Mitteko 16 - Mawu a Mulluku

Timoteo aneeta ni Paulo owaaka Sila

¹ Paulo ni Sila yaaphiya o Derbe ni Listara, wenko yaamuphwanyawo oohuddera mmodda nnddina naye Timoteo. Amennyattho yaari ookhulupilila, yaarittho Muyuda nave attiitthinnya yaari Mugriki.*

² Ookhulupilila attheene a o Listara ni Ikonio yaallota ddaphaama dda Timoteo.

³ Paulo apaalla wi amukuse Timoteo eetena, sika aamuphadda kaambiiwa Ayuda attheene yakhalla omapuroni yaayo yaanadduwella wi attiitthinnya a Timoteo yaari Mugriki.

⁴ Yeetiiwa m'matawoni, yahaalleella ookhulupilila malamulo ayo yiiwananne amurummwa ni attekweene a o Yerusalemu.

⁵ Sika mipingo ddaallipihiwa mu echikhulupililo nave athu yahaanjerereya nllapo ni nllapo.

Masomphenya a Paulo o Troasi

⁶ Yaheeta ovirella mu ezigawo dda Frijiya ni Galatiya kaambiiwa Munepa Waweella wahaahiiha ollalleya mawu a Mulluku mu echigawo ya Asiya.*

⁷ Yaphiyalliiwa m'malireni mwa echigawo ya Misiya yaapaalla wi eye o echigawo ya Bitiniya koma Munepa wa Yesu waaweeriha wi ehiyeewo.

⁸ Sika yaheeta oweella mu Misiya ekitthella o Troasi.

⁹ Mahiiyu a nllapo nenno Paulo m'masomphenya amoona muthu a o Masedoniya iimenlle nave amuvekaka wi, “Mullapuwelle o Masedoniya wuno munikavihere hiyaano!”

¹⁰ Paulo oonilleeye masomphenyaalla, enthawi yeeyo naatimulla oya o Masedoniya kaambiiwa nahiiwanana wi tti Mulluku aniithanille wi nallalleye othenga waphaama wa athu eri wenkwaayo.

¹¹ Naatimulla vakallawani ovenyera o Troasi nillapuwa oya o echilumba ya Samotrase nave osaka wene naavirellella oya o Neapoli.

¹² Ovenyera wenko neetille vamutundani oya o Filipi, muzinda muullupalli wa echigawo ya Masedoniya oyottho onalamulelliwa ni niboma na Roma. Naakhallawo mallapo awaata.

¹³ Va nllapo na Sabata naavenyawo omuzindaninko niya omuhinjeni, nko neesahu wi wookhalla nipuro nawi Ayuda ennatthukumanawo enavekella. Sika naakeraatthi ninallota ni atthiyana yatthukumane wenko.

¹⁴ Mmodda a atthiyana yaniiwella nillotaka aari Lidiya, mutthiyana oovenyera o Tiyatira, oyo aari ookulliha ekuwo ddooreera ddoofiira. Aari mutthiyana oomullapella Mulluku nave Apwiya yaamuhoollella wi iiwesese mawu yallotiwa ni Paulo.

¹⁵ Olliye ni athu a nibanja naye ebatiziwe, aaniithana mooniwatihera wi, “Waawoni mukhalle mpa mwaka mwaarimi mwaakhullenlle wi kiri muthu ookhulupilila mwa Apwiya.” Nave aaniwatihera wawi nahaakhullella wi nikhalle ni olliye.

Mundende o Filipi

¹⁶ Nllapo nimodda niyaaka o nipuro na mavekello, naakumana ni namwalli oyo aari mullupa mutteko nave oyo aari ni munepa woonanara oyo wamweeriha wi allotelleke dda muhoollo. Aanaaphwanyella apwinnya makobiri manchichi ni ollotella wayenko.

¹⁷ Aamuthwara Paulo ni hiyaano akhuwaka wi, “Athwaalla tti oomurumeyella Mulluku Muullupalli! Enallalleya wa nyuwaano mmo munaavulluselliweenyu!”

¹⁸ Namwalloolle aheera ddenndda wa mallapo manchichi ophiyera Paulo aananariwana nave arukunuwa allota wa munepa woonanarooyo wi, “Mu nnddina na Yesu Khrisitu kinuulamula weyaano wi okhumemo mwa namwalloolla!” Enthawi yeeyo munepa woonanarooyo waakhumamo.

¹⁹ Vano apwinnya yoonilliiwa wi oowaphwanyella makobiroolle oochira, yahaaphara Paulo ni Sila yaapurullella wa attekweene a millatu vamusikani.

²⁰ Yaawaana vamiitthoni va attekweene a millatu nave ellota wi, “Athwaalla tti Ayuda nave ennaanganyera m'muzindani mwahummu.

²¹ Enahuddiha ddeko ddoovaanyiha malamulwaahu, hiyaano tti Aroma nave khanaakhullella naari weera ddennddo.”

²² Nave mulloko wa athooyo nuulliwani wahaamba owuukutha Paulo ni Sila. Nave attekweene a millatu yaalamulella wi yaahulle ddoowara dda Paulo ni Sila nave wi ewashulliwe.

²³ Yamallihalliiwa owuukutha wunchichi, yahaahiya mundende. Navettho oowehera a mundendemmo aalamuliwa wi allipihe waamakanko.

²⁴ Ekaamba ya mawu yaalla, ooweherooyo ahaawallella mu echipinda yamuwari nave aamaka moollipa atthindaanyihera manyallwiiwa variyari va matabwa oollemella.

²⁵ Nave variyari va mahiiyu Paulo ni Sila yaamavekella ni omwiipella machipo Mulluku nave athu amodda yahiyiwe mundendemmo yaaniiwellella.

²⁶ Moorurumusa waakhalla otikheya wa ethaya wuullupalli nko weerihallettho wi enyumba ettheene ya endendeeyo etikheye ovenyera vamatthipelloni. Enthawi yeeyo machiwi mattheene yaahulleya navettho onyolo yamakelliwe athu a mundendaalle waattaphuwa.

²⁷ Ooweheroolle aavenya nave oonilleeye wi machiwi a endendeeyo aahulleya, aheesa wi athu oohiyiwa mundendaalle aathawa. Sika aahullulla nsupada naye nave aari vakhuviru wi addiiphe.

²⁸ Koma Paulo aakhuwa ni mawu oowella wi, “Ohiiphoriihe weekha! Niri vaava attheene!”

²⁹ Nave ooweherooyo ahiithaniha enyali, athamakella muwari, atthukumellaka ekaamba yawoova aakokhora vakhuviru ni Paulo ni Sila.

³⁰ Vano ahaakhumihella vaatte aakoha wi, “Kinaphwanella wi keere tini wi kivullusiwe?”

³¹ Paulo ni Sila yaamwaakhulla wi, “Khulupilila mwa Apwiya Yesu nave oneerovullusiwa, weyaano ni nibanja nawo.”

³² Nave yaallalleya mawu a Apwiya wa ooweherooyo ni attheene a mu enyumbaaye.

³³ Mahiiyu vaavo ooweherooyo ahaakusa Paulo ni Sila aahuwa makhwatiiwa. Nave olliye vamodda ni nibanja naye yaabatiziwa.

³⁴ Vano ahaakusa Paulo ni Sila ayaana owaniwa aavaha yoocha. Nave olliye ni nibanja naye yaahakallalla ni murimiiwa muttheene kaambiiwa yaamukhulupilila Mulluku.

³⁵ Osaka wene attekweene a millatu yahaarumiha akhoto wi yallote wi, “Attaphulleni athwaayo eroweke.”

³⁶ Sika ooweheroolle aamulleella Paulo wi, “Attekweene a millatu aarumiha mawu awi weyaano ni Sila muttaphulliwe. Vano khumani nave rowani ni murendelle.”

³⁷ Koma Paulo aallota wa akhoto wi, “Yaanuukutha hiyaano athu yoonaka ehiniphwanyille ni mullatu naari niri Aroma!* Nave enihiyattho mundende. Vano enapaalla enikhumihe mwawiitta. Ddennddo khaddeereya! Attekweene a millatwaayo sika enaphwanella wi ewe wuno enikhumihe weekhiiwa.”

³⁸ Akhotwaalle yaaya yaatthopoollella attekweene a millatwaalle nave yiiwalliiwa ddenndda wi Paulo ni Sila tti Aroma yahoova.

³⁹ Sika yaayaawo yaapepesa Paulo ni Silaayo nave yahaakhumiha mundendemmo navettho yaaveka wi evenyemo m'muzindanimmo.

⁴⁰ Paulo ni Sila yaakhumamo mundendemmo eya o enyumba ya Lidiya. Wenko yaakumanawo ni ookhulupilila akhwiiwa nave yahaallipiha murima nave yaatimulla.