamuhakallalliha mwene nave annamukonda oyo anallota ddawoona.

¹⁴ Onanariwa wa mwene tti othenga wa okhwa nave muthu eezeru sika anamupepesa.

¹⁵ Oreera murima wa mwene onnawiiha okumi wonanko mirapo dda murimu mu ellimwe.

¹⁶ Ophwanya ezeru tti waphaama okhwaranya omuphwanya golide nave ophwanya wiiwesesa tti waphaama okhwaranya omuphwanya siliva.

¹⁷ Musewu wa muthu oolungama onnarapa ddoonanara nave muthu awoonesesa ettillaaye annasunga okumaaye.

¹⁸ Okota onnahoollella woonongeya nave wiitukhulla onnawiiha omora.

¹⁹ Wiiyeviha variyari va athu oohoowa onnakhwaranya okawana ddawaakha ni athu ookota.

²⁰ Muthu oyo anaapella maaru mawu ddeko ddinnamweetella phaama nave oodalisiwa tti oyo anaaroromella Apwiya.

²¹ Muthu eezeru anneeriwa awiiwesesa nave ollota waye wooddiva onnaakhullelliwa.

²² Ezeru tti neetuutu a okumi wa muthu oyo arina koma ollakiwa wa ookarangeya tti olloddowa.

²³ Murima wa muthu eezeru onnamullotiha mawu oochenjera nave onnahuddiha eyanwaaye.

²⁴ Mawu ooddiva tti wonanko nikallapha na enwi nave ennanag'aneya m'murimani, ollipiha mwiilli.

²⁵ Vookhalla ettilla emodda enooneya wonanko yaphaama wa muthu koma mamallihellwiiwa tti okhwa.

²⁶ Ettalla ya mullupa mutteko ennamukavihera wi allipihelleke nave muwano mwaye munnamwaakuvihiha.

²⁷ Muthu oohikhalla ni mutteko annakhozekella weera ddoonanara nave mawaaye tti wonanko munllo wooshellelliha.

²⁸ Muthu ookhoromana annaambiha makani nave nawunawu annawiitaniha athu awaattana.

²⁹ Muthu eechiwawa annamukopa mukhwaaye, annamweetiha mu ettilla yoohikhalla yaphaama.

³⁰ Muthu oominyalliha miittho annaganiza ddoonanara nave oonyindulliha eyano annawiiha ddoonanara.

³¹ Embwi ddiri wonanko enduwira yoomwene yoophwanyeya mu ettilla ya echilungamo.

³² Muthu oohisha murima mwawaakuva annamukhwaranya akhoto nave oyo anawuphara murima annamukhwaranya awaakha muzinda.

³³ Athu ennoombesa koma ddoothwarellella ddinavenyera wa Apwiya.