Miyambo 11 - Mawu a Mulluku

¹ Yoolingella yoolleka ennaananara Apwiya koma weechilungamo onnaahakallalliha.

² Vakhalla wiitukhulla vinnakhallattho owulliwa muru koma ezeru eri mwa awiiyeviha.

³ Oreera murima wa oolungama onnaahoollella koma okhoromana wa athu oolleka onnawoononga.

⁴ Eyuuma khenakavihera va nllapo na osha murima koma echilungamo sika enavullusa wuukhwaani.

⁵ Echilungamo ya athu aweella murima ennookollella ettillaaye koma oonanara aneerokuhiwa ni ddoonanara ddaye.

⁶ Echilungamo ya athu oororomelleya eneerewaavullusa koma oolleka eneerophariwa ni olleka wiwa.

⁷ Muthu oonanara akhwa etiyerellwaaye ennoonongeya nave oweherella wa nichimo khonna mutteko.

⁸ Muthu oolungama annavullusiwa o ddookatamiha koma munipuroni mwiwa ddinammorella oonanara.

⁹ Muthu oohimoova Mulluku annawoononga akhwaaye ni vayanoni vaye koma odduwella onnamvullusa oolungama.

¹⁰ Ddaweetella phaama athu oolungama muzinda onnahakallalla nave oonanara yoonongeya athu ennakhuwa moothapella.

¹¹ Madaliso a oolungama ennunnuwiha muzinda koma muwano mwa oonanara munnakumulla muzinda.

¹² Owaayeviha akhwaaye annarama ezeru koma awiiwesesa annamaalleya.

¹³ Nawunawu aweeteeta annawulula ddoovittheya koma muthu oororomelleya annavittha ddeko.

¹⁴ Varama awookollella athu ennoonongeya koma nko ori alangizi anchichi onnakhalla opambana.

¹⁵ Oomuvelleellella echikole mulleto anniihoosa yeekha koma awiitana ni echikole anniiteteza.

¹⁶ Mutthiyana awiithaalla annariiheya koma athu eekuku yayiwa tti eyuuma.

¹⁷ Muthu eechifundo anneerella okumaaye ddaphaama koma eekuku aniihoosa yeekha.

¹⁸ Muthu oonanara annallivelliwa ddoolleka koma oomidda echilungamo annathuviwa.

¹⁹ Muthu oollipihella echilungamo aneerewaakhella okumi koma oothamakella ddoonanara aneerokhwa.

²⁰ Athu ookhoromana murima enniitana ni Apwiya koma ooreera murima mu ettilla ddiwa ennaahakallalliha Apwiya.

²¹ Ddawoona, oonanara khevulluwa o ollaka koma athu oolungama eneerovullusiwa.

²² Mutthiyana ooreera koma oohiganiza phaama tti wonanko echipini ya golide eyo eri vaphunani va ekumba.

²³ Ddoopaalla dda athu oolungama ddinnawiiha ddaphaama koma nnddo enatiyera oonanara ddinnaashiha murima athu.

²⁴ Ookhallavo ookawa mwawoollowa matta nave annavirellellave otukhuwa. Ookhallavo awiimana nnddo ariiyena nave annavirellellave ohoowa.

²⁵ Murima woovaha oneerotukhuwa, oohellella nayeene aneerohellelliwa.

²⁶ Awiimana tirigu athu ennamutembelela koma madaliso enaakhalle vamuru va ookulliha.

²⁷ Muthu awaasha ddaphaama aneerophwanya ehakallallo koma ddoonanara ddineeromumorella ooddithwara.

²⁸ Oororomella eyuumaaye aneeromora koma athu oolungama eneerophuwa wonanko makukhu.

²⁹ Ookatamiha nibanja naye aneerokatamihiwa nave ookarangeya aneeromurumeyella muthu eezeru.

³⁰ Echipaso ya echilungamo tti muteekho wa okumi nave awaakopa athu tti eezeru.

³¹ Ngoonani, muthu oolungama eneerothuviwa vatthi vaava, ori wawiidde athu oonanara ni oochimwa.