Mitteko 28 - Mawu a Mulluku

Paulo o Melita

¹ Naphiyalleehu phaama omutundani, nahiiwa wi echilumbeeyo nnddina niwa naari Melita.

² Athu yakhalla vaavwaayo yaaneerella ddaphaama wunchichi. Yaanaakhella, eniividdeellella munllo wi nootheke vawi wahaamba orupa murimu navettho waanariirya.

³ Paulo aaya atotaka ekhuni nave addihenlleeye vamunlloni, enowa yaakhuma mu ekhuninnddo ekaamba yooviha wa munllooyo nave yaamulluma yaangellella onnattani naye.

⁴ Athu awenkwaayo yahoona enoweeyo yaangellenlle onnatta na Paulooyo, ellota muthu ni mukhwaaye wi, “Muthoolla tti oowiipha athu. Oovullusiwa va enyanja koma mulluku ooweeriwa Echilungamo khamuhiya wi akhalle mukumi.”

⁵ Koma Paulo aayittatthella enoweeyo vamunlloni koma khaaphoreyille.

⁶ Yaatiyera wi Paulo aneerewiipa mwiilli muttheene apaalle okhwa mwawiikuha moorurumusa. Yatiyenriiwa enthawi yoorekama ehoonaka ello emweereyellaka, yaarukunuwa maganizo ellota wi, “Yoolla tti mmodda a milluku!”

⁷ Vawaatamella ni vaavo vaakhalla emata dda Publio muullupalli a echilumba yeeyo. Aanaakhella anivaha ddoopaalla ddahu wonanko alletwaaye wa mallapo mararu.

⁸ Attiitthinnya a Publiooyo yaamavoriiwa ereta yooviha mwiilli ni ereta yoohulla m'mirimani. Paulo aavollowa mpa yakonaatthilliiwammo, avekella navettho iiyaatthi mattaaye va olliye nave amuchiriha.

⁹ Ddeereyille ddenndda, oovoriiwa attheene yaari echilumba yeella yaawa nave echirihiwa.

¹⁰ Yaaniriiha ni ddeko ddinchichi nave natimullalleehu voolendonooyo vakallawani, nahaakhella ddoopaalla ddahu.

Olendo wa Paulo ovenyera o Melita oya o Roma

¹¹ Viviralle miyeri miraru naatimulla va ekallawa eyo yakhanlle vanipuronimvo eyitta ettheene. Ekallaweeyo yaari yoovenyera o Alekizandriya nave yaakhalla ni mafano a milluku ooromolliwa “Anapattha ayo eri milluku.”

¹² Naaphiya vadoko va muzinda wa Surakusa nave nikhallawo wa mallapo mararu.

¹³ Navenyereehu wenko naaphiya o muzinda wa Regio nave osaka wene ephevo yahaamba woopa ovenyera omwera nave osaka wene naaphiya va doko na Puteoli.

¹⁴ Nahaaphwanyawo ookhulupilila amodda wenko ayo yanikohille wi nikhallena wa mulungu mmodda nave omamallihello naaphiya o Roma.

¹⁵ Ookhulupilila yaari o Roma yahiiwa dda hiyaano sika yaawa ephiya va Musika wa Apio nave o Enyumba dda Alleto Ddiraru wi ekumane ni hiyaano. Paulo awoonilleeye, aamuthokoza Mulluku nave aallipa murima.

Paulo aphiyalle o Roma

¹⁶ Naphiyalleehu o Roma, Paulo ahaakhullelliwa okhalla mu echipinda yayeekha vamodda ni akhoto oomuweherooyo.

¹⁷ Viviralle mallapo mararu Paulo aawiithana attekweene a Ayuda* a wenko, yatthukumanniiwa aallota wi, “Ayuda akhwaakanyu naari ngeenre ello yowaavaanyiha athwaahu apaalle makhallello a makhollwaahu, kaahiyiwa mundende o Yerusalemu kivelleelliwattho wa Aroma.*

¹⁸ Emallihalle okikoha, Aroma yapaalla okittaphulla kaambiiwa kheyaaphwannye mullatu woophwanella wi kiiphiwe.

¹⁹ Nave Ayuda yakhootilliiwa, kahoona wi tti woophwanella wi mullatwaakoolla wiipiwe wa Kaisara* naari kahirina yowaavaanyiha athu a mutundwaaka.

²⁰ Ekaamba ya yeella koowiithanani wi killote ni nyuwaano vawi kimakiwalle ni onyoloolla ekaamba ya oyo ari etiyerello ya athu a o Israele.”

²¹ Alliwaayo yaallota wa Paulooyo wi, “Khaninamwaakhelle kalata oovenyera o Yudeya oollota dda nyuwaano naari mmodda a athwaahu oyo awiille wuno ovenyera wenko khanilleelle mwaha yoolla apaalle oollota dda erive ello yoonanara ya nyuwaano.

²² Koma ninapaalla wi niiwe ovenyera wa nyuwaano kaambiiwa ninnadduwella wi orive otthewene athu enallota ddoonanara dda mulloko yoolla muriinyumo.”

²³ Vano yahiiwanana nllapo nawi ekumane ni Paulooyo nave mulloko muullupalli wa athu waawa nllapo nenno ochipindani wakhalla Paulonko. Waambeella ohinase ophiyera mahiiyu ahaatthopoollella ni weerella omboni dda omwene wa Mulluku. Ahaalleella dda Yesu vawaaromollellani dda malamulo a Mose ni ehuddiho ya anamallotella nngu aapaallaka wi aakope.

²⁴ Amoddaayo yaakopeya ni mawaayaayo koma amodda kheyaakhulupililalle.

²⁵ Sika vaakhalla ohiiwanana variyari va mullokooyo nave yaavenyavo, Paulooyo allotilleeye ello emodda yawi, “Munepa Waweella aallota phaama wa makhollwaanyu oweella mwa namallotella Yesaya!

²⁶ Vawi aallota wi, ‘Khawe, wallote ni athwaalla wi, wiiwa munniiwa koma khamuniiwesesa woona munnoona koma khamudduwellesesa.

²⁷ Umiha mirima dda athwaalla, khoowiha maarwiiwa, minyalliha miitthwiiwa wi ehoone ni miitthwiiwa, ehiiwe ni maarwiiwa, ehidduwelle ni murimiiwa nave ehirukunuwe murima wi echirihiwe.’ ”

²⁸ Nave Paulo aamalliha ni wi, “Vano mudduwelle wi Mulluku oorumiha mawaaye oovullusa wa athu ayo ehiri Ayuda. Alliwaayo eneerowiiwella!”

³⁰ Wa miyakha miilli Paulo akhalla mu enyumba yoopolleya nave aanawaakhellawo athu attheene yawa wi ekumanena.

³¹ Aallalleya dda omwene wa Mulluku nave ahuddiha dda Apwiya Yesu Khrisitu, aallota moottaphuwa ni moohikhalla ni yookatamiha.