Mitteko 15 - Mawu a Mulluku

Mutthukumano o Yerusalemu

¹ Athu amodda oovenyera o Yudeya yaaya o Antiyokeya* yaamba waahuddiha athu ookhulupilila wi, “Mwaahiphaddiwa moollikana ni malamulo a Mose khamuwora ovullusiwa.”

² Nave Paulo ni Baranaba yaavaanyihanana athu oovenyera o Yudeyaayo moollipa dda yeella. Sika yahiiwanana wi Paulo ni Baranaba owaaka athu amodda o Antiyokeya eye o Yerusalemu yawoone amurummwa ni attekweene wi yakambirane dda ehuddihweella.

³ Vano Mpingo waarumihalliiwa nave yavirelliiwa o ezigawo dda Fenisiya ni Samariya, yaavuwiha dda orukunuwa murima wa athu ayo ehiri Ayuda nave epilli yeella yahaahakallalliha ookhulupilila attheene.

⁴ Yaphiyalliiwa o Yerusalemu, yahaakhelliwa ni mpingo, amurummwa ni attekweene nave yaatthopoolla erive ello Mulluku eerilleeye oweella mwa alliwaayo.

⁵ Nave ookhulupilila amodda ayo yaari a mulloko wa Afarisi* yahiimella ellota wi, “Athu ayo ehiri Ayuda enaphwanella wi ephaddiwe navettho elamuliwe wi ethwareke malamulo a Mose.”

⁶ Nave amurummwa ni attekweene yaakumana wi ekambirane phaama dda mwaha yoolla.

⁷ Ekambiranne wa enthawi yoorekama Petro ahiimella allota wi, “Asinnaka ni arokoraka nyu, munnadduwella wi khalle Mulluku aakitthoolla miyaano variyari vanyu wi kallalleye othenga waphaama wa athu ayo ehiri Ayuda wi yiiwe ni okhulupilila.

⁸ Nave Mulluku oyo anadduwella mirima dda athu attheene, tti mboni wi alliwattho tti oophwanella okhulupilila vawaavahani Munepa Waweella wonanko mmo anivahelleeye hiyaano.

⁹ Mulluku khananihiyaniha hiyaano ni alliwaayo, ahaakhululukella machimwiiwa kaambiiwa yaakhulupilila.

¹⁰ Vano munamweesella tini Mulluku vawaareyani ookhulupilila vatulli viwa ddeko ddoollemella nnddo makhollwaahu naari hiyaano kheniworille odditukhulla?

¹¹ Khe ddawoona! Ninnakhulupilila wi nineerovullusiwa wonanko alliwaayo oweella mwa echisomo ya Apwiya Yesu.”

¹² Mulloko wa athu muttheene khawaallotille ello mvo yawiiwellelliiwa Baranaba ni Paulo ellotoka dda ezizindikiro ni ddoottikhiniha ddittheddene Mulluku eerilleeye oweella mwa alliwa variyari va athu ayo ehiri Ayuda.

¹³ Yamallihalliiwa ollotanko, Yakobo aallota wi, “Kiiwelleni miyaano, asinnaka ni arokoraka!

¹⁴ Simoni ootthopoolla phaama mmo Mulluku vawaamba oonihalleeye wi ohaatthoolla athu ayo ehiri Ayuda wi ekhalle athwaaye.

¹⁵ Mawu a anamallotella ennallikana ni nndda vawi ddaalembiwa mu mawu a Mulluku wi,

¹⁶ ‘Apwiya enallota wi, ddamalla ddenndda kineerohokollowa, kihokolloselle omwene wa Davide oyo wakumuwalle wonanko enyumba. Kineeromakattho mwakumulliwemmo nave kineeroweeriha wi okhalle woollipa.

¹⁷ Vano athu amodda attheene yahanllaayo eneeroowa wa miyaano, athu attheene ayo ehiri Ayuda, ayo kaawiithanilleemi wi ekhalle aaka.

¹⁸ Sika Apwiya yaheeriha ddenndda wi ddidduwanyeye khalle.’

¹⁹ “Sika miyaano kinallota wi nihaahoose athu ayo ehiri Ayuda ayo enarukunuwella wa Mulluku.

²⁰ Koma naalembelle kalata owaalleella wi ehicheke enama ddooheraatthiwa wa mafano kaambiiwa tti ddoonanara. Nave ehiraruweke. Navettho ehicheke enama ddawiiphiwa mwawi manyokotholla makohi nave ehichekettho nikhame na enama.

²¹ Lamulo na Mose ninneerengiwa waambeella khalle mu enyumba ddamavekello* nirive nllapo na Sabata ni wi mawaaye ennallalleyiwa mu orive muzinda.”

Kalata oolembelliwa athu ayo ehiri Ayuda

²² Nave amurummwa ni attekweene, vamodda ni mpingo muttheene, yahiiwanana wi yaatthoolle athu amodda ovenyera mu mullokwiiwa wi yaarumihe wa Antiyokeya vamodda ni Paulo owaaka Baranaba. Vano yahaatthoolla athu eelli Yudasi ooromolliwa Barasaba ni Sila, ayo yaari ooriiheya vayari va ookhulupililaayo.

²³ Nave yaawinnyera kalata oollota wi, “Ovenyera wa amurummwa, attekweene ni ookhulupilila akhwiinyu oya wa ookhulupilila akhwiihu ayo ehiri Ayuda mu etawoni ya Antiyokeya, mu ezigawo dda Siriya ni Silisiya, nnihina mooni.

²⁴ Nohiiwa wi athu amodda oovenyera mu mullokwaahu ahuuhoosani ni owaapheellihani muru ni mawu yallotilliiwa. Yaayo kheyaarumiwe ni hiyaano.

²⁵ Sika nookumana vamodda nave nohiiwanana wi naatthoolle athu naarume wa nyuwaano. Yaayo eneeroowa ni akhwiihu ookondiwa Baranaba ni Paulo,

²⁶ ayo yapanlle ovelleella murimiiwa wi yaarumeyelle Apwiihu Yesu Khrisitu.

²⁷ Vano, ekaamba ya yeella nohuurumihellani Yudasi ni Sila wi yuulleelleni mawu avayanoni a ddeko ddennddo nilembilleehu mukalatanimmu.

²⁸ Sika moowiiwanana ni Munepa Waweella nooganiza wi nihuureyeni ddeko ddoollemella waanjerera va ddennddave ddoopaalleya ddawi

²⁹ muhicheke enama yooheraatthiwa omukuthoni wa mafano, enama ddawiiphiwa mwawi manyokotholla makohi, nikhame na enama navettho muhiraruweke. Muneerekeweera phaama mwaathwaraka ddeko ddenndda. Hallani phaama.”

³⁰ Vano oorumiwaalle yaatimulla eya o Antiyokeya, wenko yaatthukumaniha mpingo muttheene ewinnya kalatooyo.

³¹ Athwaayo yamweerengilliiwa kalatooyo, yaahakallalla ni mawu oollipiha murimaayo.

³² Yudasi ni Sila ayottho yaari anamallotella yahaarera enthawi yoorekama ekambiranaka mawu oollipiha murima ni oovaha masiva.

³³ Yakhanlliiwa wenko, ookhulupililaalle yaawaakhullella Yudasi ni Sila wi eroweke mwamurendelle wa ayo yaarumalle.

³⁵ Nave Paulo ni Baranaba yaakhalla o Antiyokeya ehuddihaka ni ollalleya mawu a Apwiya vamodda ni athu amodda.

Ohiyana wa Paulo ni Baranaba

³⁶ Viviralle mallapo mamodda Paulo aallota wa Baranaba wi, “Hanko nihokollowe niye naweetelleke asinnihu ni arokorihu mu matawoni mmo nallalleyeehumo mawu a Apwiya wi nawoone yaari phaama.”

³⁷ Baranaba aapaalla wi amukuse Yohane Mariko.

³⁸ Koma Paulo khaapanlle omukusa Yohane Markooyo kaambiiwa ahaahiya weekhiiwa o Pamfuliya nave khaavirellelle ophara mutteko ni alliwaayo.

³⁹ Nave vaakhalla okangana variyari va Paulo ni Baranaba sika yaamwallana, Baranaba amukusa Mariko ewella mukallawani enaya o Kupro.

⁴⁰ Nayeene Paulo amutthoonlle Sila yaatimulla, ookhulupilila yaavekella wi Apwiya eweerelle echifundo wi yeete phaama.

⁴¹ Vano Paulo ni Sila yavirenlle o Siriya ni Silisiya, waallipiha murima athu a m'mipingoni.