Miyambo 1 - Mawu a Mulluku

Opaalleya wa miyambo

¹ Miyambo dda Solomoni, mwene a o Israele, mwaana a Davide.

² Nndda tti ddookavihera odduwella ezeru ni malangizo ni wiiwesesa ottaphullella wa mawu ookatamiha.

³ Ddinnahuddiha okhalla mweezeru, moolungama, moororomelleya ni moohikondella.

⁴ Ddinnamweeriha muthu eenamwani okhalla oochenjera nave ddinnamuhuddiha musombwe odduwella ni oganiza phaama.

⁵ Miyambonndda ddinnamoonjerera muthu eezeru odduwella nave ddinnamuhoollella muthu ohuddera phaama.

⁶ Sika ddinnaweeriha wiiwesesa ottaphullella wa miyambi ni maphwanaphwaniho ni ottaphullella wa mawu a muthu eezeru ni mikuluwiko ddiwa.

Malangizo wa asombwe

⁷ Owoova Apwiya tti waamba wa ezeru. Ookarangeyave sika enavevulla ezeru ni malangizo.

⁸ Mwanaka, apella maaru malangizo a attiittho, ohikhoote ddoohuddiha dda amaayo.

⁹ Ddiri wonanko enduwira yamalluwa yooreera omuruni wawo. Ddiri wonanko ogufu wa munikohini mwawo.

¹⁰ Mwanaka, athu oonanara yaapaallaka yaawuukopaka ohiwiiwellelleke.

¹¹ Yallota wi, “Nithware wi namwiipitthelle muthu wi nimwiiphe, namwiipitthelle muthu oohilakwa.

¹² Hankoni naamirye eri akumi wonanko ellapo ya ookhwa. Hankoni naahopelle amututha wonanko oovuhelliwa mu mahame.

¹³ Vano nineerophwanya ddeko ddinchichi ddoowallamella mutengo, enyumba ddahu ddineeroddalla ni ddawaakha.

¹⁴ Hanko ovollowe mu mullokwaahu vawi nineerokawana attheene eyuumaahu.”

¹⁵ Mwanaka, ohineetakana athu yaalla, ohinathaananakana mu ettilla ddiwa.

¹⁶ Manyallwiiwa ennaakuvella ddoonanara nave enathamakella wiipha.

¹⁷ Khe waaphaama oreya nikwekwe epallame yoonaka.

¹⁸ Koma athu yaalla eniireya nthavi weekhiiwa, nthavi nno ninaawiiphe.

¹⁹ Wenngu sika omalla wa athu oopata eyuuma mwa ettilla ddoohitthopoowa. Eyuumeeyo ennawiipha ayo yaakhille.

Ezeru ennachenjeza

²⁰ Ezeru enniithana m'misewuni, ennakhuwa m'misikani.

²¹ Ennakhuwa vaddullu va esiri ni va millako dda muzinda mvo athu enatthukumaniiwa.

²² “Nyu eenamwani, munaakhalleke eenamwani ophiyera niini? Nyu oovevulla munaavevulleke ezeru ophiyera niini? Nyu ookarangeya, munaayiiteke ezeru ophiyera niini?

²³ Apellani maaru kaawuuhumullullakani vawi kinapaalla wuulleellani ddiri m'murimani mwaka nave mudduwelle maganizwaaka.

²⁴ Kookhalla kiwiithanakani koma khemwaakaapenlle maaru, kahookolla nnatta koma khemwaakipwathille.

²⁵ Mwaavevulla malangizwaaka nave khemwaawiiwellelle ohumullulla waka.

²⁶ Sika kineerewuuttheyani mwaahoosiwaka. Kineerewuunyemullani mwaakumanaka ni ddookatamiha,

²⁷ ddaaphiyaka wa nyuwaano wonanko namondwe, otulli waawuuphiyellakani wonanko namangalle, ddoohoosa ni ddookatamiha ddaawuumorellakani.

²⁸ Muneerekokiithana koma ngiwaakhullakani. Muneerekokaashaashesesa koma khamukiphwanyaka

²⁹ vawi mwahiita ezeru nave khemwaatthoonlle owoova Apwiya.

³⁰ Khemwaapaallille malangizwaaka nave khemwaakaapenlle maaru kuuchenjezeemini.

³¹ Muneerocha ezipaso dda mitteko ddanyu nave muneerovona ddoonanara nnddo mwapaalleenyu oweerella amodda.

³² Athu eenamwani eneerewiiphiwa ekaamba ya ohollowa wiwa. Nave ookarangeya eneerewoonongeya ekaamba ya ohipwatha wiwa.

³³ Koma oyo anakiiwellella aneeroteteziwa, aneerokhalla mwamurendelle nave khoovaka erive ello.”