Mitteko 4 - Mawu a Mulluku

Petro ni Yohane vanthatoni na attekweene a Ayuda

¹ Petro ni Yohane yallotiiwa wa athu, allupa mukutho amodda ni oohoollella a akhoto oowehera enyumba ya Mulluku vamodda ni Asaduki* amodda yaaphiya.

² Alliwaalla yaananariwa kaambiiwa amurummwa eellaalla yaanaahuddiha athu wi ttuuvenya wa ookhwa kaambiiwa Yesu aavenyattho wa ookhwa.

³ Vano yahaaphara yaahiya mundende ophiyera osaka wene vawi waari osikuwalle khalle.

⁴ Koma mwa athu yiiwalle othengooyo anchichi yaakhulupilila. Nave waata wa athu ookhulupilila wahaanjerereya ophiyera 5,000.

⁵ Vano osaka wene oohoollella ni attekweene a Ayuda* ni ahuddihi a malamulo* yaatthukumana o Yerusalemu.

⁶ Yaakumana ni Anasi, mullupa mukutho muullupalli ni Kayafa, Yohane ni Alekizandro navettho athu attheene amodda a munibanjani na mullupa mukutho muullupallooyo.

⁷ Yaawiimesa amurummwaayo variyari viwa yaakohaka wi, “Mweerille ddenndda mwawiidde, tti masiva awiidde muriinyuna navettho mweerille ddenndda mu nnddina nawani?”

⁸ Vano Petro, ahoollelliwe ni Munepa Waweella, aawaakhulla wi, “Oohoollella a athu ni attekweene,

⁹ naakohiwaka ollello dda mitteko ddaphaama ddeerelliwe muthu ooheetoolle wi achirihiwe mwawiidde,

¹⁰ vano attheenenyu mudduwelle ni athu attheene a o Israele edduwelle wi muthoolla ohiimella achirihiwe ekaamba ya masiva a nnddina na Yesu Khrisitu a o Nazareti, oyo mwamutthomeyilleenyu vamutandani nave oyo Mulluku aamuvenyihalleeye wa ookhwa.

¹¹ Dda Yesooyo mawu a Mulluku enallota wi, ‘Nlluku nno nakhootiwe ni oomaka enyumba nenna naakhalla nlluku noopaalleya.’

¹² Nave khaavo muthu koma Yesuve oyo anawora waavullusa athu vawi va ellapo yavatthi ettheene khaniivo nnddina nimodda navahiwe ni Mulluku wi nivullusiwena.”

¹³ Attekweene a Ayuda yoonilliiwa ollipa murima wa Petro ni Yohane nave wi yaari athu shisha oohihuddera, yaattikhina. Navettho yaadduwella wi yaanakhalla vamodda ni Yesu.

¹⁴ Koma kheyaari ni yoollota kaambiiwa yaamoona muthu oochirihiwooyo iimenlle vamodda ni Petro ni Yohane.

¹⁵ Sika yahaalamulella wi ekhume vaatte vanthatonno nave vano yahaamba okambirana weekhiiwa.

¹⁶ Yaakohana wi, “Niweere tini athwaalla? Athu attheene mu Yerusalemu ennadduwella wi athwaalla aheera yoottikhiniha nave hiyaanottho khaniwora okhoota.

¹⁷ Koma wi ehivirellelle ovuwiha wa athu amodda, niwoopopihe wi ehiromollettho nnddina na Yesu.”

¹⁸ Vano yaawiithana yaalamula wi ehiromolle apaalle ohuddiha nnddina na Yesu.

¹⁹ Koma Petro ni Yohane yaawaakhulla wi, “Mukamulle nyookha waari waphaama wa Mulluku, owiiwellellani nyuwaano apaalle omwiiwellella Mulluku.

²⁰ Vawi khaniwora ohiya ollota dda ello noonilleehu ni wiiwa weekhiihu.”

²¹ Vano a va nthato na millatwaayo yaawoopopiha ohiyana ni vawaamba valle nave yahaattaphulla wi eroweke. Vawi kheyaadduwella wi enaallake mwawiidde kaambiiwa athu attheene yaanamutitimiha Mulluku va ddeko ddeereyillennddo.

²² Nave muthu oyo achirihiwe moottikhiniha, aari ni miyakha ddookhwaranya 40.

Ookhulupilila enavekella vamodda

²³ Yaattaphullalliiwa, Petro ni Yohane yaahokollweella wa ookhulupilila akhwiiwa nave yaalleella ddallotiwe ni allupa mukutho uullupalli ni attekweenaayo.

²⁴ Ookhulupililaayo yiiwalliiwa, yaavekella ni murimiiwa muttheene moowiiwanana wa Mulluku wi, “Apwiya nyuwaano muri oophatusa oddullu, ellapo yavatthi, enyanja ni ddittheddene ddiri mwemmo!

²⁵ Ni Munepa Waweella mwaallota mwa nikhollo nahu Davide, oorumeyellaanyu, allotilleeye wi, ‘Athu oohimullapella Mulluku yashelle tini murima athu yiiwananelle tini va ddeko ddoohikhalla ni mutteko?

²⁶ Mamweniiwa ennapangana ddakhoto, oolamulelliiwa enniiwanana ddoonanara, ddawaawukila Apwiya ni Mesiyaaye.’*

²⁷ Vawi tti ddawoona wi mwene Herode* ni oolamulella Pontio Pilato yaatthukumana m'muzindani mulle ni athu oohimullapella Mulluku navettho athu a o Israele ollipana ni Yesu, oorumeyellaanyu aweella, oyo mwamuzozilleenyu wi akhalle Mesiya.

²⁸ Yaatthukumana wi yeere ddittheddene nnddo mwakhozilleenyu khalle ni masivaanyu ni opaalla wanyu.

²⁹ Vano, Apwiya, neerelleni echifundo kaambiiwa ennanoopopiha nave nillipiheni hiyaano oorumeyellaanyu wi nillote othengaanyu moollipa murima wunchichi.

³⁰ Onihani masivaanyu wi ochiriha, ezizindikiro ni ddoottikhiniha ddeeriwe mu nnddina na oorumeyellaanyu aweella, Yesu.”

³¹ Yamallihalliiwa ovekellanko, vanipuroni mvo yatthukumanniiwa vaatikheya. Attheenaayo yaaddalliwa ni Munepa Waweella nave yaamba ollalleya othenga wa Mulluku moollipa murima.

Ookhulupilila enakawana ddeko ddiwa

³² Mulloko wa ookhulupililaayo waari wowiiwanana m'murimani mwiwa mutthemwene ni m'maganizoni mwiwa mutthemwene. Khaarivo oyo allotille wi ello aariiyena tti yaayeyaaye koma yaanakawana attheene ddeko ddittheddene yaariiwana.

³³ Amurummwaayo yaavelleella omboni mwamasiva muullupalli dda ovenya wa ookhwa wa Apwiya Yesu nave Mulluku aaweerella echifundo yuullupalli.

³⁴ Khaarivo muthu a va mullokwiiwa oyo aari oopaalla ello. Vawi ayo yaari ni emata apaalle enyumba yaanakulliha nave makobiri yaakhelliiwa yakulliha yaanawaana,

³⁵ yaavelleella wa murummwa nave makobiraayo yaanakawiwa wa arive muthu ollikana ni opaalla waye.

³⁶ Nave waakhalla muthu mmodda nnddina naye Yosefe a nlloko na Levi oyo avenyera o Kupro. Amurummwa yaamuvaha nnddina nawi, Baranaba ottaphullella wi, “Oollipiha murima.”

³⁷ Aakulliha emataaye awaana makobiraayo, aavelleella wa amurummwa.