Mitteko 17 - Mawu a Mulluku

Paulo ni Sila o Tesalonika

¹ Paulo ni Sila yaheeta ovirella m'mizindani dda Amfipoli, Apoloniya ni Tesalonika nko waari enyumba yamavekello.

² Vano Paulo aaya o enyumba yamavekello vawi aaddollweella nave aakhalla wenko wa milungu miraru akambiranaka ni athu.

³ Nave ahaatthopoollella mawu a Mulluku navettho aawoonihella wi Mesiya* anaphwanella ohoosiwa nave avenye wa ookhwa. Nave aallota wi, “Yesu yoolla kinamullalleyeemi wa nyuwaano sika Mesiyooyo.”

⁴ Amodda a athwaayo yaakopeya yaathwara Paulo ni Sila navettho mulloko muullupalli wa Agriki* ayo yamullapella Mulluku ni atthiyana oohoollella anchichi yahaathwara.

⁵ Nave Ayuda amodda yahaakhallella ehache Paulo ni Sila, eya yaatthukumaniha athu oonanara ni aweeta shisha m'musewuni. Yahaambiha mapokoso m'muzindani mutthemwene mulle nave yaaya o enyumba ya muthu mmodda nnddina naye Yasoni wi yaaphwanyawo Paulo ni Sila yaakhumihelle vaatte vamiitthoni va athu.

⁶ Koma yahaaphwanyilliiwa yaamukusa Yasonooyo ni ookhulupilila amodda yaapurullella vamiitthoni va attekweene a nthato nave ekhuwa wi, “Athu yaalla aawaanganyera athu virive veko! Vano aawa owanihu wuno.

⁷ Nave Yasoni oowaakhella owaniwa wulle. Athu yaalla khenathwara malamulo a Kaisara* nave enallota wi ookhallavo mwene mmodda, nnddina naye Yesu.”

⁸ Yiiwalliiwa mawu yaalla, athu owaakattho attekweene a nthato a m'muzindani mulle yaananariwa nave yahaamba mapokoso.

⁹ Attekweenaalle yaamulleella Yasoni ni akhwaayaalle wi evelleelle makobiri wi ettaphulliwe nave yahaahiya wi eroweke.

Paulo ni Sila o Bereya

¹⁰ Waripalliiwa, ookhulupililaayo yahaarumiha Paulo ni Sila o Bereya. Yaphiyalliiwa, yaavollowa mu enyumba yamavekello.

¹¹ Athu a o Bereya yaari owiiwesesa ddeko ohiyana ni alle a o Tesalonika. Yaanaakhella othenga wa Paulo ni murima woottaphuwa nave nllapo ni nllapo yaanaashaasha mu mawu a Mulluku wi yoone nnddo allota Paulooyo ddaari ddiri ddawoona.

¹² Anchichi a yaayo yaakhulupilila nave allopwana ni atthiyana a Egriki ooriiheya anchichi yaakhulupililattho.

¹³ Nave Ayuda o Tesalonikaalle yahiiwa wi Paulo aallalleyattho mawu a Mulluku wa athu a o Bereya. Vano yaawa yaambattho owaanganyera athu nave yaaweerihattho athu wi yaambe mapokoso.

¹⁴ Enthawi yeeyo ookhulupililaayo yaamurumiha Paulo wookomella enyanja koma Sila ni Timoteo yaahalla o Bereya wenko.

¹⁵ Athu yamuvelleella Paulwaayo yaaphiya o Atene nave yahokollowiiwa, Paulo ahaalleella wi yamulleelle Sila ni Timoteo wi emuthware wenko mwawaakuva.

Paulo o Atene

¹⁶ Paulo aatiyereeye Sila ni Timoteo o Atene, aananariwa wunchichi oonilleeye wi muzindooyo waaddalla ni mafano.

¹⁷ Sika aakambirana ni Ayuda ni athu ayo ehiri Ayuda, oomullapella Mulluku, mu enyumba yamavekello. Navettho aanakambirana nirive nllapo vamusikani ni athu ayo yaari wenko.

¹⁸ Ahuddihi amodda a mulloko wooromolliwa wi Epikureya ni Stoyiki yaakambirana ni Paulooyo. Amoddaayo yaakoha wi, “Muthu oohidduwelloolla anapaalla ollota tini?” Amodda yahaakhulla wi, “Anooneya wonanko anallalleya dda milluku ddeelleto.” Yallotille ddenndda kaambiiwa Paulooyo aallalleya dda Yesu ni ovenya waye wa ookhwa.

¹⁹ Sika yaamukusa Paulo eyaana vanthatoni namillatu na m'muzindanimmo nooromolliwa wi Areopaga nave ellota wi, “Ninapaalla wi onilleelle dda ehuddiho yanaanweene onalloteeweella.

²⁰ Ddimodda dda ddeko onalloteewenndda ddinooneya wi tti ddeelleto wa hiyaano nave ninapaalla wi onittaphullelle wi tti tini.”

²¹ (Vawi athu attheene a mu Atene ni alleto yakhalla wenko yaanakonda wiiwa ddeko ddanaanweene erive enthawi.)

²² Paulo ahiimella vahoollo vanthatoninne allota wi, “Mwa ddeko ddittheddene kohoona wi nyuwaano athu a wuno o Atene tti athu oollapella milluku.

²³ Vawi keetilleemi m'muzindani mwanyummu, koona mapurwaanyu oollapellella, kaaphwanya nikuwa noolembiwa wi, ‘Wa mulluku oohidduwanyeya.’ Vano oyo munamullapelleenyu naari muhimudduwellaka, tti oyo kinamullalleyeemi wa nyuwaano.

²⁴ Mulluku, oyo aphatusalle ellapo yavatthi ni ddeko ddittheddene ddiri mwemmo, sika tti Apwiya ooddullu ni ellapo yavatthi nave khanakhalla mu enyumba ddoollapellamo ddoomakiwa ni athu.

²⁵ Nave khanarumeyelliwa ni athu wonanko olliye annapaalla ello kaambiiwa olliye sika anavaha okumi ni weeriha wi nivumeke ni ovaha erive ello wa athu.

²⁶ Ovenyera mwa muthu mmodda aaphatusa mitundu ddittheddene dda athu wi ddikhalleke va ellapo yavatthi ettheene. Aari aganizalle khalle dda enthawi ya mitundunnddo ni m'makomelloni mwa mapurwiiwa.

²⁷ Aheera ddenndda wi emwaasheke nave wi apaalle ttuumphwanya. Naari khari woorekamella ni arive muthu a hiyaano.

²⁸ Muthu mmodda aallota wi, ‘Mwa olliye ninnakhalla ni okumi ni weeta nave ninnakhallawo.’ Ollikana ni ollota wa owiipaanyu machipo amodda wi, ‘Hiyaanottho sika anaaye.’

²⁹ Ekaamba yawi niri anamwani a Mulluku, nihiganizeke wi ari wonanko mafano a golide apaalle siliva apaalle nlluku, ddoopangiwa ni ezeru ni matta a athu.

³⁰ Mulluku khalle ahaahiya athu oohaallaka vawi kheyaamudduwella koma vano annaalamulella athu attheene orive weko wi erukunuwe murima.

³¹ Vawi ootthoolla nllapo nawi eeruze ellapo yavatthi ettheene ni echilungamo mwa muthu amutthoonlleeye. Ohoonihella yeella wa arive muthu voomuvenyihani muthu yoolla wa ookhwa!”

³² Yamwiiwalliiwa Paulo allotaka dda ovenya wa ookhwa, amodda yaamuttheya koma amodda yaallota wi, “Ninapaalla wi muwe wi munilleellettho dda ddenndda.”

³³ Sika Paulo aavenyavo va mutthukumanooyo.

³⁴ Athu amodda yaakhulupilila emuthwara, mwa yaayo mwaakhallattho Dionizio, mmodda a athu a va nthato namillatu ni mutthiyana mmodda nnddina naye Damarisi ni athu amodda.