Miyambo 12 - Mawu a Mulluku

¹ Muthu ookonda mwambo annakonda odduwella koma awiitana ni ohumullulliwa annakarangeya.

² Apwiya ennamweerella echifundo muthu aphaama koma ennamuvaanyiha aweera ddoonanara.

³ Ochimwa khonamuteteza muthu koma oolungama khanasuseya.

⁴ Mutthiyana aphaama tti wonanko enduwira ya mamune koma oowulliha muru tti wonanko nikhwata na marohi wa mamune.

⁵ Maganizo a athu oolungama tti awookowa koma malangizo a oonanara tti oolleka.

⁶ Mawu a muthu oonanara tti awiipha koma a oolungama tti oovullusa.

⁷ Athu oonanara ennatathilliwa nave ennatiwalleya koma nibanja na oolungama ninnallipa.

⁸ Muthu annariihiwa moollikana ni ezerwaaye koma ookhoromana murima annavevulliwa.

⁹ Muthu oovevulliwa ari ni kaporo annamukhwaranya awiitukhulla koma ahinna yoocha.

¹⁰ Muthu oolungama annapwatha okumi wa echiwetwaaye koma echifundo ya muthu oonanara tti ekuku.

¹¹ Ddoocha ddinnamukwakhwanella oollima emata ddaye koma waathwara athu oohikhalla ni mutteko tti orama ezeru.

¹² Athu oonanara yoopaalliiwa tti ophwanya yoonanara wi yeereke koma athu oolungama khenasuseya.

¹³ Athu oonanara ennakoliwa ni mawu avayanoni viwa koma oolungama ennakhuma mu ddookatamiha.

¹⁴ Muthu annavona ezipaso ddaphaama dda muwano mwaye, Mitteko dda mattaaye ddineerohokolloselliwa wa olliye.

¹⁵ Ettilla ya muthu ookarangeya tti yaphaama vamiitthoni vaye koma eezeru anniiwellella malangizo.

¹⁶ Muthu oosha murima wa muthu oonanara onnadduwanyeya mwawaakuva koma muthu eezeru khanapwatha epewe.

¹⁷ Muthu oollota ddawoona annooniha echilungamo koma mboni awoottha annalleka.

¹⁸ Ollota ddoonanara onnahoma wonanko nsupada koma nllumi na muthu eezeru ninnachiriha.

¹⁹ Eyano yoollota ddawoona ennakeraattheya koma ddawoottha kheddinallekella omalla.

²⁰ M'murimani mwa athu oonanara munnakhalla ddoolleka koma alangizi amurendelle ennahakallalla.

²¹ Muthu oolungama ddookatamiha kheddinamumorella koma oonanara kheddinamumallella.

²² Eyano yawoottha ennaananara Apwiya koma oororomelleya ennaahakallalliha.

²³ Athu eezeru ennavittha odduwella wiwa koma ookarangeya ennoonihella vaweella okarangeya wiwa.

²⁴ Nnatta na oophara mutteko moollipihella nineerolamulella koma oolesi aneerokhalla wonanko kaporo.

²⁵ Okhupanya onnamullemella muthu m'murimani mwaye koma mawu aphaama ennamuhakallalliha.

²⁶ Muthu oolungama annaahoollella akhwaaye koma ettilla ya oonanara ennaahollosa.

²⁷ Muthu oolesi khanaphwanya nnddo anapaalleeye koma oollipihella annaphwanya eyuuma yoowallamella mutengo.

²⁸ M'meetello a muthu oolungama mookhalla okumi nave mu ettillaaye khamuri okhwa.