Mitteko 18 - Mawu a Mulluku

Paulo o Korinto

¹ Ddimallille ddenndda Paulo aavenyawo o Atene aya o Korinto.

² Ari wenko aakumanawo ni Muyuda nnddina naye Akwila, ooyariwa o Ponto, oyo aari awiille wene ovenyera o Italiya ni mwaariye nnddina naye Prisila. Vawi o Roma Kaisara* Klaudiyo ahalamulella Ayuda attheene wi evenyewo o Romanko.

³ Yaanaphara mutteko woophwanaphwana ni Paulo, woosowa ekuwo ddootthipellella misasa. Sika Paulo aanakhalla ni alliwaayo enapharella nimodda muttekooyo.

⁴ Nirive nllapo na Sabata aanakambirana ni Ayuda naarittho Agriki* mu enyumba ddamavekello* wi ekhulupilile.

⁵ Sila ni Timoteo yaphiyalliiwa ovenyera o Masedoniya, Paulo aari aviheeriwalle ni ollalleya mawu, owoonihella Ayuda wi Yesu sika Mesiya.*

⁶ Ayuda yamuvaanyihalliiwa emullotellattho epewe, olliye ahaahokollosella voottatthani nthupi va ddoowara ddaye ni ollota wi, “Mullatu okhalle wa nyuwaano! Miyaano nginna mullatu. Ovenyera vano kineerooya wa athu ayo ehiri Ayuda.”

⁷ Sika ahaahiya aya akhalla o enyumba ya muthu oyo ahiri Muyuda nnddina naye Titio Yusuto oyo amullapella Mulluku nave enyumbaaye yaari mwawaatamana ni enyumba yamavekello.

⁸ Krispo oyo aari muttekweene a mu enyumba yamavekello, aakhulupilila mwa Apwiya vamodda ni nibanja naye nittheene. Nave athu amodda anchichi a o Korinto ayo yiiwalle mawu a Paulo, yaakhulupilila nave yaabatiziwa.

⁹ Mahiiyu mamodda Paulo ahoona masomphenya mmo Apwiya yamulleelliiwa wi, “Ohoove, llalleyave nave ohihiye,

¹⁰ vawi kiri ni weyaano. Khaavo anaawuvoreye vawi anchichi m'muzindanimmu tti athwaaka.”

¹¹ Sika Paulo aakhalla wenko wa muyakha mmodda owaaka miyeri mitthanu ni mmodda, aahuddihaka athu mawu a Mulluku.

¹² Koma Galio eeriweeye wi akhalle oolamulella a Roma o Akaiya, Ayuda yaatthukumana vamodda, emuphara Paulo eyaana o nthato namillatu.

¹³ Ellota wi, “Muthu yoolla annaakopa athu wi emullapelleke Mulluku moohithwara malamulo!”

¹⁴ Paulo apaalleeye wi aambe ollota Galio ahaakuva ollota wa Ayudaayo wi, “Wakhanlleke mwaha woovaanyiha malamulo apaalle omweerella mukhwaaye ddoonanara kaaweerowiiwellani Ayuda nyu.

¹⁵ Koma kaambiiwa mwaha yoolla tti wa mawuve ni manddina owaakattho malamulwaanyu, nyeene sika munaphwanella wi mweeruze. Miyaano ngikhalla aweeruza ddeko ddenndda!”

¹⁶ Eerilleeye ddiiddo aawiikarihawo onthatoninko.

¹⁷ Vano attheenaayo yaamuphara Sostene, muttekweene a mu enyumba yamavekello, emuukuthella onthatoni wenko. Koma Galio khaapwathillewo naari vang'ono.

Ohokollweella o Antiyokeya

¹⁸ Paulo amallihalle okhalla ni ookhulupilila a o Korinto wa mallapo manchichi ahaahiya awella ekallawa ni Prisila ni Akwila eya o Siriya. Ahinawelle ekallawa o Kenkrea, Paulo aachema meehaaye kaambiiwa aallupella wa Mulluku.

¹⁹ Nave yaphiyalliiwa o Efeso, Paulo ahaahiya Prisila ni Akwila wenko. Aavollowa mu enyumba yamavekello nave aakambirana ni Ayuda.

²⁰ Athu yaamuveka wi akhalleve ni alliwaayo koma aakhoota.

²¹ Aallaanyeeye ahaalleella wi, “Waari opaalla wa Mulluku, kineerohokollowattho.” Sika aawella mukallawani avenyawo o Efeso.

²² Aphiyalleeye o Kaisareya, aawella oya o Yerusalemu nave aakumana ni mpingo nave aaya o Antiyokeya.*

²³ Akhanlleeye wenko, aatimulla nave aaya o echigawo ya Galatiya ni Frijiya, aallipihaka murima ookhulupilila attheene.

Apolo o Efeso ni Korinto

²⁴ Enthawi yeeyo Muyuda mmodda nnddina naye Apolo, oyo ayariwe o Alekizandriya, aawa o Efeso. Aari muthu oodduwella ollota phaama navettho aari oodduwella mawu a Mulluku.

²⁵ Aahuddihiwa dda ettilla ya Apwiya nave moollipa murima aanallalleya ni ohuddiha dda Yesu phaama ddene naari adduwenlle dda obatizo wa Yohaneve.

²⁶ Vano ahaamba ollota moollipa murima mu enyumba yamavekello. Prisila ni Akwila yamwiiwalliiwa, yaamukusella onyumbani wiwa, eya yamutthopoollella phaama dda ettilla ya Mulluku.

²⁷ Vano Apolo aapaalla wi aye o Akaiya, sika ookhulupilila a o Efeso yaamukavihera voomulembellani kalata awi awinnye ookhulupilila a o Akaiya, waalleella wi emwaakhelle. Aphiyalleeye, ahaakavihera ayo yakhulupililalle mwa echisomo ya Mulluku.

²⁸ Vawi mwamasiva ahaavaanyiha Ayuda athu yoonaka, wooniha mwa mawu a Mulluku wi Yesu tti Mesiya.