Mitteko 8 - Mawu a Mulluku

¹ Nave Saulo aaniiwanana ni wiiphiwa wa Sitefanonko. Nllapo nene nenno mpingo wa o Yerusalemu wahaamba ohoosiwa wunchichi. Ookhulupilila attheene waahiya amurummwa, yaapallalleyella mu echigawo ya Yudeya ni ya Samariya.

Saulo anahoosa mpingo

² Athu amodda oomullapella Mulluku yaavittha mutembo wa Sitefano emwinllellattho wunchichi.

³ Koma Saulo aheeseesa woononga mpingo. Aavollowa mu enyumba ddittheddene aapurullamo ookhulupilila attheene, allopwana ni atthiyaneene nave aahiya mundende.

Othenga waphaama onallalleyiwa o Samariya

⁴ Ookhulupilila yapallallesiwaayo yaaya mu echigawo ettheene, ellalleyaka othenga waphaama.

⁵ Nave Filipo* aaya o muzinda muullupalli wa Samariya aallalleyella athu dda Mesiya.*

⁶ Athu anchichi yahaapella maaru wi yiiwe ddalloteeye ni woona ddoottikhiniha aneereeye.

⁷ Minepa ddoonanara ddaakhuma mwa athu anchichi ddinllaka mookhuwa nave athu anchichi ookhwa meto ni oorakalla yaachirihiwa.

⁸ Vano mwaakhalla ehakallallo yinchichi m'muzindanimmo.

⁹ Muthu mmodda nnddina naye Simoni akhalla wenko. Nayeenettho khalle aanaattikhiniha athu a o Samariya ni masengaaye nave aanallota yeekha wi olliye tti muullupalli.

¹⁰ Nave arive muthu m'muzindanimmo, waambeella muullupalli ophiyera mung'onong'ono yaanamwaapella maaru enallota wi, “Muthu yoolla sika masiva a Mulluku ooromolliwa, ‘Masiva muullupalli.’ ”

¹¹ Yaamwaapella maaru kaambiiwa enthawi yoorekama ahaattikhiniha athu ni masengaayo.

¹² Koma yakhulupililalliiwa othenga waphaama dda omwene wa Mulluku ni dda Yesu Khrisitu woollalleyiwa ni Filipo, yaabatiziwa allopwana ni atthiyaneene.

¹³ Simoni nayeenettho aakhulupilila nave abatiziweeye, aamuthwara Filipooyo nave aattikhina oonilleeye ezizindikiro ni ddoottikhiniha dduullupalli ddeeriwannddo.

¹⁴ Amurummwa ayo yaari o Yerusalemu yahiiwa wi athu a o Samariya ahaakhullella mawu a Mulluku, yahaarumawo Petro ni Yohane.

¹⁵ Yaphiyalliiwa, yahaavekella ookhulupililaayo wi yaakhelle Munepa Waweella.

¹⁶ Vawi Munepa Waweella aari ahinaakitthelle athwaayo, yaarimoona obatiziwa mu nnddina na Apwiya Yesu.

¹⁷ Nave Petro ni Yohane yahiiyaatthi mattiiwa va athwaayo nave yahaakhella Munepa Waweella.

¹⁸ Simoni oonilleeye wi Munepa Waweella aavahiwa wa ookhulupililaayo, amurummwa yiiyaatthilliiwa mattiiwa va athwaayo, aapaalla waavaha makobiri Petro ni Yohane,

¹⁹ nave aallota wi, “Mukivahe masiva yaalla wi arive muthu kinaamwiiyaattheemi mattaaka aakhelleke Munepa Waweella.”

²⁰ Koma Petro aamwaakhulla wi, “We ni makobiraawaayo mukhwelle nimodda kaambiiwa waaganiza okulla emphaso ya Mulluku voovelleellani makobiri!

²¹ Kheyiivo yawaakhella apaalle yawuukawella ya muttekwaahoolla kaambiiwa murimaawo khori phaama vamiitthoni va Mulluku.

²² Vano ohiye ddeko ddoonanaranndda nave ovekelle wa Apwiya wi yuukhululukelle maganizwaawo oonanara.

²³ Vawi kohoona wi wookhalla ni ehache yuullupalli ni wi woomakiwa ni meerellwaawo oonanara.”

²⁴ Simoni aallota wa Petro ni Yohane wi, “Kivekellelleni wa Apwiya wi ehikhallevo ello emodda ya ddeko ddenndda mullotilleenyunndda enaakeereyelle.”

²⁵ Yamallihalliiwa ovelleella omboniiwa ni ollalleya dda othenga wa Apwiya, Petro ni Yohane yaahokollweella o Yerusalemu. Yarowiiwa yaallalleya othenga waphaama m'mizi ddinchichi o Samariya.

Filipo ni muthu muullupalli a o Etiyopiya

²⁶ Mungelo a Apwiya aallota wa Filipo wi, “Venya nave oyeelle omwera okuse musewu woovenyera o Yerusalemu oya o Gaza.” (Muttano musewu yoolla khoneetiwa.)

²⁷ Nave aavenya ayaawo. Vano waakhalla muthu mmodda oohulliwa* oovenyera o Etiyopiya. Olliye aarittho muullupalli oomurumeyella Kandake, mwene aamutthiyana a o Etiyopiyanko ni oowehera eyuumaaye ettheene. Awiille o Yerusalemu wi amullapelle Mulluku.

²⁸ Vano aamahokollweella owaniwa nave aari awenlle garetaaye, eerengaka nibukhu na namallotella Yesaya.

²⁹ Nave Munepa Waweellooyo aallota ni Filipo wi, “Khawe waatamelle va vanigaretanimvo.”

³⁰ Vano Filipo aamuthamakella nave aamwiiwa eerengaka nibukhu na namallotella Yesaya, amukoha wi, “Onniiwesesa oneerengeewenndda?”

³¹ Nave olliye aallota wi, “Kinaawiiwesese mwawiidde ahiivo oyo anakittaphullella?” Vano aamwiithana Filipo wi awelle akeraatthina vamodda.

³² Vano mawu a Mulluku eerengeeyaayo yaari wi, “Wonanko enkhosa yookusiwa wi yiiphiwe, wonanko mwaanaankhosa oomaalleya voomuchemani, olliye khaawakhunlle ello.

³³ Aavevulliwa nave khaaweruziwe mwa echilungamo. Khaavo anaawore ollota dda edduullu ddaye kaambiiwa okumaaye va ellapo yavatthi waakusiwa mwa olliye.”

³⁴ Muullupallooyo aamukoha Filipo wi, “Killeelleni, namallotelloolla anallota ddawani? Ddayeekha apaalle dda muthu mmodda?”

³⁵ Vano Filipo ahaamba ollota, aambeelle va mawu yaalla, aamullalleyella dda othenga waphaama dda Yesu.

³⁶ Yavirellelliiwa ni musewooyo, yaaphiya vanipuroni vamodda vookhalla maaddi nave muullupallooyo aallota wi, “Ngoona maaddi, yookihiiha ttiivi wi kihibatiziwe?”

³⁸ Muullupallooyo ahiimesa nigaretanno nave Filipo ni muullupallooyo yaakitthella m'maaddinimmo nave Filipo aamubatiza.

³⁹ Yakhumalliiwa m'maaddinimmo, Munepa a Apwiya aamukusavo Filipooyo. Muullupallooyo khaamoonille wiilli nave aavirellella olendwaaye addalliwe ni ehakallallo.

⁴⁰ Filipo oonille wi ari mu muzinda wa Azoto ovenyera wenko aayattho o Kaisareya nave muttilla mutthemwene avireeyemo aanallalleya mu erive etawoni othenga waphaama.