Mitteko 21 - Mawu a Mulluku

Paulo anaya o Yerusalemu

¹ Naallaanyilleehu naatimulla neeta vakallawani, nillapuwa naphiya o Kosi. Osaka wene naaphiya o Rode nave navenyilleehu wenko naaphiya o Patara.

² Wenko naaphwanyawo ekallawa yooya o Fenisiya, sika naawellamo nave naatimulla.

³ Nave naaphiya vanipuroni nawi naayoona echilumba ya Kupro nave naheetella onnatta noonyottho naphiya o Siriya. Naaya o Tiro vawi ekallawa yaatukhulla ddeko ddinchichi sika ddaphwanella wi ddakitthihiwemo.

⁴ Nahaaphwanyawo ookhulupilila nave naakhalla ni alliwa wa mulungu mmodda. Mwa Munepa Waweella yaamulleella Paulo wi ahiye o Yerusalemu.

⁵ Nave mallapwaahwaalle yamanlliiwa, naatimulla voolendonaahu. Attheene vamodda ni awariwa owaaka aniiwa, yaanivelleella okhuma m'muzindani mulle eniphiyiha mukhwipi mwa enyanja, wenko naakokhora attheene nave nivekella.

⁶ Vano naallaanyana, niwella ekallawa nave alliwa yaahokollweella owaniwa.

⁷ Naavirellella ni olendwaahu woovenyera o Tiro oya o Ptolemayisi. Wenko naakumana ni ookhulupilila nave naakhalla ni alliwaayo wa nllapo nimodda.

⁸ Osaka wene naatimulla naphiya o Kaisareya. Naavollowa mpa mwa Filipo* oollalleya, oyo aari mmodda mwa athu atthanu ni eelli ayo yatthoolliwe wi yaakavihereke amurummwa.

⁹ Olliyoolla aakhalla ni anaaye aatthiyana asese oohitthelliwa ayo yaari anamallotella.

¹⁰ Naariihu wenko wa mallapo awaatellavo, waaphiya namallotella nnddina naye Agabu ovenyera o Yudeya.

¹¹ Aphiyalleeye vaarihumvo, aamukusa laamba a Paulo iimakana m'manyalloni ni m'mattani mwaye nave allota wi, “Munepa Waweella oollota wi, mwaneena a laamboolla aneeromakiwa ddiiddattho ni Ayuda o Yerusalemu nave eneeromuvelleella wa athu ayo ehiri Ayuda.”

¹² Niiwalleehu ddenndda, hiyaano ni athu amodda a wenko naamuveka Paulo wi ahiyeewo o Yerusalemu.

¹³ Koma aallota wi, “Kaambiiwa tini, muninlleenyu mookivoriiha murima ddiidda? Miyaanothi kookhozeka ohiri omakiwave o Yerusalemunko koma naari okhwa ekaamba ya Apwiya Yesu.”

¹⁴ Vawi khaaniiwenlle, sika naamuhiya nave naallota wi, “Opaalla wa Apwiya weereye.”

¹⁵ Mallapwaahu ookhallella wenko yamanlliiwa, naatukhulla ddeko ddahu nitimulla oya o Yerusalemu.

¹⁶ Oohuddera amodda oovenyera o Kaisareya yaanivelleellattho o enyumba ya muthu nnddina naye Mnasoni wi nakhalle wenko. Aari oovenyera o Kupro nave aari oohuddera waambeella khalle.

¹⁷ Naphiyalleehu o Yerusalemu, ookhulupilila yaanaakhella moohakallalla.

¹⁸ Osaka wene Paulo ni hiyaano naaya wi namoone Yakobo nave attekweene a mpingo* attheene yaari vaavo.

¹⁹ Paulo ahaavaha mooni nave aatthopoollella phaama ddittheddene nnddo Mulluku eerilleeye variyari va athu ayo ehiri Ayuda oweella mwa mitteko ddaye.

²⁰ Yiiwalliiwa, yaamutitimiha Mulluku. Nave yaallota wi, “Mwanamunnihu Paulo onnoona vano wi Ayuda anchichi tti ookhulupilila navettho attheenaayo enniivelleella voothwarani malamulo.

²¹ Yaanalleelliwa wi onnaahuddiha Ayuda attheene ayo enakhalla ellapo dda athu ayo ehiri Ayuda wi ehithwareke malamulo a Mose. Wahaalleellattho wi ehaaphaddeke aniiwa apaalle opwatha makhallello a Ayuda.

²² Eneerewiiwa wi moophiya nave neere tini vaava?

²³ Ninapaalla wi nyuwaano mweere ella. Vookhalla athu asese alla ayo yallupenlle wa Mulluku.

²⁴ Mwaakuse muye mwakhallena va Ehakallallo ya makhallello ooddeelliha. Nave mwaavahe makobiri awi yallivelle voochemani meehi. Mweera ddiiddo athu attheene eneerodduwella wi tti ddawoottha nnddo yiiwalliiwa nave wi nyuwaano munnapwatha malamulo a Mose.

²⁵ Nave wa athu ayo ehiri Ayuda ayo yakhulupililalle, nohaarumihella kalata owaalleella wi nohiiwanana wi khenaphwanella ocha erive ello yooheraatthiwa va mukutho wa mafano apaalle nikhame na enama apaalle erive enama yoonyokotholliwa nikohi nave wi ehiraruweke.”

²⁶ Osaka wene Paulo ahaakusa athwaayo nave olliye ni athwaayo yaheellihiwa. Nave aavollowa mu enyumba ya Mulluku wi aalleelle dda enthawi ya omalliha wa ooddeelliha mvo mukutho wa arive muthu onaaheraatthiwiiwa.

Paulo anaphariwa mu enyumba ya Mulluku

²⁷ Nave mallapo matthanu ni meelli a oddeelliha yahaanlliiwa vang'ono omalla, Ayuda amodda oovenyera o echigawo ya Asiya* yaamoona Paulo mu enyumba ya Mullukummo. Yahaakopa athu attheenaayo nave yaamuphara Paulo.

²⁸ Yaakhuwa wi, “Aisraele nyu! Nikavihereni, olla sika muthu olle ayiille virive veko ahuddihaka ddawaavaanyiha Aisraele, malamulo a Mose ni enyumba ya Mulluku. Navettho ohaavollochiha athu ayo ehiri Aisraele mu enyumba ya Mulluku nave anaripiha nipuro noopatuleyanna!”

²⁹ Yallotille ddenndda kaambiiwa yaamoona Trofimo oovenyera o Efeso ari ni Paulo m'muzindanimmo, sika yeesa wi Paulo oomukusella mu enyumba ya Mulluku.

³⁰ M'muzindani mutthemwene mulle mwaahaanganyereya nave athu attheene vamodda yaathamaka yamphara Paulo nave emupurullella otte wa enyumba ya Mulluku nave enthawi yeeyo millako ddaawalliwa.

³¹ Mulloko wa athu wapaalliiwa omwiipha Paulo, oolamulella mulloko wa akhoto a o Roma aalleelliwa wi o Yerusalemu otthewene ddeko ddoovirikanawo.

³² Enthawi yeeyo oolamulellooyo ahaakusa akhoto uullupalli ni akhoto amodda ethamakella nko waari mulloko waathwaayo. Athwaayo yawoonilliiwa yaahiya omuukutha Paulooyo.

³³ Oolamulellooyo aaya vaari Paulooyo, amuphara nave alamulella wi amakiwe ni onyolo miilli. Nave ahaakoha athu a vamullokonimvo wi, “Muthu yoolla ttaani navettho eerille tini?”

³⁴ Amodda a m'mullokonimmo yaakhuwa dda ddimodda nave athu amoddaayo yaakhuwattho ddimodda. Vaakhalla mapokoso wawi oolamulellooyo khaadduwenlle wi yeereye tini, sika aalamulella wi emukuse Paulo eyeena onipuroni na akhoto.

³⁵ Vano yaphiyalliiwa wi ewellelle nikhote ni Paulooyo, akhotwaayo yaamutukhulla kaambiiwa mulloko wa athu oonanaraayo waattepa onanariwa wene.

³⁶ Vawi attheenaayo yaanaathwara ekhuwaka wi, “M'mwiiphe yooyo!”

Ollota wa Paulo

³⁷ Akhotwaayo yaariiwa vakhuviru wi emukuselle Paulo onipuroni wiwa wulle, Paulo aallota wa oolamulelloolle wi, “Ethiyo ttuullota ni nyuwaano?” Oolamulella olle aamukoha wi, “Onnadduwella ollota Egriki weyaano?

³⁸ Vano weyaano khe mu Iguputo oyo mallapo akhalle aambihalle mapokoso nave aahoollella athu oonanara 4,000 ayaana ochipululuni?”

³⁹ Paulo ahaakhulla wi, “Mi tti Muyuda, ooyariwa o Tariso echigawo ya Silisiya, muzinda woovuwoolle. Kinapaalla kuuvekeni wi mukaakhullelle wi killote ni athwaalla.”

⁴⁰ Oolamulelloolle aamwaakhullella, sika Paulo ahiimella vakhote valle nave iimesa miwono ddaye waamaalliha athwaayo. Yamanlliiwa, Paulo aallotana mu ellotello ya Eheberi.