Mitteko 22 - Mawu a Mulluku

¹ Paulo aallota wi, “Ayuda akhwaakanyu ni attekweenaaka, mukiiwelle kinapaalleemi wi killote vawiitetezani meekhaaka!”

² Yamwiiwalliiwa allotaka mu Eheberi, yaamaalla ohiyana ni vawaamba valle nave Paulo aavirellella ollota wi,

³ “Mi tti Muyuda, ooyariwa o Tariso o Silisiya nave kallelliwe o Yerusalemu weewuno. Gamaliyeli sika aari muhuddihaaka nave olliye aakihuddiha moollikana ni malamulo ookatamiha a makhollwaahu nave kaari owiivelleella moollikana ni malamulo a Mulluku wonanko attheene nyu muri vaava ollello.

⁴ Kaanaahoosa athu oothwara ettilla ya Apwiya naari owiipha wene. Kaanaaphara allopwana ni atthiyaneene kaahiyaka mundende.

⁵ Mullupa mukutho muullupalli ni attekweene a millatu attheene ekhalle mboni wi kinallota ddawoona. Yaakivaha makalata owaalembella Ayuda akhwiihu o Damasiko, sika kaayaawo wi kaamake athu oothwara ettilla ya Apwiya wi kiweena o Yerusalemu wuno wi ellakiwe.

Paulo anallota dda orukunuwa murima waye

⁶ “Kaariimi voolendonoolla nave kaatamelleemi o Damasiko, enthawi yaariiwa vakhuviru 12 koloko otthaana, moorurumusa owala wuullupalli woovenyera oddullu waakaapheella.

⁷ Kahiikuha nave kahiiwa mawu ellotiwaka wa miyaano wi, ‘Saulo, Saulo! Onakihoosella tini?’

⁸ Kahaakhulla wi, ‘Nyuwaano ttaani, Apwiya?’ Yaallota wa miyaano wi, ‘Mi tti Yesu a o Nazareti, oyo onamuhooseewe’

⁹ Athu kaariiminaayo yahoona owalanko koma kheyaawiiwalle mawu a oyo allota wa miyaano.

¹⁰ Kaakoha wi, ‘Keere tini, Apwiya?’ Nave Apwiya yaakilleella wi, ‘Venya nave oye wavollowe mu Damasiko nave wenko oneerolleelliwa ddittheddene Mulluku anapaalleeye wi weere.’

¹¹ Ngaawoorillettho woona ekaamba ya owala wuullupallinko, sika akhwaaka kaariiminaayo yaakiphara nnatta ekihoollella kavollowa mu Damasiko.

¹² “M'muzindanimmo mwaakhalla muthu nnddina naye Ananiya.* Muthu oomullapella Mulluku oyo athwara malamulwaahu nave aarittho oovahiwa olemu ni Ayuda attheene ookhalla wenko.

¹³ Aawa wa miyaano, iimella vakhuviru ni miyaano nave allota wi, ‘Mwanamunnaka Saulo, ambattho woona!’ Enthawi yeeyo kahaambattho woona nave kimuweha.

¹⁴ Aallota wi, ‘Mulluku a makhollwaahu ohuutthoolla weyaano wi odduwelle opaalla waye ni wi omoone a echilungamoolle ni wi wiiwe mawaaye.

¹⁵ Vawi oneerokhalla mbonaaye wi waalleelle athu attheene nnddo woonilleewe ni wiiwa.

¹⁶ Nave vano, onaselliwella tini? Venya nave obatiziwe ni ohapihiwa wi machimwaawo evenyihiwe voovekellani wa Apwiya.’ ”

Wiithaniwa wa Paulo wi allalleye wa athu ayo ehiri Ayuda

¹⁷ “Kaahokollweella o Yerusalemu nave kavekelleemi mu enyumba ya Mulluku, kahoona masomphenya.

¹⁸ Mwemmo kaawoona Apwiya, ayo yallotille ni miyaano wi, ‘Akuva nave ovenyewo o Yerusalemu wuno, ohillekelle kaambiiwa athu a wuno kheyaakhullelle omboonaawo dda miyaano.’

¹⁹ Kahaakhulla wi, ‘Apwiya, ennadduwella phaama wi kaaya o enyumba ddamavekello* nave kahaaphara ni owuukutha ayo yakhulupililalle mwa nyuwaano.

²⁰ Nave mbonaanyu Sitefano iiphiweeye, miyaano meekha kaari vaavo, kaakhullellakana ni wiiphiwa waye nave owehera ddoowara dda ayo yamwiiphaayo.’

²¹ Apwiya yaallota wa miyaano wi, ‘Venya vawi kineerewuurumiha woorekama wa athu ayo ehiri Ayuda.’ ”

²² Athwaalle yamwiiwelliiwa Paulo, yaamwiiwella ophiyera allotilleeye yeella. Vano yahaamba okhuwa ni mawu oowella wi, “Muthu yoolla khanapaalleya wi akhalle mukumi va ellapo yavatthi! Iiphiwe!”

²³ Alliwaalla yakhuwa evokhellaka ddoowara ddiwa owaaka nthupi muddullu.

²⁴ Oolamulella a akhoto aalamula wi evollowena Paulo munipuroni na akhoto mulle. Nave ahaalleella wi emuwashulle wi awulule ekaamba eyo Ayudaayo enakhuwiiwa moomuvaanyiha ddiidda.

²⁵ Nave yamumakilliiwa wi awashulliwe, Paulo aamukoha akhoto muullupalli oyo iimenlle vaavo wi, “Tti ddawaakhullelliwa ni malamulo wi mumuwashulle muthu ooyariwa o Roma muhinamwiipe mullatu?”

²⁶ Nave akhoto muullupallooyo iiwalleeye ddenndda, aaya wa oolamulelloolle amukoha wi, “Muneereti yeella? Muthu yoollathi tti Muroma!”*

²⁷ Sika oolamulelloolle aaya wa Paulo nave amukoha wi, “Ngakilleelle, weyaano tti Muroma?” Paulo ahaakhulla wi, “Ddawoona.”

²⁸ Oolamulellooyo aallota wi, “Mi kaarimakulla ni makobiri manchichi wi kikhalle Muroma.” Paulo ahaakhulla wi, “Mi kaarimayariwa wi kikhalle Muroma.”

²⁹ Enthawi yeeyo athu ayo yapaalla wi yamukohe Paulo yaamuhiya nave oolamulelloolle ahoova adduwenlleeye wi oomumaka Muroma ni onyolo.

Paulo o nthato namillatu

³⁰ Oolamulelloolle apaalla wi adduwelle ddawoona ddiwa nnddo Ayuda yamwiipelliiwa mullatu Paulo. Sika osaka wene aamuttaphulla onyolo, aalamula allupa mukutho uullupalli ni attekweene attheene a millatu a Ayuda wi etthukumane. Nave aamukusa Paulo amwiimesa vamiitthoni viwa.