Miyambo 14 - Mawu a Mulluku

¹ Mutthiyana eezeru ennamaka nibanja koma ookarangeya annanimwara ni mattaaye.

² Oyo aneeta mwawookowa annawoova Apwiya koma aneeta mookhoromana annaavevulla.

³ Ollota wawiitukhulla wa muthu ookarangeya onnamuwashulliha koma eyano ya eezeru ennamuteteza.

⁴ Nko ohiri eng'ombe khonakhalla yoocha koma wakhalla eng'ombe yamasiva onnakhalla ddeko ddinchichi.

⁵ Mboni oororomelleya khanoottha koma mboni oolleka anallota ddawootthave.

⁶ Oovevulla annaashaasha ezeru oohiyiphwanya koma tti yookhweya wa awiiwesesa.

⁷ Rekamellana ni muthu ookarangeya vawi vaavo khophwanyavo ezeru.

⁸ Ezeru dda muthu oochenjera ddikonne voodduwellani phaama ettilla ddaye koma ookarangeya annallekiwa ni okarangeya waye.

⁹ Athu ookarangeya khenapwatha yachimwa koma athu oolungama ennaashaasha okhululukelliwa.

¹⁰ Murima onadduwella ovoreya wa weekhiiwa nave khaavo anadduwella mmo ohakallallelliiwa.

¹¹ Enyumba ya muthu oonanara eneerokumulliwa koma musasa wa muthu oolungama oneerokeraattheya.

¹² Vookhalla ettilla emodda enooneya wonanko yaphaama wa muthu koma mamallihellwiiwa tti okhwa.

¹³ Naari voottheyani murima onnoona ovoreya nave omalliha wiwa wa ohakallalla tti omoriwa ethakaraka.

¹⁴ Muthu oonanara aneerovona ezipaso dda ettillaaye koma aphaama aneerovona ezipaso dda mitteko ddaye.

¹⁵ Muthu eenamwani annakhulupilila erive ello koma oochenjera annawehesesa meetellwaaye.

¹⁶ Muthu eezeru annoova nave annahiya ddoonanara koma ookarangeya anniitukhulla nave khanatikheya.

¹⁷ Muthu oosha murima mwawaakuva anneera ddeko mookarangeya nave oonanara anniitiwa.

¹⁸ Athu eenamwani yoohallaniiwa tti okarangeya koma eezeru ennawara ezeru.

¹⁹ Athu oonanara ennaakokhorella athu aphaama nave oochimwa va millako dda oolungama.

²⁰ Muthu oohoowa khanakondiwa naari ni akhwaaye koma eeyuuma annakondiwa ni athu anchichi.

²¹ Oyo anaavevulla akhwaaye tti oochimwa koma oodala tti oyo anaweerella echifundo oohoowa.

²² Ethiyo oyo anaganizella ddoonanara khanahollowa? Ooganizella ddaphaama anneerelliwa echifundo ni ororomelliwa.

²³ Orive mutteko wookhalla ni mphuro koma ollotallota onnawiiha ohoowa.

²⁴ Othuviwa wa athu eezeru tti eyuuma koma okarangeya wa oolloddowa tti okarangeya.

²⁵ Mboni oororomelleya annaavullusa athu koma awoottha annalleka.

²⁶ Muthu anawoova Apwiya ookhalla ni echikhulupililo yoollipa nave anaaye eneerokhalla ni voothawellavo.

²⁷ Owoova Apwiya sika neetuutu a okumi, onnamweeriha muthu orapella misampha dda okhwa.

²⁸ Mulloko muullupalli wa athu sika oriiheya wa mwene koma aahikhalla ni athu omwenaaye onnavevuwa.

²⁹ Oomaalleya anniiwesesa phaama ddeko koma awaakuva osha murima annoonihella okarangeya waye.

³⁰ Murima wawiithaalla onnavaha mwiilli okumi koma ehache ennuntiha makhuva.

³¹ Owaanyingallella oohoowa annamweerella epewe Mullukwaaye koma ooweerella echifundo oopaneya annamutitimiha.

³² Athu oonanara ennatathilliwa ni ddoonanara ddiwa koma oolungama ennateteziwa ni echilungamwiiwa.

³³ Ezeru ennakona m'murimani mwa muthu awiiwesesa koma khenaphwanyeya mwa ookarangeya.

³⁴ Echilungamo ennatemellelliha mutundu wa athu koma nichimo ninnaawulliha muru athu.

³⁵ Mwene annahakallalla ni mullupa mutteko aweera ddeko mweezeru koma annamunanariwella oowulliha muru.