Mitteko 6 - Mawu a Mulluku

Athu atthanu ni eelli ookavihera mpingo

¹ Mallapo yaayo ookhulupilila yaatiiwa, Ayuda oollota Egriki yaanakangana ni Ayuda oollota Eheberi kaambiiwa anaamukhwelliiwa kheyaavahiwa ddookawiwa dda nllapo ni nllapo.

² Vano amurummwa khumi ni eellaayo yahiithaniha mulloko wookhulupilila muttheenooyo vamodda ellota wi, “Khe ddaphaama wi hiyaano nihiye ollalleya mawu a Mulluku wi niwehereke okawiwa wa ddoocha.

³ Sika, asinnaka ni arokoraka, atthoolleni mwa nyuwaano athu atthanu ni eelli oodduwanyeya wi tti oohoollelliwa ni Munepa Waweella ni eezeru nave naavahe mutteko yoolla.

⁴ Hiyaano nineerollipihella ovekella ni ollalleya mawu a Mulluku.”

⁵ Athu attheene yaahakallalla ni nnddo yallotille amurummwa, sika yaamutthoolla Sitefano, muthu ooddalla ni echikhulupililo ni Munepa Waweella. Navettho yahaatthoolla Filipo,* Prokoro, Nikanore, Timoni, Parmenasi ni Nikolasi a o Antiyokeya* oyottho ahaari Muyuda koma athwara echikhulupililo ya Ayuda.

⁶ Mullokooyo wahaavelleella athwaayo wa amurummwa, ayo yaavekenlle navettho yaadalisalle vawiiyaatthini mattiiwa va miru ddiwa.

⁷ Mawu a Mulluku yaavirellella ovuwa. Nave ookhulupilila a mu Yerusalemu yahaata nave allupa mukutho anchichi yahaakhullella echikhulupililweeyo.

Ayuda enammaka Sitefano

⁸ Sitefanooyo aaddalla ni echisomo ni masiva ddoovenyera wa Mulluku wawi aheera ddoottikhiniha dduullupalli ni ezizindikiro ddinchichi variyari va athu.

⁹ Nave aavaanyihiwa ni Ayuda amodda oovenyera o Kurene ni Alekizandriya ayo yavenyera o enyumba yamavekello yooromolliwa wi enyumba yamavekello ya athu oottaphulliwa okaporo. Aanavaanyihiwattho ni Ayuda oovenyera o ezigawo dda Silisiya ni Asiya.* Attheenaalla yahaamba ovaanyihana ni Sitefano.

¹⁰ Koma kheyaaworille ollipana ni ezeru nnddo Sitefano avahiweeye ni Munepa Waweella mu ddoollota ddaye.

¹¹ Vano yahaaphwanya athu amodda yaavaha makobiri wi yalloteke wi, “Naamwiiwa amullotellaka epewe Mose ni wa Mulluku!”

¹² Sika Ayuda, attekweeniiwa ni ahuddihi a malamulo* yaamushella murima Sitefano. Yaamuphara Sitefano emukusella vanthatoni namillatu.

¹³ Nave yaawaana amboni awoottha ayo yallota wi, “Muthu yoolla khahiyalle ollota ddoovaanyiha nipuro noopatuleya ni malamulo a Mose.

¹⁴ Naamwiiwa allotaka wi Yesu a o Nazareti aneerokumulla enyumba ya Mulluku navettho aneerowaakakhaniha malamulo mattheene a makhollwaahu ayo Mose aavahilleeye makhollwaahu!”

¹⁵ Attheene ayo yakeraatthille va nthato na millatunno yaamuwehesesa Sitefano nave yahoona ekhovaaye yooneyaka wonanko ya mungelo a Mulluku.