Mitteko 25 - Mawu a Mulluku

Fesito aneeruza mullatu wa Paulo

¹ Fesito aaphiya mu echigawaaye nave viviralle mallapo mararu aatimulla ovenyera o Kaisareya aya o Yerusalemu.

² Wenko allupa mukutho uullupalli ni attekweene a Ayuda* yaamusumella Paulo wa Fesito. Yaamuveka Fesito wi

³ aweerelle echifundo voomukusellani Paulo o Yerusalemu vawi yahiiwanana wi emwiipitthelle va ettilla wi emwiiphe.

⁴ Fesito ahaakhulla wi, “Paulo ahiyiwe mundende o Kaisareya nave kineeroyaawo veneva.

⁵ Muwaakhullelle attekweenaanyu wi ethaanane ni miyaano o Kaisareya nave yamuvaanyihe muthooyo aarimi eerille erive yoonanara.”

⁶ Nave Fesito akhanlleeye o Yerusalemunko wa mallapo oohikhwaranya matthanu ni mararu apaalle khumi, aaya o Kaisareya. Osaka wene aakeraatthi vampandoni wooweeruzella nave alamulella wi Paulo awe vamiitthoni vaye.

⁷ Paulooyo aphiyalleeye, Ayuda yavenyenre o Yerusalemu yaavenya emwaapheella nave yaamba omuvaanyiha ni ddeko ddinchichi ddawoopiha koma ddoohikhalla ni omboni.

⁸ Koma Paulo mwawiiteteza aallota wi, “Ngichimwenlle malamulo a Ayuda apaalle enyumba ya Mulluku apaalle Kaisara.”*

⁹ Nave Fesito apaalla waahakallalliha Ayuda, sika aamukoha Paulo wi, “Onnapaalla wi oye o Yerusalemu nave mullatwaawoolla wiipiwe vamiitthoni vaka?”

¹⁰ Paulo aallota wi, “Kiimenlle va nthato namillatu na Kaisara, sika tti vaava kinaphwanelleemi wi keeruziwe. Nyuwaano nyookha munnadduwella phaama wi ngeenre ello yoonanara wa Ayuda.

¹¹ Kaarimi kiri muthu aweera ddoonanara nave kinnaphwanella wiiphiwa, nginakhoota wiiphiwanko. Koma enakivaanyihereewanndda ddaari ddawoottha, khaavo muthu anaphwanella okivelleella wa Ayuda. Kinapaalla wi keeruziwe ni Kaisara.”

¹² Vano Fesito akambirane ni enduna ddaye ahaakhulla wi, “Vawi onapaalla wi weeruziwe ni Kaisara, sika oneeroya wa yooyo.”

Paulo vamiitthoni va Agripa ni Berenise

¹³ Viviralle mallapo ooyeva mwene Agripa vamodda ni Berenise, murokoriye yaaphiya o Kaisareya wi emwaakhelle Fesito.

¹⁴ Nave yakhanlliiwa wenko wa mallapo oowaatellavo, Fesito aamutthopoollella mwenooyo dda Paulo wi, “Wookhalla muthu oyo amakiwe enthawi ya Felike ahiyiwa mundende,

¹⁵ nave kayiilleemi o Yerusalemu, allupa mukutho uullupalli vamodda ni attekweene a Ayuda yaamusumella nave ekiveka wi kimwiipe mullatu wawi oheera ddoonanara.

¹⁶ Koma kahaalleella wi hiyaano Aroma* khanineera ddiiddo, omuvelleella muthu awiipiwa mullatu wa ayo enamuvaanyihaayo ahinakumanena oomusumellaayo wi nayeene allote ddeko ddawiiteteza yeekhaaye.

¹⁷ Sika yawiilliiwa wuno, ngaallekenllettho koma osaka wene kaakeraatthi vampandoni wooweeruzella nave kimwiithaniha wi awe.

¹⁸ Oomuvaanyihaayo yahiimella koma kheyaamwiipalle mullatu waweera ddoonanara moollikana ni nnddo katiyereemi wi eneerollota.

¹⁹ Yallotilliiwa ddittheddene ddaari ddamallapellwiiwa nave dda muthu nnddina naye Yesu akhwilloolle koma Paulooyo anallota wi tti mukumi.

²⁰ Miyaano kahaalleella yaweera wi kiphwanye ddawoona ddiwa dda mullatu yoolla, sika kaamukoha Paulooyo aarimi apaallaka wi iipiwe mullatooyo o Yerusalemu.

²¹ Paulooyo aaveka wi Kaisara eeruze mullatooyo nave wi aweheriwe ophiyera enthawi yeeyo. Sika kaalamulella wi aweheriwe ophiyera kimurumihalle wa Kaisara.”

²² Agripa aallota wa Fesito wi, “Kinapaalla kimwiiwe meekhaaka muthu yoolla.” Fesito ahaakhulla wi, “Muneeromwiiwa osiisello.”

²³ Osaka wene, Agripa ni Berenise yaavollowa mu echipinda yootthukumanellamo nave athu yahaavaha olemu wunchichi. Yavollowille nimodda ni oolamulella a akhoto ni oohoollella oovuwa am'muzindanimmo. Nave Fesito aamwiithaniha Paulo wi awe.

²⁴ Nave Fesito aallota wi, “Mwene Agripa ni athu attheene nyu muri vaava, olla sika muthu oyo Ayuda attheene a wuno naarittho o Yerusalemu yaamusumella wa miyaano. Yaakhuwa ellotaka wi khanaphwanellattho wi akhalle ni okumi.

²⁵ Koma nginaphwanya wi oheera ello yoophwanella wiipiwana mullatu woowiiphiwana. Vawi yeekha aaveka wi mullatwaaye wiipiwe ni Kaisara. Sika kaaganiza wi kimurumihe.

²⁶ Navettho nginna ello yawi kimulembelle Kaisara yoollota dda muthoolla. Sika koomwiithaniha wi awe vamiitthoni va nyuwaano attheene makamaka nyuwaano mwene Agripa! Sika vano mumukohesese wi miyaano kiphwanye yoolemba.

²⁷ Vawi wa miyaano ddinooneya wi khe waphaama omurumiha muthu oomakiwa kihitthoponlle phaama mullatwaaye.”