Mitteko 3 - Mawu a Mulluku

Ochirihiwa wa mullopwana ookhwa meto

¹ Nllapo nimodda Petro ni Yohane yaaya o enyumba ya Mulluku 3 koloko otthaana eyo yaari enthawi yamavekello.

² Nave muthu mmodda ookhwa meto eyariwellwaaye aakuselliwawo. Olliyooyo mallapo mattheene aanakusiwa anahiyiwa vamullakoni wa enyumba ya Mulluku wooromolliwa “Mullako Wooreera” wi aavekeke makobiri athu yaavollowaka mu enyumba ya Mullukweeyo.

³ Awoonilleeye Petro ni Yohane ewaaka wi evollowe mu enyumba ya Mulluku, ahaaveka makobiri.

⁴ Alliwaayo yaamuwehesesa nave Petro aallota wi, “Niwehe hiyaano!”

⁵ Ahaaweha, anatiyera wi aakhelle ello.

⁶ Koma Petro aamulleella wi, “Makobiri nginna koma kineerewuuvaha kiriimina. Mu nnddina na Yesu Khrisitu o Nazareti kinuulamulella wi, venya weete.”

⁷ Vano aamuphara nnattanatta amwiimesa. Enthawi yeeyo manyallwaaye ni mookumanella manyallo ni meto mwaallipa.

⁸ Aallupha, iimella nave aneeta. Vano aavollowana mu enyumba ya Mulluku, eetaka, alluphaka, amutitimihaka Mulluku.

⁹ Nave athu attheene yaamoona eetaka amutitimihaka Mulluku.

¹⁰ Nave yaamudduwella wi tti yoolle akeraatthi va Mullako Wooreera wa enyumba ya Mulluku avekaka. Yaattikhina ni ohalleella va ddamweereyellennddo.

Ollalleya wa Petro mu enyumba ya Mulluku

¹¹ Muthooyo aaphareelleeye Petro ni Yohane mu nikhote nooromolliwa wi Nikhote na Solomoni, athu attheene yaathamakellawo moottikhina.

¹² Petro awoonilleeye athwaayo, aallota wi, “Aisraele nyu, munattikhinella tini ni yeella apaalle munaniweherati wonanko nimweetihalle muthoolla ni masivaahu apaalle wi niri aweellesesa?

¹³ Mulluku a Abrahamu, Mulluku a Isaki ni Mulluku a Yakobo, Mulluku a makhollwaahu, aamutitimiha Oorumeyellaaye, Yesu, voomuchirihani muthoolla. Koma Yesu yoolla mwaamuvelleella wa oolamulella navettho mwaamukhoota vamiitthoni va Pilato naari Pilato apaallille wi amuttaphulle.

¹⁴ Mwaamukhoota oyo aari aweella ni oolungama nave mwaamuveka Pilato wi uuttaphullelleni muthu awiipha.

¹⁵ Nave mwaamwiipha oyo aari oovaha okumi koma Mulluku aamuvenyiha wa ookhwa nave hiyaano tti amboni a ddenndda.

¹⁶ Nnddina naye ni echikhulupililo mu nnddina naye sika emullipihalle muthu ooheeta olla munamooneenyu nave munamudduwelleenyu. Echikhulupililwaaye mwa Yesu, yoomuchiriha muthoolla attheenenyu moonaka.

¹⁷ “Nave vano, akhwaakanyu, kinnadduwella wi nyuwaano ni attekweenaanyu mwaamweerella ddenndda Yesu ekaamba ya ohidduwella wanyu.

¹⁸ Mulluku aallotella khalle oweella mwa anamallotella attheene wi Mesiya anaphwanella wi ahoosiwe nave ddaakwakhwanihiwa.

¹⁹ Sika rukunuwani murima nave muwe wa Mulluku wi uukhululukelleni machimwaanyu

²⁰ Vano Apwiya eneerewuuvahani enthawi yawiithuuwa nave eneeromurumiha Yesu, oyo tti Mesiya, oyo amutthoonlleeye khalle ekaamba ya nyuwaano.

²¹ Anaphwanella wi akhalle oddullu ophiyera ekwakhwanihiwe enthawi yoopotokosa ddeko ddittheddene wi ddikhalle ddanaanweene moollikana ni ddallotille Mulluku oweella mwa anamallotella aweella murima ayo yaariwo mallapo akhalle.

²² Vawi Mose aallota wi, ‘Apwiya Mullukwaanyu aneerewuurumihellani namallotella wonanko miyaano ovenyera mwa nyuwaano. Mwiiwellelle erive ello anaalloteeye wa nyuwaano.

²³ Arive muthu ahinaamwiiwellelle namallotellooyo aneerewoonongiwa variyari va athu.’

²⁴ Navettho anamallotella attheene waambeella va Samuele ni yaayo yawiille vatulli vaye, yaallotella ddineereyanndda.

²⁵ Nyuwaano muri edduullu dda anamallotella nave munnakawanana dda echipangano eyo Mulluku eerilleeye ni makhollwaanyu, allotilleeye wa Abrahamu wi, ‘Mwa edduullu ddawo athu attheene a va ellapo yavatthi eneerodalisiwa.’

²⁶ Nave Mulluku amutthoonlleeye oorumeyellaaye, aambille omurumiha wa nyuwaano wi uudaliseni vooweerihani attheenenyu wi murukunuwe murima o machimwaanyu.”