Mitteko 23 - Mawu a Mulluku

¹ Paulo ahaawehesesa attekweene a millatu a Ayudaalle* allota wi, “Ayuda akhwaakanyu! Ollota dda okhalla waka ni Mulluku, miyaano nginna mullatu ophiyera ollello vaava.”

² Vano mullupa mukutho muullupalli nnddina naye Ananiya* ahalamulella ayo yiimenlle vakhuviru ni Paulooyo wi emuukuthe owanoni waye.

³ Nave Paulo aallota wi, “Mulluku eneerowuukutha weyaano, muthu awoottha, we tti wonanko esiri yoonanara eyo yeellihiwe! Okeraatthille vano wi okeeruze ollikana ni malamulo a Mose koma weyaano ohithwaraka malamulwaayo vawaalamulellani athu wi ekuukuthe miyaano!”

⁴ Athu yaari vakhuviru ni Paulo yaallota wi, “Onamullotella epewe mullupa mukutho muullupalli a Mulluku!”

⁵ Paulo ahaakhulla wi, “Nyu Ayuda akhwaaka, ngaadduwella wi olliyoolla tti mullupa mukutho muullupalli. Mawu a Mulluku eni, ‘Ohillote ddoonanara dda owaahoollella athwaawo.’ ”

⁶ Paulo oonilleeye wi amodda a m'mullokonimmo yaari Asaduki* nave amoddattho yaari Afarisi,* aallota mookhuwa munthatoni mulle wi, “Ayuda akhwaakanyu! Mi tti Mufarisi, mwaana a Mufarisi. Kiniipiwa mullatu kaambiiwa kinnatiyera wi athu eneerovenya wa ookhwa!”

⁷ Allotilleeye ddenndda, Afarisi ni Asaduki yahaamba owana nave mullokooyo waakawaneyavo.

⁸ Vawi Asaduki eni athu ookhwa khevenyattho nave wi khawuri angelo naari minepa. Koma Afarisi ennakhulupilila ddiraru ddittheddenennddo.

⁹ Athwaalle yaanyahuwa okhuwa nave ahuddihi amodda a malamulo ayo yaari a mulloko wa Afarisi yahiimella ellota mookhuwa wi, “Hi khaninaphwanya mullatu woomuvaanyihera muthoolla! Ttuuworeya wi munepa apaalle mungelo sika allotille wa olliyoolla!”

¹⁰ Nave owananko wahunnuwa wawi oolamulelloolle ahoova wi Paulo aneerewiiphiwa moowaakanelliwa. Sika ahalamulella akhotwaaye wi eye yamuvenyihevo vamullokonimvo wi eweena onipuroni wiwa.

¹¹ Mahiiyu yaayo Apwiya yahiimella vaari Paulo ellota wi, “Ohoove! Woovelleella omboni dda miyaano o Yerusalemu wuno nave onaphwanella weerettho ddiidda o Roma.”

Ddoopaalla omwiipha Paulo

¹² Ohinase Ayuda amodda yaakumana vamodda nave yiiwanana moollupella wi khecha apaalle owirya ophiyera emwiiphalle Paulo.

¹³ Athu yiiwanannaayo yaarivo vamodda ookhwaranya 40.

¹⁴ Nave yaaya wa allupa mukutho uullupalli ni attekweene yallota wi, “Hi noollupella vamodda wi khanicha ophiyera nimwiiphalle Paulo.

¹⁵ Vano nyuwaano ni attekweene a millatu murumihe mawu wa oolamulella a akhoto a o Roma wi aweena Paulo wa nyuwaano, wonanko munapaalla muphwanye ddawoona ddiwa dda muthu yoolla. Nave hiyaano nookhozekella wi nimwiiphe naari ahinaphiye wuno.”

¹⁶ Nave muddullaye aamullopwana a Paulo ahiiwa dda mwiiwananooyo, sika aavollowa onipuroni na akhotonno nave amulleella Paulo.

¹⁷ Vano Paulo aamwiithana mmodda a akhoto uullupalli amulleella wi, “Ngamukuseni musomboolla muyeena wa oolamulelloolle vawi ookhalla ni yawi allote.”

¹⁸ Muullupalloolle aamukusa, amuhoollella wa oolamulelloolle nave allota wi, “Mullupa oomakiwa, Paulo aakiithana nave akiveka wi kiweena musomboolla wa nyuwaano kaambiiwa ookhalla ni yawi uulleelleni.”

¹⁹ Oolamulelloolle aamuphara va nnatta vaye musombooyo, ayaana okhwipi wa weekhiiwa nave amukoha wi, “Ori ni tini yawi okilleelle miyaano?”

²⁰ Aallota wi, “Attekweene a Ayuda* ahiiwanana wi osiisello vano yuuvekeni wi muyeena Paulo wa attekweene a millatu, wonanko wi enapaalla yaphwanye ddawoona dda olliyooyo.

²¹ Koma muhiwiiwellelle kaambiiwa wookhalla athu ookhwaranya 40 ayo eniipitthe emutiyeraka wi emwiiphe. Aallupella wi khecha apaalle owirya ophiyera emwiiphalle. Aakhozekella weera ddenndda nave enatiyera wi yiiwe mmo nyuwaano munaawaakhullelleenyu.”

²² Oolamulelloolle aallota wi, “Ohimulleelle muthu wi wookitthopoollella miyaano.” Nave aamulleella musomboolle wi aroweke.

Paulo anarumihiwa wa Felike oolamulella

²³ Oolamulelloolle aawiithana akhoto uullupalli eelli nave allota wi, “Mwaakuse akhoto 200 muyeena o Kaisareya, vamodda ni akhoto 70 oowella vaakavaloni owaaka akhoto 200 ookusa mavaka nave mutimulle enthawi yaakwakhwanaka 9 koloko mahiiyumva.

²⁴ Mumuvahettho Paulooyo akavalwaaye wi awellevo nave mwaphiyena phaama wa Felike oolamulella.”

²⁵ Vano oolamulellooyo aamulemba kalata awi ddiidda:

²⁶ “Mi Klaudiyo Lusiya oyo kinuuvahani mooni nyuwaano ooriiheya Felike oolamulella.

²⁷ Muthooyo aaphariwa ni Ayuda nave yapaalla omwiipha. Kiiwalleemi wi olliye tti Muroma,* sika kaayaawo ni akhotwaaka kamwaakiha.

²⁸ Kapaalla kidduwelle wi enamwiipa mullatu wawiidde, sika kaamukusella onthatoni niwa namillatu.

²⁹ Kaaphwanya wi khenre erive ello yoophwanella wiiphiwana naari ohiyiwana mundende koma mullatu enamwiipiiwa tti woohithwara malamulwiiwa.

³⁰ Nave kalleelliweemi wi ahiiwanana wi emwiiphe, enthawi yeeyo kaamurumiha wa nyuwaano. Kohaalleella oomwiipa mullatwaayo wi yamusumelle wa nyuwaano.”

³¹ Vano akhotwaalle yaheera nnddo yalamuliwiiwa, yaamukusa Paulo mahiiyu vaavo eyaana o etawoni ya Antipatiri.

³² Osaka wene akhotwaalle ayo yeeta vatthi yaahokollweella onipuroni niwa yaahiya akhoto oowella vaakavalonive wi ekhwaranyekena.

³³ Yaaphiyana o Kaisareya, emuvelleella kalata wa Felike oolamulella, yaamuvelleellattho Paulooyo wa olliye.

³⁴ Oolamulellooyo aamweerenga kalatooyo nave aamukoha Paulo echigawo avenyenreeye. Aphwanyilleeye wi anavenyera o Silisiya,

³⁵ aallota wi, “Kineerowiiwa mullatwaawo yaphiya yuusumenllaayo.” Nave aalamulella wi Paulooyo aweheriweke onipuroni na oolamulellooyo nno namakiwe khalle ni Herode.