Mitteko 5 - Mawu a Mulluku

Mwaha wa Ananiya ni mwaariye Safira

¹ Waakhalla muthu mmodda nnddina naye Ananiya.* Olliyoolla ni mwaariye yaakulliha ematiiwa.

² Ananiya aavukullawo makobiraayo mwaariye adduwellaka nave oohallaayo avelleella wa amurummwa.

³ Petro aallota wi, “Ananiya kaambiiwa tini Satana addanlleeye m'murimani mwawo wi woottotthe Munepa Waweella voovukullani makobiri waakhenlleewe okullihalle emataawo?

⁴ Ohinakullihe emateeyo yaari yaawo nave oyikullihalle makobiraayo yaari aawo. Kaambiiwa tini, waganizalleewe weera ello yeella? Khowoottotthille athu koma omoottotthille Mulluku!”

⁵ Ananiya iiwalleeye mawu yaalla, ahiikuha akhwa nave attheene ayo yiiwalle dda yeella yahoova.

⁶ Asombwe amodda yaawa, ehuruwella mutembwaayooyo mukuwoni, etukhulla yawuvittha o mahame.

⁷ Viviralle maora mararu, mwaariyoolle aavollowa moohidduwella yeereyilleeyo.

⁸ Petro aamukoha wi, “Okilleelle, Weyaano ni mamuno mwakullihalle emateeyo makobiriine yaallave?” Mutthiyanooyo ahaakhulla wi, “Ddawoona, tti yaallave.”

⁹ Vano Petro aallota wi, “Kaambiiwa tini wiiwananneewe ni mamunooyo wi muweese Munepa wa Apwiya? Asombwe emuvitthalle mamuno eri vamullakonimvo nave eneerewuutukhulla wi yuuvitthe naweenettho!”

¹⁰ Enthawi yeeyo ahiikuha vakhuviru ni Petro akhwa. Vano asombwaalle yavollowiiwa yaamoona wi ookhwa, emutukhulla nave yamuvitthattho vakhuviru ni mahame a mamune.

¹¹ Mpingo muttheene ni athu amodda attheene ayo yiiwalle ddenndda yahoova.

Amurummwa eneera ddoottikhiniha

¹² Amurummwa yaheera ezizindikiro ddinchichi ni ddoottikhiniha ddinchichi variyari va athu. Ookhulupilila attheene yaanatthukumana vamodda ni murimiiwa muttheene moowiiwanana mu Nikhote na Solomoni mu enyumba ya Mulluku.

¹³ Kheyaarivottho athu amodda ayo yatthukumannena vamodda ni mpingooyo kaambiiwa athu yaanoova koma athwaayo yaanallota ddaphaama ddiwa.

¹⁴ Athu anchichi, allopwana ni atthiyana yahaamba okhulupilila mwa Apwiya.

¹⁵ Ekaamba ya mitteko dda amurummwa, athu oovoriiwa yaanakhumihelliwa omusewuni ekonaatthille vamachirani ni vaminllini wi Petro aaviraka naari muuthuuchaayeve waaphwanye.

¹⁶ Nave athu anchichi yaawa ovenyera o etawoni ddoomwaapheella Yerusalemu. Yaawaana athu oovoriiwa apaalle athu ookhalla ni minepa ddoonanara nave attheenaayo yaachirihiwa.

Amurummwa enaamba ohoosiwa

¹⁷ Vano mullupa mukutho muullupalli ni akhwaaye, ayo yaari a mulloko wa Asaduki,* yahaakhallella ehache amurummwaayo, sika yaapaalla oweerella ello.

¹⁸ Yahaaphara amurummwaayo yaahiya mundende.

¹⁹ Koma mahiiyu yaayo mungelo a Apwiya aahulla millako dda ondendenko, aakhumiha amurummwaayo, aalleella wi,

²⁰ “Khaweni mu enyumba ya Mulluku nave mwaalleelle athu dda okumi wanaanweenoolla.”

²¹ Amurummwaayo yahiiwellella nave ohinase yaavollowa mu enyumba ya Mulluku yaamba ohuddiha. Mullupa mukutho muullupalli ni akhwaaye yaawiithana attekweene attheene a millatu a Ayuda omutthukumanoni wa vanthatoni namillatu. Vano yahaarumiha akhoto ondende wi yaakuse amurummwaalle eweena vamiitthoni viwa.

²² Koma akhotwaayo yaphiyalliiwa ondendenko, kheyaaphwanyillemo amurummwaayo. Sika yaahokollowa yallota wi,

²³ “Naphiyalleehu ondendenko, naphwanyille millako ddiwalliwe ni oowehera attheene eweheraka m'millakonimmo. Koma nahullalleehu millakonnddo, khanaamphwanyillemo muthu!”

²⁴ Ooholleella a oowehera o enyumba ya Mulluku ni allupa mukutho uullupalli yiiwalliiwa yeella, yaahalleelliwa nave yaanakhupanya eyo enaaweereye muhoollo.

²⁵ Vano muthu mmodda aavollowa nave allota wi, “Ngiiwani! Athu mwaahiyalleenyu mundendaalle eri mu enyumba ya Mulluku, enaahuddiha athu!”

²⁶ Vano ooholleella ni oowehera o enyumba ya Mulluku yaatimulla eya yaakusattho amurummwaayo. Kheyawaakusalle mwakhoto kaambiiwa yawoova athu wi yaawerowaavokha malluku.

²⁷ Yawiilliiwana amurummwa, yaawiimesa vamiitthoni va attekweene a millatu nave mullupa mukutho muullupalli aamba waakoha.

²⁸ Aallota wi, “Valle nahuuhiihani wi muhihuddihe wiilli muromollaka nnddina na muthu yoolla koma moovuwiha ehuddihwaanywiilla mu Yerusalemu mutthewene nave munapaalla muniphwanyelle mullatu wawi tti hiyaano namwiiphalle!”

²⁹ Koma Petro ni amurummwa akhwaayaayo yahaakhulla wi, “Ninaphwanella omwiiwellella Mulluku ohiyana ni owiiwellella athu.

³⁰ Mulluku a makhollwaahu aamuvenyiha Yesu wa ookhwa, nyuwaano mumwiiphalle nave mumutthomeyille vamutandani.

³¹ Yooyo Mulluku aamuwelliha akhalla onnattanatta naye wi akhalle Oohoollella navettho Oovullusa wi aavahe athu a o Israele ekari yoorukunuwa murima ni okhululukelliwa machimwiiwa.

³² Hiyaano tti amboni a ddeko ddenndda vamodda ni Munepa Waweella, oyo Mulluku aavahilleeye ayo enamwiiwellella olliye.”

³³ Athu a va nthato namillatu yiiwalliiwa yeella, yaananariwa wunchichi wawi yaapaalla owiipha amurummwa.

³⁴ Koma waakhalla muthu mmodda a Afarisi* nnddina naye Gamaliyeli oyottho aari muhuddihi a malamulo* nave ooriiheya ni athu attheene. Ahiimella vanthatoni namillatunno aalamulella wi amurummwa ekhumihiwe vaatte vang'ono.

³⁵ Nave aallota wa athu attheene a vanthatonimvo wi, “Aisraele akhwaaka, chenjerani wa eyo munapaalleenyu wi muweerelle athwaalla.

³⁶ Munnuupuwella wi Teyudasi aawa khalle valle allotaka wi olliye tti muthu awiiweya nave athu vakhuviru 400 yaamuthwara. Koma iiphiwe, attheene yamuthwanraalle yaapallalleya nave mullokwaayooyo waamallavo.

³⁷ Aviralle yooyo, Yudasi a o Galileya aawattho enthawi ya kalembera akopa mulloko wa athu anchichi koma nayeenettho ahiiphiwa nave attheene yamuthwanraayo yaapallalleya.

³⁸ Ekaamba ya mwaha yoolla, kinimuulleellani, muheere erive ello va athu yaalla. Mwaahiye! Eneereewanndda ddakhalla ddoovenyera wa athu ddineeromalla.

³⁹ Koma eneereewanndda ddakhalla ddoovenyera wa Mulluku, khamuwora waahiiha. Muneerewoona nyookha wi munallipana ni Mulluku!” Athu a va nthato na millatwaayo yaakopiwa ni Gamaliyelooyo.

⁴⁰ Yaawiithana amurummwaayo wi evollowe, yahaawashulla, yaalamulella wi ehiromollettho nnddina na Yesu nave yahaattaphulla.

⁴¹ Amurummwaayo yavenyilliiwa o nthatoni namillatu nko, yaahakallalla wi Mulluku aaweerengella alliwaayo wi tti woophwanella ohoosiwa ekaamba ya nnddina na Yesu.

⁴² Nave nllapo ni nllapo mu enyumba ya Mulluku ni mu enyumba dda athu yaavirellella ohuddiha ni ollalleya othenga waphaama wa Yesu, Mesiya.*