Mitteko 20 - Mawu a Mulluku

Olendo wa o Masedoniya ni o Akaiya

¹ Mapokoswaalle yamanlliiwa, Paulo aawiithana ookhulupililaalle vamodda nave aallaanya ni mawu oollipiha murima. Nave aavenyawo aya o Masedoniya.

² Mu ezigawo mmo avireeye aanaallipiha murima athu ni mawu manchichi nave aaphiya o Akaiya.

³ Wenko aakhallawo miyeri miraru nave ahanlle vang'ono wi atimulleke ayeeke o Siriya aadduwella wi waakhalla Ayuda ayo yiiwanana wi emwiiphe. Sika aahokollowa oweella o Masedoniya.

⁴ Yamuvelleelle yaari Sopatere mwaana a Piro a o Bereya, Aristariko ni Sekundo a o Tesalonika, Gayo a o Derbe Timoteo ni Tikiko owaakattho Trofimo a o Asiya.*

⁵ Alliwaalla yaahoolla yanitiyera o Troasi.

⁶ Hiyaano naheeta vakallawani ovenyera o Filipi emanlle Ehakallallo ya Buledi Oohikhalla ni Yisiti nave viviralle mallapo matthanu nahaaphwanya o Troasi nko nakhanlleehuwo mulungu mmodda.

Olendo woomalliha wa Paulo o Troasi

⁷ Va Nllapo Namulungu naatthukumana vamodda wi namumeyemeye buledi. Paulo aallota wa athu ophiyera variyari va mahiiyu vawi atiyerella wi wasawo atimulle.

⁸ Echipinda yavaddullu natthukumanneehumo mwaakhalla enyale ddinchichi nnddo ddakhara.

⁹ Musombwe mmodda nnddina naye Utiko akhanlle vaniwindoni. Nave Paulo alloteeye, Utiko aakhalla ni ekhove ophiyera aakonavo nave aamora vatthi ovenyera va enyumba yootthinddaanyerana yaneeraru. Nave yamuronlliiwa yahoona wi ookhwa.

¹⁰ Nave Paulo aakittha vatthi, aamuwaramella musombooyo amukhupaarella. Allota wi, “Muhikhupanye, ookhalla ni okumi!”

¹¹ Vano aahokollweellattho mu enyumba ya vaddullweelle, amumeyameya buledi nave amucha ni hiyaano. Amallihalleeye okambirana wa enthawi yoorekama, ophiyera okhuma wa nndduwa, aatimulla.

¹² Yaamukusa musomboolle eyaana owaani ari mukumi nave yaahakallalla ni murimiiwa muttheene.

Ovenyera o Troasi oya o Mileto

¹³ Naahoolla niwenlle ekallawa nave naheeta oya o Aso, nayiillewo wi namukuse Paulo. Anilleelle tti Paulooyo wi neere ddiidda kaambiiwa apaalla weeta vamutundani oya o Aso.

¹⁴ Nakumanneehu o Aso, aawella mukallawani nave naaya o Mitilene.

¹⁵ Naatimulla ovenyera o Mitilenenko nave naaphiya o Kiyo osaka wene. Nave viviralle nllapo nimodda naaya o Samo, osaka wene naaphiya o Mileto.

¹⁶ Paulo aapaalla wi eete vakallawani moowaapheella o Efeso wi ahiselliwe mu echigawo ya Asiya. Ahaakuvella o Yerusalemu wi wakhalla wooworeya aphiyewo va nllapo na Pentekosite.

Ollaanya wa Paulo wa attekweene a o Efeso

¹⁷ Paulo aariiye o Mileto ahaarumihella mawu attekweene a mpingo* wa o Efeso wi akumanena.

¹⁸ Yaphiyalliiwa, aallota wi, “Munnadduwella makhallellwaaka mallapo mattheene kaariimi ni nyuwaano, waambeella nllapo kaphiyalleemi o echigawo ya Asiya.

¹⁹ Kahaarumeyella Apwiya mowiiyeviha nave naari omora miitthori enthawi ya ddookatamiha ayo yawiille ekaamba ya Ayuda amodda ayo yiiwanana wi ekiiphe.

²⁰ Munnadduwella wi ngaawiipitthihalle ello yawi yaawerowukaviherani kallalleyeemi ni ohuddiha vamiitthoni va athu ni m'mampa mwanyu.

²¹ Wa Ayuda ni athu ayo ehiri Ayuda kahaachenjeza wi erukunuwe murima ewe wa Mulluku nave ekhulupilile mwa Apwiihu Yesu.

²² Nave vano, moowiiwellella Munepa Waweella kinaya o Yerusalemu, moohidduwella eyo enaakeereyellewo.

²³ Emoddave eyo kinadduwelleemi tti yawi Munepa Waweella ookichenjeza wi muzinda orive muttheene kinayeemiwo, endende ni ddoohoosa ddinimakitiyera.

²⁴ Koma nginapwatha dda eyo enaakeereyelle. Emoddave eyo kinapaalleemi tti yawi kimallihe muttekwaaka ni orumeyella kavahiweemi ni Apwiya Yesu wi keere, ollalleya othenga waphaama wa echisomo ya Mulluku.

²⁵ “Kooweetellani attheenenyu, killalleyaka omwene wa Mulluku. Nave vano kinnadduwella wi khaavo a nyuwaano anaakoonettho.

²⁶ Sika kinallota wa nyuwaano ollello vano wi, ‘Mullatu okhalle wa nyuwaano! Miyaano nginna mullatu.

²⁷ Vawi ngiwiipitthihelleni ello kallalleyeemi yoopaalla ya Mulluku wa nyuwaano.’

²⁸ Sika mwiiwehereke nyookha owaakattho mpingo muttheene oyo Munepa Waweella uuvahilleeyeni wi muwehereke. Mukhalle abusa a mpingo wa Mulluku oyo awukullalleeye ni nikhame na Mwanaye.

²⁹ Kinnadduwella wi kavira, oneeroowa enama ddamuhakani ddawoopiha variyari vanyu nave ddineerewoononga mpingooyo.

³⁰ Nave athu amodda oovenyera mwa mullokwaanyu yoolla, eneerowoottottha ookhulupilila ni waahoollella wi ehiye mpingo nave yaathwareke alliwaayo.

³¹ Chenjerani vano nave upuwellani wi, wa miyakha miraru otthaana ni mahiiyu mwa omora miitthori ngaahiyalle wuuhuddihani arive muthu a nyuwaano.

³² “Nave vano kinuuhiyani mwa Mulluku ni wa mawu a echisomwaaye. Annawora owunnuwihani ni wuuvahani madaliso ayo anaavaheeye athwaaye.

³³ Ngaapanlle makobiri apaalle ddoowara dda arive muthu.

³⁴ Munnadduwella nyookha wi kaphanre mutteko ni mattaakaalla wi kiphwanye eyo miyaano ni akhwaaka napaalleehu.

³⁵ Koowoonihellani mwa ddeko ddittheddene wi voopharani mutteko moollipiha ddiidda ninaphwanella wi naakavihereke oohoowa, vawuupuwellani mawu yallotille Apwiya Yesu weekhiiwa wi, ‘Oovaha sika anadalisiwa ohiri owaakhella.’ ”

³⁶ Paulo amallihalleeye ollotanko, aakokhorana athwaalle avekella.

³⁷ Athu attheene yahinlla yamukhupaarelliiwa nngu ellaanyanaka.

³⁸ Yaakhumuwa wunchichi kaambiiwa ahaalleella wi khewa emoonattho. Nave vano yaamuvelleella o ekallawa.