Mitteko 2 - Mawu a Mulluku

Owa wa Munepa Waweella

¹ Nllapo na Ehakallallo ya Pentekosite naphiyalliiwa, athu ayo yamukhulupilila Yesu yaatthukumana vanipuroni nimodda.

² Moorurumusa wahiiweya ovenyera oddullu wonanko woopa wa ephevo yawoopiha nave yahiiweya mpa mutthemwene yakhanlliiwammo.

³ Nave yaawoona wonanko mallumi amunllo ayo yakawaneya nave ekeraattheya va arive muthu.

⁴ Attheenaayo yaaddalliwa ni Munepa Waweella nave yahaamba ollota ellotello ddoohidduwanyeya* kaambiiwa Munepooyo waaweeriha wi ewore ollota mwawi ddiiddo.

⁵ Vano waakhallattho Ayuda ookhalla o Yerusalemu, ayo yamullapella Mulluku nave oovenyera o ellapo ddittheddene dda vatthimva.

⁶ Athu anchichi yaatthukumana yiiwalliiwa woopa wa ephevonko. Attheenaayo yaattikhina vawi yahiiwa ellotello ddiwa ddillotiwaka ni ookhulupililaayo.

⁷ Vano yaattikhina nave yaakhwa mullakallaka ellota wi, “Athu attheene enallotaalla khe a o Galileya?

⁸ Vano ddeereyille mwawiidde wi attheenehi niwiiweke mu ellotello ddahu?

⁹ Nivenyenre o ellapo dda Partia, Mediya, Elamu, Mesopotamiya, Yudeya, Kapadokiya, Ponto, Asiya,*

¹⁰ Frijiya, Pamfuliya ni Iguputo ni ezigawo dda Libiya waatamella o etawoni ya Kurene. Amoddahi nivenyenre o Roma,

¹¹ Ayuda owaakattho ayo yahiri Ayuda koma yaanathwara echikhulupililo ya Ayuda navettho amoddahi nivenyenre o ellapo dda Krete ni Arabu. Attheenehi ninnawiiwa alliwaayo mu ellotello ddahu dda mitteko dduullupalli nnddo enre Mulluku.”

¹² Yattikhinalliiwa, ekhwille mullakallaka yaakohana wi, “Yeella sika tini?”

¹³ Koma amoddaayo yaamoona waattheya ookhulupililaayo ellotaka wi, “Athu yaalla evonille ottheka.”

Ollalleya wa Petro

¹⁴ Vano Petro ahiimella vamodda ni amurummwa amodda khumi ni mmoddaalle nave olliyooyo ahaamba ollota mookhuwa wi, “Nyu Ayuda, nyu attheene munakhalla mu Yerusalemu, kiiwellelleni miyaano wi mwiiwesese nndda.

¹⁵ Athwaalla khevonille ottheka moollikana ni mmo munaganizereenyu vawi enthawi eri 9 koloko ohinase.

¹⁶ Ddineereyanndda sika ddallotelliwe ni namallotella Yowele wi,

¹⁷ Mulluku aallota wi, ‘Vatulli viwa kineerohella munepaaka va athu attheene, aniinyu aallopwana ni aatthiyana eneerollotella, athu awuulluvalla eneerolloha, asombwe eneerewoona masomphenya.

¹⁸ Enthawi yeeyo kineerokitthiha Munepaaka, naari va akaporo aallopwana ni aatthiyana. Sika eneerollotella.

¹⁹ Kineerewooniha ddoottikhiniha, oddullu ni ellapo yavatthi, nikhame, munllo ni mwiisi woottikana.

²⁰ Nndduwa nineerothiima, mweeri oneerofiira wonanko nikhame nihinaphiye nllapo nuullupalli ni nawoopiha na Apwiya.

²¹ Vano attheene ayo enaawiithane mu nnddina na Apwiya eneerovullusiwa.’ ”

²² “Iwellellani mawaalla, Aisraele nyu! Yesu a o Nazareti aari muthu arumiwe ni Mulluku wa nyuwaano. Mulluku ahuusimikizellani vaweerani ddoottikhiniha ni ezizindikiro oweella mwa olliyooyo variyari vanyu wonanko nyuwaano aneenaanyu moonilleenyu.

²³ Yesu yoolla aavelleelliwa moollikana ni opaalla wa Mulluku vawi aadduwella khalle wi mwaamutthomeya vamutandani nave mumwiipha voomuvelleellani wa athu oonanara.

²⁴ Koma Mulluku aamuvenyiha wa ookhwa, amuttaphulla o ddoovoreya dda okhwa kaambiiwa khawaari wooworeya wi okhwa omuwanddeellelle.

²⁵ Vawi Davide aallota dda olliye wi, ‘Erive enthawi kinnaahiya vamurimani Apwiya, vawi eri onnattanatta waka, sika khaavo oyo anaakitikhe.

²⁶ Ekaamba ya yeella murimaaka woohakallalla, mawaaka aaddalla ni ohakallalla! Kineerokhallana ni otiyerella,

²⁷ kaambiiwa kinnakhulupilila wi khamukihiya o ellapo ya ookhwa, nave khamukihiya mi oororomelleyaanyu aweella wi kuntelle mu mahame.

²⁸ Munnakitthoonyihella ettilla ya okumi, ophwanyeya wanyu onnakihakallalliha wunchichi miyaano.’ ”

²⁹ “Aisraele akhwaaka, kinaphwanella wi kuulleelleni moosimikizella dda nikhollo nahu Davide. Aakhwa avitthiwa mu mahame nave mahamaaye aakhallavo ophiyera ollello.

³⁰ Vallethi aarittho namallotella nave aadduwella wi, Mulluku aallupella wi mmodda a edduullu ddaye aneeroowa avollowe omwenaaye.

³¹ Davide ahoona khalle ddinaaweere Mulluku muhoollo nave aallota dda ovenya wa ookhwa wa Mesiya* allotilleeye wi, ‘Khaahiyiwe o ellapo ya ookhwa mwiillaaye khawuuntelle mu mahame.’

³² Olla tti Yesu oyo Mulluku amuvenyihalleeye wa ookhwa nave attheenehi niri amboni a yeella.

³³ Aawellihiwa oddullu akhalla onnattanatta na Mulluku, Attiitthinnya nave ohaakhella Munepa Waweella ovenyera wa olliye moollikana ni mmo alonjezilleeye khalle. Munooneenyu ni wiiwanndda tti Munepa Waweella anivahilleeye.

³⁴ Davide khaawenlle oya oddullu sika khaaddaaka yeekha alloteeye wi, ‘Apwiya yahaalleella apwiyaaka, “Khalla o nnattanatta naka

³⁵ ophiyera kaatthattusalle adanaawo voonyingallavo manyallwaawo.” ’

³⁶ “Vano Aisraele attheene edduwellesese wi Yesu olla mwamutthomeyilleenyu vamutandani, tti oyo Mulluku amweenreeye wi akhalle Apwiya navettho Mesiya!”

³⁷ Athwaalle yiiwalliiwa ddenndda, yaahoowa m'murimani mwiwa nave yaamukoha Petro ni amurummwa amoddaayo wi, “Vano neere tini, akhwiihinyu?”

³⁸ Nave Petro aallota wi, “Arive muthu a nyuwaano arukunuwe murima nave abatiziwe mu nnddina na Yesu Khrisitu wi machimwaaye ekhululukiwe nave aneerewaakhella emphaso ya Mulluku, Munepa Waweella.

³⁹ Vawi olonjeza wenko tti wa nyuwaano ni wa aniinyu ni athu attheene ayo eri woorekama, attheene ayo Mulluku Apwiihu anaawiithaneeye.”

⁴⁰ Petro ahaallalleyella athwaayo ni mawu oohiyanahiyana manchichi aalleella moollipa wi, “Mwiivulluse nyookha o ollaka onawanko wa athu oonanara amuttano!”

⁴¹ Sika athu ayo yaakhenlle mawaaye yaabatiziwa. Vaakhalla athu 3,000 ayo yaanjereriwe omullokoni wa athu ookhulupilila nllapo nenna.

⁴² Athwaayo yaatthukumana vamodda wi ehuddereke wa amurummwaayo, enaattana, enamumeyameya buledi nave enamucha nimodda owaakattho enavekella nimodda.

Waattana wa ookhulupilila

⁴³ Ddoottikhiniha ni ezizindikiro ddinchichi ddaheeriwa ni amurummwaayo nave athu attheene yahoova.

⁴⁴ Ookhulupilila attheenaayo yaavirellella otthukumananko mu waattana wiwa ni okawana ddeko ddiwa.

⁴⁵ Yaanakulliha emata ddiwa ni ddeko ddiwa ddoohiyanahiyana, enakawana attheene makobiraayo, ollikana ni ohoowa wa muthooyo.

⁴⁶ Nllapo ni nllapo yaanatthukumana mu enyumba ya Mulluku ni murimiiwa muttheene moowiiwanana. Navettho yaanamumeyameya buledi enamucha m'mawaniwa ni okawana yoocha moohakallalla ni murima woottaphuwa.

⁴⁷ Nave yaanamutitimiha Mulluku nave yaanakondiwa ni athu attheene. Vano nllapo ni nllapo Apwiya yanawaanjerera omullokonooyo ayo yavullusiwe.