Miyambo 13 - Mawu a Mulluku

¹ Mwaana eezeru annaapella maaru mwambo wa attiitthinnya koma oovevulla khaniiwellella ohumullulla.

² Muthu aphaama aneerocha ezipaso ddaphaama dda muwano mwaye koma oonanara ocha waye tti echiwawa.

³ Oophara eyanwaaye annasunga okumaaye koma oollota shisha annaddoononga.

⁴ Muthu oolesi annakhumba koma khanaphwanya ello koma muthu a ntthitti aneerokhalla ni eyuuma.

⁵ Muthu oolungama anniitana ni woottha koma oonanara anneera ddoonanara ni ddoowulliha muru.

⁶ Echilungamo ennamuteteza muthu aphaama koma nichimo ninnammoriha oonanara.

⁷ Ookhallavo anaddeesa eeyuuma koma ahinna ello nave mmodda anaddeesa oohoowa koma ari ni eyuuma yinchichi.

⁸ Enoopolla okumi wa muthu tti eyuumaaye koma muthu oohoowa khanna yoomoopolla.

⁹ Owala wa muthu oolungama khonathiima koma enyali ya oonanara ennathiima.

¹⁰ Wiitukhulla onnawiiha okangana koma oyo alangiziwe annakhalla ni ezeru.

¹¹ Eyuuma yooyiphwanya mwawaakuva ennamalla mwawaakuva koma yoopata mwa vang'ono vang'ono ennavirellella waata.

¹² Ello yootiyerella yaselliwa ennakukhumulla mwiilli koma yoopaalleya yakwakhwanihiwa tti muteekho wa okumi.

¹³ Oovevulla mwambo anaddoononga yeekha koma awaapella maaru malamulo aneerothuviwa.

¹⁴ Ddoohuddiha dda muthu eezeru tti neetuutu a okumi, ddinnarapelliha m'musamphani wa okhwa.

¹⁵ Ezeru yaphaama ennakondelliwa koma ettilla ya oohiroromelleya tti woonongeya wiwa.

¹⁶ Muthu oochenjera aneera ddittheddene mweezeru koma ookarangeya annooniha olloddowa waye.

¹⁷ Murummwa oohiroromelleya annaahiya athu mu ddookatamiha koma oororomelleya annachiriha.

¹⁸ Ookhoota mwambo annahoowa nave annavevulliwa koma awiiwellella ohumullulliwa annariihiwa.

¹⁹ Ello yoopaalleya yakwakhwanihiwa ennahakallalliha koma ohiya ddoonanara khonaaddivella ookarangeya.

²⁰ Weeta ni athu eezeru onnakhalla eezeru koma mukhwiiwa a ookarangeya annavoreyiwa.

²¹ Otulli onnamuthwara muthu oochimwa koma oolungama annathuviwa ddaphaama.

²² Muthu aphaama annahiyera eyuuma edduullu ddaye koma oonanara eyuumaaye ennakhalla ya oolungama.

²³ Emata ya muthu oohoowa ttuukhalla ddoocha ddinchichi koma ddinnaakhiwa ni athu echilungamo.

²⁴ Oyo ahinamullaka mwanaye annamwiita koma anamukonda mwanaye annamullaka.

²⁵ Oolungama annacha anavona koma erukullu ya oochimwa eneerovolliwa.