Mitteko 19 - Mawu a Mulluku

Paulo o Efeso

¹ Apolo aariiye o Korinto, Paulo aheeta vamutundani oweella ezigawo ddimodda aphiya o Efeso. Wenko ahaaphwanyawo oohuddera amodda.

² Nave ahaakoha wi, “Ethiyo mwahaakhella Munepa Waweella mwakhulupililalleenyu?” Athwaalle yaamwaakhulla wi, “Naari wawi wookhalla Munepa Waweella khanniiweke.”

³ Paulo ahaakoha wi, “Vano mwabatiziwe ni obatizo wawiidde?” Athwaalle yaamwaakhulla wi, “Obatizo wa Yohane.”

⁴ Paulo aallota wi, “Obatizo wa Yohane waari wa orukunuwa murima. Nave ahaalleella athu a o Israele wi ekhulupilile mwa mmodda oyo anawa vatulli vaye, mwa Yesu.”

⁵ Yiiwalliiwa mawu yaalla, yaabatiziwa mu nnddina na Apwiya Yesu.

⁶ Paulo ahiiyaatthi mattaaye va alliwaayo nave Munepa Waweella ahaaphiyera nave yahaamba ollota ellotello ddoohidduwanyeya* navettho yaanallotella.

⁷ Athu ayo yaari vaavo yaari allopwana khumi ni eelli.

⁸ Wa miyeri miraru Paulo aanaya mu enyumba yamavekello nave aanallota moollipa murima wa athu, okambiranana ni opaalla waakopella mu omwene wa Mulluku.

⁹ Koma amoddaayo yaari awumma murima nave kheyaakhulupililalle. Vamiitthoni va athu attheene yaallota epewe dda ettilla ya Apwiya. Sika Paulo ahaahiya nave aakusavo ookhulupilila nave nllapo ni nllapo aanakambiranana mu esukulu ya Tirano.

¹⁰ Ddenndda ddaheereya wa miyakha miilli, wawi athu attheene ayo yakhalla o echigawo ya Asiya,* Ayuda ni athu ayo ehiri Ayuda, yahiiwa mawu a Apwiya.

Dda anamwani a Skeva

¹¹ Mulluku aaneera oweella mwa Paulo ddoottikhiniha ddoheereya wiilliwiilli.

¹² Naari mipango dda m'mattani ni ekuwo apharihalleeye mutteko ddakusiwa ddakhuneelliwana oovoriiwa, ereta ddiwa ddaanachirihiwa navettho minepa ddoonanara ddaanakhuma.

¹³ Ayuda amodda ayo yakhulla weeteeta ekhumihakattho minepa ddoonanara yaapaalla weera yeella mu nnddina na Apwiya Yesu. Yaallota wa minepa ddoonanarannddo wi, “Kinuulamulellani nyuwaano mu nnddina na Yesu, oyo anallalleyiwa ni Paulo.”

¹⁴ Anamwani aallopwana atthanu ni eelli a mullupa mukutho muullupalli a Ayuda nnddina naye Skeva sika yeera ddenndda.

¹⁵ Nave munepa woonanara mmodda waallota wi, “Kinnamudduwella Yesu, kinnadduwellattho dda Paulo koma nyuwaano ttaani?”

¹⁶ Muthu ookhalla ni munepa woonanarooyo ahaalluphella aaphara attheenaayo nave aagonjiha. Wawi yaathawa ovenyera mpammo ephoreyille nave ddoowara ddiwa ddaahuwalle.

¹⁷ Ayuda attheene ni athu ayo ehiri Ayuda ayo yakhalla o Efeso yahiiwa ddenndda. Nave attheene yahoova nave nnddina na Apwiya Yesu naariihiwa wuullupalli.

¹⁸ Ookhulupilila anchichi yaawa vamiitthoni va athu yaakhullellaka ni olapa machimo yeerilliiwa.

¹⁹ Anchichi a ayo yaari amasenga yaawaana mabukhwiiwa vamodda nave yoosiwa vamiitthoni va athu. Yeerengiwiiwa vamodda mutengo wa mabukhwaayo waari muullupalli.

²⁰ Mwamasiva ddiidda mawu a Apwiya yaavirellella ovuwa nave okhalla amasiva.

Owana wa athu a o Efeso

²¹ Ddimallille ddenndda Paulo aaganiza wi avirelle o Masedoniya ni Akaiya vooyaani o Yerusalemu. Aallota wi, “Kaavenyeraka wenko, kinaphwanella wi kiyettho o Roma.”

²² Vano ahaarumiha Timoteo ni Erasito wi eye o Masedoniya, eellaalla yaari amodda a athu aphareeyena mutteko. Vano Paulooyo aallekellawo vang'ono o echigawo ya Asiyanko.

²³ Enthawi yeeyo wahaambeya mapokoso muullupalli o Efeso ekaamba ya ettilla ya Apwiya.

²⁴ Muthu mmodda nnddina naye Demetrio aanoopa mafano a siliva a enyumba dda mullukwiiwa aamutthiyana ooromolliwa Artemi.* Nave allupa muttekwaaye yaanaphwanya makobiri manchichi.

²⁵ Sika aawiithana allupa muttekwaaye attheene vamodda ni athu amodda ayo yapharattho mutteko woophwanaphwana ni yoolla allota wi, “Athu nyu, munnadduwella wi eyuumaahu enavenyera m'muttekoni yoolla.

²⁶ Vano munnoona ni wiiwa nyookha ddineera Paulo. Olliye anallota wi milluku ddoosemiwa ni athu khe milluku nave ohaakopa athu anchichi mu Efesommu naarittho mu echigawo ettheene ya Asiya.

²⁷ Vookhalla yawoopiha, vano muttekwaahoolla woonanarihiwa. Ehirittho yeeyove koma enyumba ya Artemi mullukwaahu muullupalli oyo anallapelliwa ni athu attheene mu Asiya naarittho a va ellapo yavatthi ettheene khekhalla ello nave otitimihiwa waye oneeromalla!”

²⁸ Mulloko wa athoolle wiiwalliiwa mawu yaalla, waananariwa waamba okhuwa wi, “Muullupalli tti Artemi a athu a o Efeso!”

²⁹ M'muzindani mutthemwene mulle mwahaanganyereya nave yahaaphara alleto eelli Gayo ni Aristariko ayo yawiille ni Paulo ovenyera o Masedoniya ethamakellana o nthato na mattheella.

³⁰ Paulo aapaalla wi aye variyari va mulloko wa athwaayo koma ookhulupilila yaamuhiiha.

³¹ Attekweene amodda a echigaweeyo, ayo yaari akhwaaye a Paulooyo, yaamurumihella mawu oomuveka wi ahiye avollowa mu nthato namattheellanno.

³² Vano omutthukumanonko athu attheene yahaanganyereya, athu amodda yakhuwa ddimodda nave amodda yakhuwattho ddimodda kaambiiwa athu anchichi kheyaadduwella wi etthukumanne vamodda wi yeere tini.

³³ Athu amodda yaaganizera wi Alekizandro anapaalla ollota ello yawoonilliiwa Ayuda emukakhellaka vahoollo. Vano Alekizandro ahiimesa muwonwaaye wi aamaallihe athu nave aatthopoollelle phaama mowaateteza Ayuda.

³⁴ Koma yadduwenlliiwa wi tti Muyuda, attheene yaakhuwa vamodda wonanko vawaamba valle wa maora meelli wi, “Muullupalli tti Artemi a athu a o Efeso!”

³⁵ Nave namalembella a m'muzindanimmo sika aworille waamaalliha athwaalle nave allota wi, “Aefeso akhwaakanyu, ttaani ahinadduwella wi o Efeso wookhalla enyumba yoomullapellamo Artemi muullupalli ni ddawi mookhalla ni nlluku nno namonre ovenyera oddullu nave ninnallapelliwa?

³⁶ Khaavo anaawore okhoota ddeko ddenndda. Sika vano, mumaalle nave muheere ddeko moohiganizera phaama.

³⁷ Moowaana athwaalla wuno naari ehiiyalle mu enyumba ddahu ddoollapellamo mulluku apaalle ollota epewe dda mullukwaahu aamutthiyana.

³⁸ Demetrio ni allupa muttekwaaye yaarimi eri ni mullatu woowaavaanyiha athwaalla, ahiyeni yaasumelle o nthato. Ekaamba yawi nookhalla ni mathato a millatu ni aweeruza.

³⁹ Koma yaarivo ello emodda munapaalleenyu, muye mwakambirane o mutthukumano wa attekweene a m'muzindani.

⁴⁰ Vawi ddeereyille ollellonndda, vookhalla yawoopiha yawi nineerewiipiwa mullatu woowana. Vawi kheyiivo ello yawi yaawerowaambiha owananngu nave hiyaano nineerorama yoollota yanikoha.”

⁴¹ Allotilleeye ddenndda, ahaalleella athu wi epallalleye.