Mitteko 24 - Mawu a Mulluku

Mullatu wa Paulo

¹ Viviralle mallapo matthanu mullupa mukutho muullupalli nnddina naye Ananiya* aaya o Kaisareya ni attekweene a Ayuda* amodda owaaka muthu owaallotella athu va millatu nnddina naye Tertulo. Yaaya wa Felike nave emusumella Paulo.

² Paulo ahiithaniwa nave Tertuloolle ahaamba otthopoolla millatu ddoomuvaanyiha Paulo allota wi, “Ooriiheya Felike! Ohoollella wanyu wa ezeru wooneeriha hiyaano wi nikhalle ni murendelle wa enthawi yoorekama nave ddeko ddinchichi ddootthopoowa mu mutundwaahu.

³ Ddenndda nooddaakhella virive veko navettho enthawi ddittheddene nave ninnahakallalla ni nyuwaano ovenyera vatthi va mirima ddahu.

⁴ Nginapaalla wi kuuselliheni, sika kinuuvekani wi mukaapelle maaru ni wiiwa mawaahu ooyevaalla.

⁵ Noophwanya wi muthoolla tti ookatamiha, annaambiha owana variyari va Ayuda orive weko va ellapo yavatthi navettho tti oohoollella mulloko wa Anazarene.

⁶ Aapaallattho oripiha enyumba ya Mulluku koma naamuphara.

⁸ Mukoheni nyookhaanyu dda ddeko ddenndda nave muneerodduwella eyo ninamwiipelleehu mullatu muthu yoolla.”

⁹ Ayuda attheene yahiiwanana dda mullatooyo nave yaallota wi ddeko ddittheddenennddo tti ddawoona.

Ollota wa Paulo vamiitthoni va Felike

¹⁰ Felike oolamulelloolle ahiimesa mattaaye wi Paulo allote nave Paulo aallota wi, “Kinnadduwella wi wa miyakha ddinchichi nyuwaano mwaari aweeruza mutundoolla nave sika koohakallalla wi killote mowiiteteza meekhaaka vamiitthoni vanyu.

¹¹ Muneerophwanya ddawoona nyookha wi khavaaviralle mallapo khumi ni meelli kayiilleemi o Yerusalemu wi kamullapelle Mulluku.

¹² Wenko Ayuda kheyaakiphwanyille kikanganaka ni arive muthu mu enyumba ya Mulluku naari kaambihaka mapokoso variyari va athu mu enyumba ddamavekello* apaalle virive veko m'muzindanimmo.

¹³ Nave kheyinna omboni wa mullatu enakivaanyihelliiwoolla.

¹⁴ Kinaakhullellaami vamiitthoni vanyu tti ella yawi, kinamullapella Mulluku a makhollwaahu moollikana ni ettilla eyo enaromolliiwa wi tti mulloko wawoottha. Kinnakhulupililattho erive ello yalembiwe mu malamulo a Mose ni ehuddiho ya anamallotella.

¹⁵ Kinnamutiyera Mulluku wonanko alliwa wi athu attheene oolungama ni oohilungama eneerovenya wa ookhwa.

¹⁶ Nave sika kinnallipihella mallapo mattheene okhalla muthu oohikhalla ni mullatu vamiitthoni va Mulluku ni athu.

¹⁷ “Kavenyilleemi o Yerusalemu kaahokollowa vimanlle miyakha ddinchichi nave kaawaana wa athu a mutundwaaka makobiri ovenyera wa ookhulupilila amodda nave wi kiheraatthi mukutho.

¹⁸ Keeraka ddenndda, yaakiphwanya mu enyumba ya Mulluku, kimallihalle ehakallallo yooddeelliha. Khuwaarivo mulloko wa athu naari mapokoso.

¹⁹ Nave Ayuda amodda oovenyera o echigawo ya Asiya* yaari vaavo. Alliwaalla sika yaphwanenlle owa wa nyuwaano wi ekiipe mullatu yaarimi erina ekaamba yookiipella mullatu.

²⁰ Apaalle mwaahiye athu eri vaavaalla ellote mullatu yakiphwanyelliiwa kiimenlleemi vanthatoni viwa namillatu.

²¹ Ello emoddave kenreemi yawi kaakhuwa moowelliha mawu kiimenlleemi variyari viwa wi, ‘Munakiipa mullatu ollello ekaamba yookhulupilila wi athu eneerovenya wa ookhwa.’ ”

²² Vano Felike, oyo adduwella phaama dda Ettilla, aamalliha mullatooyo ni waalleella wi, “Lusiya oolamulella aphiya kineerokamulla mullatwaanyoolla.”

²³ Aamulamulella akhoto muullupallooyo wi amuwehereke Paulo nave paulooyo akhalleke moottaphuwa nave awaakhullelleke akhwaaye wi eweeke emuvaheke ddoopaalla ddaye.

²⁴ Viviralle mallapo ooyeva Felike aawa ni mwaariye Durusila, oyo aari Muyuda. Aamwiithaniha Paulo nave amwiiwellella alloteeye dda echikhulupililo mwa Khrisitu Yesu.

²⁵ Nave Paulo aakambirana ni Felike dda echilungamo wiihiiha weekhaawo ni dda owa wa nllapo na echiweruzo. Felike ahoova nave allota wi, “Khawe vano, kineerowiithanattho kakhalla ni mpata.”

²⁶ Enthawi yeeyo atiyera wi Paulo amuvahe makobiri, sika aanamwiithana wiilliwiilli anaarerana.

²⁷ Vaviralliiwa miyakha miilli, Porkio Fesito aavollowa munipuroni na Felike akhalla oolamulella. Felike apaalla wi aahakallallihe Ayuda, sika amuhiyalle Paulo ari mundende moomulle.