Mitteko 9 - Mawu a Mulluku

Orukunuwa murima wa Saulo

¹ Vano Saulo aavirellellave owoopopiha oohuddera a Apwiya wi aneeroowiipha. Aaya wa mullupa mukutho muullupalli,

² amuveka makalata awi adduwelliwe mu enyumba ddamavekello* o Damasiko. Vawi apaalla aaphwanyawo yakhalla moollikana ni ettilla ya Apwiya, allopwana naari atthiyana aamake aweena o Yerusalemu.

³ Saulo aatamellaka o Damasiko, moorurumusa owala woovenyera oddullu waamwaapheella.

⁴ Ahiikuha nave ahiiwa mawu awi, “Saulo, Saulo! Onakihoosella tini?”

⁵ Olliye ahaakhulla wi, “Nyu ttaani, Apwiya?” Mawaayo yahiiweya wi, “Mi tti Yesu onamuhooseewe.”

⁶ “Koma venya wi wavollowe m'muzindanimmo nave eneerewuulleella yoophwanella wi weere.”

⁷ Athu yaari ni Saulo voolendonoolla yaallakallakeya. Yahiiwa mawaayo koma kheyaamoonille muthu.

⁸ Saulo aavenya koma khaaworille woona ello akhunuullalleeye miitthwaaye. Akhwaayaayo yaamuphara nnatta eyaana mu Damasiko.

⁹ Akhanlle mallapo mararu ahoonaka nave enthawi yeeyo khaachille naari owirya ello.

¹⁰ O Damasikonko waakhalla oohuddera mmodda nnddina naye Ananiya.* Apwiya yaamulleella muullohani wi, “Ananiya!” Olliye ahaakhulla wi, “Tti mi Apwiya.”

¹¹ Apwiya yaallota wi, “Venya oye omusewuni wa m'muzindanimmu wooromolliwa, ‘Musewu wowookowa.’ Khawe o enyumba ya Yudasi wenko wakohere dda muthu nnddina naye Saulo a o muzinda wa Tariso vawi animavekella.

¹² Nave muullohani mwaye oomoona muthu nnddina naye Ananiya awiille navettho iiyaatthi mattaaye va olliye wi oonettho.”

¹³ Ananiya ahaakhulla wi, “Apwiya, athu anchichi aakilleella dda muthu yoolla navettho wi oheera ddoonanara wa athwaanyu a o Yerusalemu.

¹⁴ Vano oowa wuno o Damasiko ni olamulello wa allupa mukutho uullupalli wi aamake athu attheene enuullapellani nyuwaano.”

¹⁵ Koma Apwiya yaallota wi, “Khawe kaambiiwa koomutthoolla wi akhalle echipangizwaaka, allalleye nnddina naka wa athu ayo ehiri Aisraele ni mamwene ni athu a o Israele.

¹⁶ Vawi kineeromooniha mmo anaahoowelleeye wunchichi ekaamba ya nnddina naka.”

¹⁷ Vano Ananiya aatimulla, avollowa mpa mwaari Saulooyo, iiyaatthi mattaaye va olliye allota wi, “Mwanamunnaka Saulo, Apwiya Yesu aakiruma miyaano yeekhiwa, tti yaalla yawooneyelle vamusewuni waweewe wuno. Ekirumalle wi woonettho ni ohoollelliwa ni Munepa Waweella.”

¹⁸ Enthawi yeeyo m'mwiitthoni mwaye mwaakhuma ddeko ddawooneya wonanko makarumbasa ahomba nave ahaambattho woona. Nave aavenya abatiziwa.

¹⁹ Nave achilleeye yoocha, aakhallattho ni masiva. Saulo aakhalla ni ookhulupilila mu Damasiko wa mallapo ooyeva.

Ollalleya wa Saulo o Damasiko

²⁰ Enthawi yeeyo ahaamba ollalleya mu enyumba ddamavekello wi Yesu tti Mwaana a Mulluku.

²¹ Athu attheene yamwiiwalle yaanattikhina nave enakoha wi, “Muthu yoolla khe olle awiiphalle athu yamullapella Yesu o Yerusalemu? Ethiyo awiille wuno wi aaphareke athu ayeena wa allupa mukutho uullupalli?”

²² Koma Saulo aavirellella ollalleya mwamasiva manchichi. Nave ahaahalleelliha Ayuda ookhalla o Damasiko voowoonihellani wi Yesu sika Mesiya.*

²³ Viviralle mallapo manchichi Ayuda yaakumana vamodda nave yiiwanana wi emwiiphe Saulo.

²⁴ Koma aalleelliwa wi athu amodda anapaalla omwiipha. Otthaana ni mahiiyu yaanamutiyera vamillakoni dda muzinda wi emwiiphe.

²⁵ Mahiiyu mamodda oohuddera yaamukusa emukhumihella vaatte oweella vasirini voomukitthihani akeraatthille m'mutaangani.

Saulo o Yerusalemu

²⁶ Saulo aphiyalleeye o Yerusalemu aapaalla wi akhallena m'mullokoni wa oohuddera koma attheene yaanamoova vawi kheyaakhulupililalle wi olliyooyo tti oohuddera.

²⁷ Koma Baranaba aawa amukavihera nave amukusa ayaana wa amurummwa. Ahaatthopoollella ddeereye wi Saulo aawoona Apwiya vamusewuni nave yaallotana. Ahaalleellattho wi Saulo aallipa murima voollalleyani mu nnddina na Yesu mu Damasiko

²⁸ Vano Saulo aakhalla ni alliwaayo eeteeta mu Yerusalemu mutthemwene allalleyaka moollipa murima mu nnddina na Apwiya.

²⁹ Aallotattho ni okambirana ni Ayuda oollota Egriki nave alliwaayoottho yaapaalla omwiipha.

³⁰ Ookhulupililaayo yiiwalliiwa ya yeella, yaamukusa Saulo eyaana o muzinda wa Kaisareya nave emurumiha o Tariso.

³¹ Nave mipingo dda mu ezigawo ddittheddene dda Yudeya, Galileya ni Samariya ddaari mu enthawi yamurendelle. Vookaviheriwani ni Munepa Waweella mipingo ddahunnuwa vookhallani ni athu anchichi vawi yaanawoova Apwiya.

Petro o Luda ni o Yopa

³² Petro aweetella athu virive veko nave nllapo nimodda aaphiya wa athu a Mulluku ayo yakhalla o Luda.

³³ Wenko aakumanawo ni muthu nnddina naye Eneya oyo aari oorakalla nave aamoona okonaatthi vamwinllini vawi khaaworille weeta wa miyakha mitthanu ni miraru.

³⁴ Petro aallota wi, “Eneya, Yesu Khrisitu ohuuchiriha. Venya nave okuse mwinllaawo.” Enthawi yeeyo Eneya aavenya.

³⁵ Athu attheene ookhalla mu Luda ni Saroni yaamoona nave yaarukunuwella murima wa Apwiya.

³⁶ Vano mu Yopa mwaakhalla oohuddera aamutthiyana mmodda nnddina naye Tabita. (Mu Egriki nnddina naye ninattaphullella Dorika.) Aaneera mitteko ddinchichi ddaphaama anaakavihera oohoowa

³⁷ M'mallaponi yaayo aavoriiwa nave aakhwa. Mutembwaaye waahapihiwa ohiyiwa mu echipinda yavaddullu.

³⁸ Yopa khaarekamellane ni Luda sika ookhulupilila a o Yopa yiiwalliiwa wi Petro aari o Luda, yahaarumiha athu eelli wi yamulleelle wi, “Mwaakuve muwe wuno.”

³⁹ Vano Petro aatimulla athaananana athwaayo. Aphiyalleeye, aakusiwa aya mu echipinda yavaddullweelle, wenko anaamukhwelle attheene yaatthukumana emwaapheella yinllaka nave emoonihaka malaya ni ddoowara ddittheddene Dorika asowilleeye ari mukumi.

⁴⁰ Petro ahaakhumiha attheenaayo muchipindanimmo, akokhora nave avekella. Vano aarukunuwella waari mutembooyo allota wi, “Tabita, venya!” Aakhunuulla miitthwaaye nave amoonilleeye Petro, aavenya akeraatthi.

⁴¹ Petro aamuphara nnatta nave amukavihera wi iimelle. Vano aawiithana athu a Mulluku ni anaamukhwellaalle nave aawoonihella alliwaayo Dorikooyo ari mukumi.

⁴² Epilli yeella yaavuwa mu Yopa mutthemwene nave wa athu anchichi owaakhulupilila Apwiya.

⁴³ Nave Petro aakhalla o Yopa mallapo manchichi ni muthu oopanga mattapara nnddina naye Simoni.