Miyambo 15 - Mawu a Mulluku

¹ Waakhulla wawiithaalla onnakhurumusa murima koma mawu oovoreya ennashiha murima.

² Nllumi na muthu eezeru ninnallota phaama nnddo ninadduwelliwa koma muwano mwa ookarangeya munnallota ddoolloddowa.

³ Miittho a Apwiya eri virive veko waawehesesa athu oonanara ni aphaama.

⁴ Nllumi naphaama tti muteekho wa okumi koma mawu ookhoromana ennavoriiha murima.

⁵ Muthu ookarangeya annavevulla malangizo a attiitthinnya koma oopwatha ohumullulliwa annakhalla oochenjera.

⁶ Mpa mwa muthu oolungama munnakhalla eyuuma yinchichi koma mu mphuro wa oonanara munnakhalla ddookatamiha.

⁷ Eyano ya muthu eezeru ennavuwiha odduwella koma ohiri ya oonanara.

⁸ Mikutho dda muthu oochimwa onnaananara Apwiya koma mavekello a aphaama ennaahakallalliha.

⁹ Apwiya ennananariwa ni ettilla ya muthu oochimwa koma ennamukonda aweera echilungamo.

¹⁰ Oohiya ettilla yaphaama annallakiwa wunchichi nave awiitana ni ohumullulliwa annakhwa.

¹¹ Ellapo ya ookhwa ni woonongeya ddiri vamiitthoni va Apwiya. Yookatamiha ttiivi ni mirima dda athu?

¹² Muthu oovevulla khanahakallalla ni ohumullulliwa nave khanaya wa athu eezeru.

¹³ Murima woohakallalla onnooniha ekhove yoottaphuwa koma murima wookhumuwa onnooniha ekhove yoomora.

¹⁴ Murima wa muthu eezeru onnaashaasha odduwella koma muwano mwa ookarangeya munnacha olloddowa.

¹⁵ Mallapo mattheene a muthu oohoosiwa tti oonanara koma muthu a murima woohakallalla annakhalla ni machellello oohimalla.

¹⁶ Tti waphaama okhalla ni ddooyeva owoovaka Apwiya okhwaranya okhalla ni eyuuma yinchichi koma okhallaka mu ddookatamiha.

¹⁷ Tti waphaama ocha matthaapa amakukhu viri echikondi okhwaranya enama ya eng'ombe yooneneva viri wiitana.

¹⁸ Muthu oosha murima mwawaakuva annaambiha okangana koma oowuphara murima annawiiha murendelle.

¹⁹ Meetello a muthu oolesi tti mpanda wamiiwa koma ettilla ya awookowa murima tti musewu woovuhellelliwa phaama.

²⁰ Mwaana eezeru annaahakallalliha attiitthinnya koma ookarangeya annaavevulla amennya.

²¹ Okarangeya onnamuhakallalliha muthu oohikhalla ni ezeru koma awiiwesesa annookolla meetellwaaye.

²² Ddooganiza ddinnalepheleya vaahikhalla malangizo koma vakhalla alangizi anchichi ddoolinga ddinnaworeya.

²³ Muthu annahakallalla ni waakhulla waphaama wa muwano mwaye. Ethiyo mawu oollotiwa mu enthawi yoophwanellella khehiyo aphaama?

²⁴ Athu eezeru ennawella ettilla yookumi wi erapelle ettilla yooya o ellapo ya ookhwa.

²⁵ Apwiya ennakumulla enyumba ya muthu awiitukhulla koma ennaateteza malire a naamukhwelle.

²⁶ Apwiya khenaddivelliwa ni maganizo a muthu oonanara koma ennahakallalla ni mawu aphaama.

²⁷ Muthu oowaashaasha opindula moolleka annahoosa nibanja naye koma awiitana ni ddamukaphwani annakhalla ni okumi.

²⁸ Muthu oolungama annaganizera mmo anaakhullelleeye koma muwano mwa moochimwa munnakhuma ddoonanara.

²⁹ Apwiya ennaarekamella athu oonanara koma enniiwa mavekello a oolungama.

³⁰ Owala wa ekhove onnahakallalliha murima nave othenga waphaama onnallipiha murima.

³¹ Oyo maarwaaye eniiwa ohumullulliwa woophwanellella aneerokhalla mmodda a athu eezeru.

³² Oyo anakhoota ohuddera aniivoreya yeekha koma awaakhullella ohumullulliwa annapindula wiiwesesa.

³³ Owoova Apwiya tti ohuddera ezeru nave wiiyeviha onnakhwaranya olemu.