Miyambo 10 - Mawu a Mulluku

Miyambo dda Solomoni

¹ Nndda sika miyambo dda Solomoni. Mwaana eezeru annaahakallalliha attiitthinnya koma mwaana ookarangeya annaamoriha ethakaraka amennya.

² Eyuuma yoochimo khenapinduliha koma echilungamo ennavullusa wuukhwaani.

³ Apwiya khenaakhullella wi muthu oolungama avolliwe ettalla koma ennamuwatteella oochimwa ddoopaalla ddaye.

⁴ A nnatta noolesi annahoowa koma oollipihella mutteko annakhalla ni eyuuma.

⁵ Oohata mwiillimweni tti mwaana eezeru koma ookona enthawi yoohata tti mwaana oowulliha muru.

⁶ Madaliso eri vamuru va muthu oolungama koma muwano mwa muthu oonanara mookona ekhoto.

⁷ Oolungama annadala vawuupuwelliwani koma nnddina na oonanara nineerewunta.

⁸ A murima weezeru annaakhella malamulo koma ookarangeya ootokollolla aneerewoonongeya.

⁹ Aweeta mwawookowa khanoova koma ookhoromaniha ettilla ddaye aneerophariwa.

¹⁰ Oominyalliha miittho annaambiha ddookatamiha koma oomuhumullulla mwawiiweya annawiiha murendelle.

¹¹ Eyano ya muthu oolungama tti neetuutu a okumi koma muwano mwa oonanara munnavittha ekhoto.

¹² Wiitana onnaambiha okangana koma echikondi ennavuhellella ddoolakwa ddittheddene.

¹³ Ezeru ennaphwanyeya muwano mwa muthu awiiwesesa koma muwashullo vamutthanani va ookarangeya.

¹⁴ Athu eezeru ennuukellella nnddo enadduwelliiwa koma muwano mwa ookarangeya munnoononga mwawaakuva.

¹⁵ Eyuuma ya muthu tti muzindaaye woollipa koma opaneya sika onamoononga oohoowa.

¹⁶ Mphuro wa muthu oolungama tti okumi koma opindula wa oonanara tti ochimwa.

¹⁷ Oosunga malangizo aneeta mu ettilla ya okumi koma ookhoota ohumullulliwa annahollowa.

¹⁸ Anavittha wiitana tti a eyano yawoottha nave oollota miseche tti ookarangeya.

¹⁹ Waanjera ollota ddoolakwa ddinnaata koma oyo anasunga eyano tti eezeru.

²⁰ Nllumi na muthu oolungama niri wonanko siliva aphaama koma murima wa muthu oonanara tti oohikhalla ni mutteko.

²¹ Eyano ya muthu oolungama ennaapindulella athu anchichi koma ookarangeya anniiphiwa vooramani ezeru.

²² Madaliso a Apwiya ennavaha eyuuma, khenoonjereravo ethakaraka.

²³ Mattheella a ookarangeya tti weera ddoonanara koma a muthu oodduwella tti ezeru.

²⁴ Eyo muthu oonanara anayooveeye eneeromumorella koma eyo anapaalla oolungama aneerovahiwa.

²⁵ Namangalle aawoopaka athu oochimwa ennavavihiwa koma oolungama ennakeraattheya wa enthawi yoohimalla.

²⁶ Muthu oolesi tti wonanko vinyo oonyuunya m'miinoni apaalle mwiisi m'mwiitthoni wa ayo emurumalle.

²⁷ Owoova Apwiya onnarekamiha mallapo koma miyakha dda oochimwa ddinnayeva.

²⁸ Otiyerella wa muthu oolungama onnahakallalliha koma wa muthu oochimwa oneeromoononga.

²⁹ Apwiya tti mpanda woomuteteza muthu ooreera murima koma tti woonongeya wa muthu oochimwa.

³⁰ Muthu oolungama khawa avenyihiwa munipuroni mwiwa nave oonanara khawa akeraattheya mwiillaponi.

³¹ Muwano mwa oolungama munnallota ddeezeru koma nllumi nookhoromana nineerophaddiwa.

³² Muwano mwa oolungama munnadduwella ddoohakallalliha koma vayanoni va athu oonanara vinnakhuma ddookhoromana.