Mitteko 27 - Mawu a Mulluku

Paulo anallapuwa oya o Roma

¹ Yiiwananiiwa wi enaphwanella ellapuwe vakallawani eye o Italiya, yaamuvelleella Paulo ni oomakiwa amodda wa Julio, akhoto muullupalli a mulloko wooromolliwa wi, “Mulloko wa Kaisara.”*

² Nawenlle ekallawa yoovenyera o Adramutiwo, eyo yaari vakhuviru otimulla wi eyeeke o madoko o echigawo ya Asiya* nave naatimulla. Naari ni Aristariko mu Masedoniya, oovenyera o Tesalonika.

³ Osaka wene naaphiya o Sidoni nave Julio aamoonihella oreera murima Paulo voomwaakhullellani wi awoone akhwaaye wi yamuvahe ddoopaalla ddaye.

⁴ Navenyilleehu wenko naaweella o echilumba ya Kupro ekaamba ya ephevo eyo yoopa mowoopana ni hiyaano.

⁵ Naallapuwa enyanja ovirella o Silisiya ni Pamfuliya nave naaphiya o muzinda wa Mura mu echigawo ya Lusiya.

⁶ Niri wenko akhoto muullupalloolle aaphwanya ekallawa yoovenyera o Alekizandriya yooya o Italiya, sika aaniwelliha.

⁷ Naheeta vang'ono vang'ono wa mallapo manchichi nave naahoowa wi naphiye mu etawoni ya Kinido. Ephevo yaanihoosave wawi nallapuwelle echilumba ya Krete nikhwaranyille Salmone.

⁸ Naheetave moohoowa mukhwipi mwa enyanja niphiya onipuroni nooromolliwa wi Vadoko Vaphaama, vakhuviru ni muzinda wa Laseya.

⁹ Nallekenllehuvo vaavo nave enthawi yoohalla ocha yaari emanlle khalle, waari wawoopiha wi neetekeve va olendooyo. Nave Paulo ahaalleella wi,

¹⁰ “Athu nyu, miyaano kinoona wi olendoolla ovenyera vaava oneerokhalla wawoopiha, wawi katundoolla ni ekallaweene ddineerewoonongeya naari hiyaano nineerokhwa.”

¹¹ Koma akhoto muullupalloolle ahiiwellella ddallotille mwaneena a ekallaweeyo owaaka oowehera ekallaweeyo ohiri ddallotille Paulooyo.

¹² Vawi khawaari waphaama okhalla vadokonimvo ekaamba yooriirya, sika athu anchichi yaaneesa ovenyawo enaya o Foenikisi va enthawi ya nakhuttweeyo. Foenikisi tti doko na o Krete noowehana ni omwera wa woovollowa nndduwa ni ompoto wa woovollowa nndduwa.

Ephevo ya namondwe va enyanja

¹³ Ephevo yaphaama yahaamba woopa mooyeva nave athwaalle yaganiza wi eneereweera ddoopaalla ddiwa, sika yaamuhullulla nangula* etimulla voolendoniiwa yeeta vakhuviru ni echilumba ya Krete.

¹⁴ Koma khevaallekenlle nave ephevo yaweeriwa ephevo ya ompoto wa wookhuma nndduwa yahaamba woopa.

¹⁵ Yahoopella va ekallaweeyo nave vawi waari woohiworeya wookollella ekallawa wi evollowe mu ephevweeyo, naahiya wookollellanko nave yaanikusa ninaya yayeewawo.

¹⁶ Naaphiya onipuroni noohikhalla ni ephevo vakhuviru ni echilumba eng'onong'ono ya Kauda. Wenko moohoowa, naawora wookollella ekallawa eng'onong'ono eyo yakokiwa ni ekallawa yuullupalli.

¹⁷ Nave yaawelliha ekallawa eng'onong'onweeyo mukallawani yuullupalleeyo. Yaamaka mikwe mukhwipi mwa ekallawa yuullupalleeyo. Vawoovani wi yaawerophiya wookomella enyanja wookhalla mihava waatamella o Libiya, sika yaakitthiha ekuwo yoollipana ni ephevo enakokiwa ni ephevweeyo.

¹⁸ Ephevo yawoopiheeyo yaavirellellave woopanko, sika osaka wene yahaamba omuvokhella katundu atukhulliwe ni ekallaweeyo m'maaddini,

¹⁹ nave nllapo naneeraru yaavokhella naari ezipangizo ddoophariha mutteko dda ekallaweeyo m'maaddinimmo.

²⁰ Vaavira mallapo manchichi nihinoone nndduwa naari etheneeri nave ephevweeyo yaavirellellave woopanko mwawoopiha. Omamallihello wiwa naatathilla murima wi nineerovulluwa.

²¹ Nakhanlleehu enthawi yoorekama oohicha ello, Paulo ahiimella vamiitthoni va athu allota wi, “Athu nyu, mwaakiiwelleke wi nihivenyewo o Krete wulle, ddittheddene ddoonongeye ni otathiyanndde khaddaaweereye.

²² Koma vano kinapaalla kuuvekeni wi, llipani murima! Khaavo anaatathiye, ekallawave sika enaawoonongeye.

²³ Vawi mahiiyu a oddillo mungelo a Mulluku, Mulluku oyo kiriimi aaye ni oyo kinamullapelleemi, aakiweella,

²⁴ allota wi, ‘Ohoove, Paulo! Onaphwanella wi wiimelle vamiitthoni va Kaisara. Mulluku voowoonihellani oreera murima waye wa weyaano oopaalla wi ohikhwe vamodda ni ayo oriiwena.’

²⁵ Sika athu nyu, llipani murima vawi kinnamukhulupilila Mulluku wi ddinaakhalle wonanko allotilleeyemmo.

²⁶ Nave nineerokakhelliwa va echilumba emoddeene.”

²⁷ Waari mahiiyu a nllapo na khumi ni sese, nakakhiweehu ni ephevo yawoopiheeyo mu Enyanja Yuullupalli. Variyari va mahiiyu oophara mutteko mukallawanimmo yaaganiza wi nohaatamella omutundani.

²⁸ Sika yaavokhella m'maaddini mukwe woomakellella ello yoollemella nave yaphwanyille wi tti voowallamella mamita 40, neetille vang'ono yaavokhattho nave ephwanya wi tti voowallamella mamita 30.

²⁹ Yahoova wi ekallaweeyo ttuukakhelliwa vamallukuni, sika yaapwiniha anangula asese ovenyera otulli wa ekallaweeyo wi eheetettho enavekella wi osewo.

³⁰ Vano oophara mutteko mukallawanimmo yapaalla othawa, sika yaakitthihera ekallawa eng'onong'ono m'maaddinimmo yootthera wi enaaka yapwinihe anangula muhoollo mwa ekallawa yuullupalli.

³¹ Koma Paulo aallota wa akhoto muullupalli ni akhotwaayeene wi, “Oophara muttekwaayo yaahikhalla mukallawanimmu, khamuwora ovulluwa.”

³² Sika akhotwaayo yaaphadda mikwe ddamakellelliwe ni ekallawa eng'onong'onweeyo wi eyivokhelle m'maaddinimmo.

³³ Waariiwa vakhuviru wi osewo, Paulo ahaawatihera wi eche allota wi, “Mookhalla wa mallapo khumi ni masese vano, enthawi ettheeneella khamuchille ello.

³⁴ Vano kinuuwatiherani wi muche yoocha vawi tti yoopaallaanyu wi mukhalle ni okumi. Khaavo muthu anaatathille naari neehi nimodda na m'muruni mwaye.”

³⁵ Allotilleeye ddenndda, Paulo aamukusa buledi, avekella wa Mulluku moothokoza attheene yoonaka, amumeyameya nave aamba omucha.

³⁶ Yaallipa murima nave arive muthu ahaambattho ocha.

³⁷ Mukallawanimmo naarimo athu 276.

³⁸ Attheenehi nachilleehu nivona, yaavevulla ekallaweeyo voomuvokhellani tirigu muttheene m'maaddini.

Woonongeya wa ekallawa

³⁹ Wasilliiwa, oophara mutteko mukallawanimmo kheyaadduwenlle dda omutundaninko koma yahoona doko na mihava nave yahiiwanana wi wakhalla wooworeya, yiimesewo ekallaweeyo.

⁴⁰ Sika yaaphadda mikwe dda anangulaalle nave yaahalla m'maaddini mwemmo navettho enthawi yeeyo yaattaphulla mikwe ddoomakellella o ello yawookollella. Vano yaawelliha ekuwo eyo enakakhiwa ni ephevo wi ekallawa yeete oya vahoollo. Sika ephevo yaanikakhella omutundani.

⁴¹ Koma ekallawa yahoopana ni mihava m'maaddini mwemmo yiimella. Nave muhoollo mwa ekallaweeyo mwaatora wawi kheyaaworille weeta, otullinngu yahinttakeyanttakeya ni masiva a ephevweeyo.

⁴² Akhotwaayo yahiiwanana wi ewiiphe oomakiwa attheene vawi yoova wi oomakiwaayo yamorella m'maaddinimmo eneerosambila nuuthawa.

⁴³ Koma akhoto muullupalloolle apaalla amuvulluse Paulo, sika ahaahiiha wi eheere ddiiddo. Vano ahalamulella ayo yadduwella osambila wi elluphelle m'maaddinimmo wi yaphiye omutundaninko mwawaamba.

⁴⁴ Attheene oohallaayo yaathwareke, ephanre matabwa apaalle ddookhadduwa dda ekallaweeyo. Nave mmo sika attheene naaphiyelleehu phaama omutundani.